ຕາມການໃຫ້ສຳພາດຂອງຊາວຄ້າຂາຍ ໃນງານບຸນອອກພັນສາ ແລະ ຊ່ວງເຮືອທ່າວັດຈັນປີນີ້ ໃຫ້ຮູ້ວ່າ: ການເກັບຄ່າເຊົ່າທີ່ດິນ(ຫ້ອງຂາຍເຄື່ອງ) ແມ່ນແພງກວ່າລາຄາຂອງ ຄະນະກຳມະກຳຈັດງານບຸນ ໄດ້ກຳນົດໄວ້ຄື: ຫ້ອງຂະໜາດ 4 X 4 ແມັດ ແມ່ນບໍ່ໃຫ້ເກີນ 2,5 ຫາ 3 ລ້ານກີບ, ແຕ່ກົງກັນຂ້າມ ການເກັບຕົວຈິງ ແມ່ນປະມານ 5-6 ລ້ານກີບຕໍ່ຫ້ອງ, ຍ້ອນມີບຸກຄົນຈຳນວນໜຶ່ງ ເກງກໍາໄລຈາກການເຊົ່າກັບຜູ້ສຳປະທານ ແລ້ວມາຂາຍຕໍ່ໃຫ້ ຊາວຄ້າຂາຍໃນລາຄາທີ່ສູງຄືດັ່ງກ່າວ.
ຊາວຄ້າຂາຍຜູ້ໜຶ່ງໃຫ້ຮູ້ວ່າ: ໃນໄລຍະຜ່ານມາກໍມີຄືກັນໃນການເກງກໍາໄລ, ຄ່າເຊົ່າບຸດໃນງານບຸນຕ່າງໆ ແມ່ນບໍ່ຮ້າຍແຮງດັ່ງປີນີ້, ເບິ່ງຄືວ່າບໍ່ມີການຄຸ້ມຄອງແຕ່ຢ່າງໃດ ມັນເປັນການເອົາລັດເອົາປຽບຊາວຄ້າຂາຍ ຜູ້ເຮັດແທ້ທຳຈິງຫຼາຍເກີນໄປ, ກໍເຊັ່ນດຽວກັນກັບ ການເກັບຄ່າບໍລິການຝາກລົດ, ຊຶ່ງພາກສ່ວນກ່ຽວຂ້ອງ ໄດ້ກຳນົດໃຫ້ເກັບຄ່າຝາກລົດຈັກບໍ່ໃຫ້ເກີນ 5 ພັນກີບ/ຄັນ, ແຕ່ຍັງມີຄອກຝາກລົດຫຼາຍຈຸດ ແມ່ນເກັບເກີນກຳນົດທົບ 2 ທົບ 3 ເທົ່າກໍມີ ແລະ ກໍບໍ່ເຫັນວ່າມີໃຜມາປັບໃໝໃສ່ໂທດຜູ້ລະເມີດໄດ້.
ຜູ້ປະກອບການເຫຼົ່ານັ້ນໃຫ້ເຫດຜົນວ່າ: ຍ້ອນລາຄາຄ່າເຊົ່າສະຖານທີ່ແພງ ຈຳເປັນຕ້ອງໄດ້ເກັບແພງ, ຊຶ່ງບັນຫາດັ່ງກ່າວ ໄດ້ສົ່ງຜົນກະທົບໂດຍກົງ ຕໍ່ມວນຊົນຜູ້ມາທ່ຽວບຸນ ຕ້ອງໄດ້ໃຊ້ຈ່າຍຫຼາຍຂຶ້ນ, ເຂົ້າຫຼາມປີ້ງໄກ່ກໍມີລາຄາແພງກວ່າປົກກະຕິຫຼາຍເທົ່າ. ຊາວຄ້າຂາຍຈຳນວນຫຼາຍຕ່າງກໍຈົມ ວ່າ: ການຂາຍເຄື່ອງໃນງານບຸນອອກພັນສາ ແລະ ຊ່ວງເຮືອປີນີ້ບໍ່ກຸ້ມທຶນ ຍ້ອນຄ່າເຊົ່າແພງຫຼາຍ ແລະ ຖ້າຜູ້ຮັບຜິດຊອບຫາກບໍ່ເບິ່ງຜົນ ແລະ ເພີ່ມທະວີການຄຸ້ມຄອງທີ່ດີແລ້ວ, ກໍອາດຈະເຮັດໃຫ້ງານບຸນປະເພນີດັ່ງກ່າວຈືດຈາງລົງ ແລະ ຈະບໍ່ເປັນການສົ່ງເສີມການທ່ອງທ່ຽວທີ່ດີຂຶ້ນ.
ດັ່ງນີ້, ກໍຫວັງວ່າພາກສ່ວນກ່ຽວຂ້ອງຈະມີການກວດກາ ແລະ ເພີ່ມຄວາມເຂັ້ມງວດກວ່າເກົ່າ ໃນການຄຸ້ມຄອງບໍລິຫານງານບຸນຕ່າງໆ ເພື່ອບໍ່ສົ່ງຜົນກະທົບຕໍ່ຊາວຄ້າຂາຍ ແລະ ມວນຊົນຜູ້ມາທ່ຽວຊົມງານບຸນ ເພື່ອໃຫ້ສົມກັບຄ່າວ່າເປັນບຸນໃຫຍ່ຂອງຊາດ ທີ່ທຸກຄົນຕັ້ງໃຈຢ່າກມາເບິ່ງມາຊົມ ພ້ອມນັ້ນ ກໍອາດຈະເປັນບົດຮຽນໃຫ້ແກ່ງານບຸນອຶ່ນໆຄື: ຍັງອີກສອງອາທິດຂ້າງໜ້ານີ້, ບຸນນະມັດສະການພະທາດຫຼວງ ກໍຈະເລີ່ມຂື້ນແລ້ວ ແລະ ຫວັງວ່າພາກສ່ວນກ່ຽວຂ້ອງ ຈະເອົາໃຈໃສ່ການຄຸ້ມຄອງບັນຫາຕ່າງໆດີຂຶ້ນກວ່າເກົ່າ.
ແຫລ່ງຂ່າວ:
