ຂປລ. ກອງປະຊຸມໃຫຍ່ ຄັ້ງທີ VI ຂອງຜູ້ແທນແນວລາວສ້າງຊາດ ແຂວງວຽງຈັນ ໄຂຂຶ້ນຢ່າງເປັນທາງການ ຢູ່ທີ່ສະໂມສອນ ເຂື່ອນໄຟຟ້ານ້ຳງື່ມ I ໃນວັນທີ 29-30 ຕຸລາ ນີ້, ໂດຍເປັນປະທານຂອງ ສະຫາຍ ເຂົາແກ້ວ ສົມຈັນມະວົງ ປະທານອົງການ ແນວລາວສ້າງຊາດ ແຂວງວຽງຈັນ, ມີສະຫາຍ ຕົງ ເຢີທໍ່ ກຳມະການສູນກາງພັກ ຮອງປະທານຜູ້ປະຈຳການ ສູນກາງແນວລາວສ້າງຊາດ, ສະຫາຍນາງ ບຸນເພັງ ສາຍນໍລະດີ ຮອງເລຂາພັກແຂວງ, ມີບັນດາເຈົ້າເມືອງ, ປະທານແນວລາວສ້າງຊາດເມືອງ, ພ້ອມດ້ວຍບັນດາຜູ້ແທນສົມບູນ ເຊິ່ງເປັນຕົວແທນ ໃຫ້ແກ່ອົງການແນວລາວສ້າງຊາດ ຂັ້ນທ້ອງຖິ່ນ ແລະ ຮາກຖານເຂົ້າຮ່ວມ ຈຳນວນ 119 ສະຫາຍ, ຍິງ14 ສະຫາຍ.
ສະຫາຍ ຊາວລໍ່ ຕົ່ງເຊັ່ງ ຮອງປະທານອົງການແນວລາວສ້າງຊາດ ແຂວງວຽງຈັນ, ກ່າວໃນຮ່າງລາຍງານການເມືອງ ຂອງອົງການແນວລາວສ້າງຊາດ ແຂວງວຽງຈັນ ວ່າ: ດ້ວຍການຊີ້ນຳໆພາຢ່າງໃກ້ຊິດ ຂອງສູນກາງແນວລາວສ້າງຊາດ ແລະ ຄະນະປະຈຳພັກແຂວງ, ອົງການແນວລາວສ້າງຊາດ ແຂວງວຽງຈັນ ໄດ້ເອົາໃຈໃສ່ເຕົ້າໂຮມ ຄວາມສາມັກຄີບັນດາເຜົ່າ ທຸກຊັ້ນຄົນ ແລະ ສາສະໜາ ເຮັດໃຫ້ປະຊາຊົນລາວ ບັນດາເຜົ່າ ພາຍໃນແຂວງ ມີຄວາມສາມັກຄີອັນແໜ້ນແກ່ນ ເປັນພື້ນຖານອັນດີ ເຮັດໃຫ້ແຂວງວຽງຈັນ ມີຄວາມສະຫງົບປອດໄພ, ປະຊາຊົນຍຸທ່າງສ້າງສາ ພັດທະນາບ້ານຊ່ອງຂອງຕົນ ໃຫ້ຈະເລີນສີວິໄລຂຶ້ນເລື້ອຍໆ, ນຳພາສ້າງຕັ້ງກອງທຶນ ພັດທະນາຂັ້ນບ້ານ, ຮອດປັດຈຸບັນ ມີ 38 ກອງທຶນ, ມີສະມາຊິກ 5.500 ກວ່າຄົນ, ມີທຶນເກືອບ14 ຕື້ກີບ, ນຳພາປະຊາຊົນຮັກສາ ແລະ ສົ່ງເສີມວັດທະນະທຳ ອັນດີງາມຂອງແຕ່ລະເຜົ່າ ບໍ່ໃຫ້ເຄື່ອນໄຫວ ແລະ ເຊື່ອຖືງົມງວາຍ, ລາມົກອານາຈານ, ປະກອບສ່ວນສ້າງບ້ານ ວັດທະນະທຳໄດ້ 244 ບ້ານ, ບ້ານພັດທະນາໄດ້ 190 ບ້ານ, ບ້ານສາທາລະນະສຸກ 322 ບ້ານ, ປຸກລະດົມປະຊາຊົນປະກອບສ່ວນ ເຂົ້າໃນວຽກງານສຶກສາ ແລະ ການກໍ່ສ້າງອາຄານຮຽນ, ຫໍພັກຄູ, ປຸກລະດົມປະຊາຊົນ ນຳເອົາລູກໃນເກນອາຍຸ ເຂົ້າຮຽນໄດ້100% ແລະ ສາມາດປະກາດຈົບຊັ້ນ ປະຖົມບຳລຸງທົ່ວແຂວງ ໄດ້ໃນທ້າຍປີ 2014 ທີ່ຜ່ານມາ, ເອົາໃຈໃສ່ປັບປຸງກົງຈັກການຈັດຕັ້ງ ໃຫ້ເຂັ້ມແຂງໜັກແໜ້ນ. ພ້ອມນີ້ ອົງການແນວລາວສ້າງຊາດ ແຂວງວຽງຈັນ ຍັງໄດ້ເອົາໃຈໃສ່ຍົກລະດັບ ຄຸນນະພາບວຽກງານຂອງຕົນ ດ້ວຍການນຳສົ່ງພະນັກງານ ໄປຍົກລະດັບທິດສະດີ ການເມືອງ–ການປົກຄອງ ແລະ ອົບຮົມຢູ່ ສສ ຫວຽດນາມ ເພື່ອເຮັດໃຫ້ພະນັກງານ ມີຄວາມຮູ້, ຄວາມສາມາດດີຂຶ້ນກ່ວາເກົ່າ.
ໃນກອງປະຊຸມ ບັນດາຜູ້ແທນສົມບູນ ຍັງຈະໄດ້ນຳໃຊ້ສິດ ປະຊາທິປະໄຕ ຂອງຕົນປ່ອນຮັບຮອງ ເອົາປະທານ, ຮອງປະທານ ແລະ ຄະນະ ກຳມະການ ແນວລາວສ້າງຊາດ ແຂວງວຽງຈັນ ເພື່ອສືບຕໍ່ຊີ້ນຳໆພາ ວຽກງານແນວລາວສ້າງຊາດ ແຂວງວຽງຈັນ ໃນ 5 ປີຕໍ່ໜ້າ ອີກດ້ວຍ.
ແຫລ່ງຂ່າວ:
