ອີກໜຶ່ງກິດຈະກຳຂອງງານສັບປະດາລາວ-ຝຣັ່ງ ທີ່ຫໍວັດທະນະທຳແຫ່ງຊາດ ໃນຕອນຄ່ຳຂອງວັນທີ 26 ພະຈິກ 2013 ທີ່ຜ່ານມາ ໄດ້ມີການສະແດງດົນຕີແຈດສ໌ (Erik Truffaz) ເຊິ່ງເປັນນັກສິລະປິນຈາກປະເທດຝຣັ່ງ ທີ່ມີຜົນງານເປັນທີ່ຍອມຮັບໃນປະເທດ ແລະ ໃນລະດັບສາກົນ ໄດ້ນຳມາສະແດງບັນເລງສຽງເພງຢ່າງມ່ວນຊື່ນ ເອີ້ນສຽງຕົບມືຈາກບັນດາທ່ານຜູ້ຊົມທີ່ເຂົ້າຮ່ວມຊົມ ແລະ ປິດທ້າຍດ້ວຍການສະແດງຮ່ວມຈາກນັກສິລະປິນລາວ ອັນໄດ້ເພີ່ມຄວາມເບີກບານມ່ວນຊື່ນຄຶກຄື້ນຂຶ້ນອີກ.
ເປັນກຽດເຂົ້າຮ່ວມຊົມການສະແດງໃນຄັ້ງນີ້ ໂດຍທ່ານ ສຸກັນ ມະຫາລາດ ເຈົ້າຄອງນະຄອນຫຼວງວຽງຈັນ ທ່ານເອກອັກຄະລັດຖະທູດຝຣັ່ງ ປະຈຳລາວ ບັນດາການນຳຂອງນະຄອນຫຼວງວຽງຈັນ ແຂກທັງພາຍໃນ ແລະ ຕ່າງປະເທດ ແລະ ບັນດານ້ອງນັກຮຽນຊາວນະຄອນຫຼວງວຽງຈັນ ເຂົ້າຮ່ວມຊົມ.