ເຈົ້າໜ້າທີ່ຈະລາຈອນນະຄອນຫລວງວຽງຈັນ ໃຫ້ຮູ້ວ່າ: ໃນວັນທີ 27 ຕຸລານີ້ ຊຶ່ງເປັນມື້ອອກພັນສາປະວໍລະນາ 2558 ຢູ່ທົ່ວນະຄອນຫລວງວຽງຈັນ, ມີອຸປະຕິເຫດເກີດຂຶ້ນ 9 ກໍລະນີ, ມີຜູ້ເສຍຊີວິດ 3 ຄົນ ແລະ ມີຜູ້ໄດ້ຮັບບາດເຈັບຈຳນວນໜຶ່ງຄື: ໃນຄໍ່າຄືນວັນດັ່ງກ່າວ, ຢູ່ເຂດບ້ານພູຄຳ, ເມືອງໄຊທານີ ໄດ້ເກີດເຫດລົດໃຫຍ່ຕຳລົດຈັກ ຢ່າງຮຸນແຮງ ເຮັດໃຫ້ທ້າວ ຄຳສະພາຍ (ຜູ້ຂັບຂີ່ລົດຈັກ), ອາຍຸ 24ປີ, ຢູ່ບ້ານໂພນໄຮ່ຄຳ, ເມືອງໄຊທານີ ເສຍຊີວິດຄາທີ່; ຢູ່ເຂດບ້ານໜອງທາເໜືອ, ເມືອງຈັນທະບູລີ ໄດ້ເກີດເຫດລົດໃຫຍ່ຕຳລົດຈັກ 2 ຄັນຢ່າງຮຸນແຮງ, ສົ່ງຜົນໃຫ້ທ້າວ ບຸນທະວີ (ຜູ້ຂັບຂີ່ລົດຈັກ), ອາຍຸ 27 ປີ, ກຳມະກອນ ຢູ່ບ້ານດອນແດງ ເມືອງດັ່ງກ່າວ ເສຍຊີວິດ ແລະ ຕອນເຊົ້າຂອງວັນທີ 28 ຕຸລານີ້, ຢູ່ເຂດບ້ານຫ້ວຍຫ້ອມ, ເມືອງສີໂຄດຕະບອງ ໄດ້ເກີດເຫດລົດຈັກຕຳກັນດ້ວຍຄວາມແຮງ, ເຮັດໃຫ້ທ້າວ ຫ້ອມ ອາຍຸ 17ປີ, ກຳມະກອນ ຢູ່ບ້ານດັ່ງກ່າວ ເສຍຊີວິດຄາທີ່.
ເຈົ້າໜ້າທີ່ ໃຫ້ຂໍ້ສັງເກດວ່າ: ການເກີດອຸປະຕິເຫດບົນທ້ອງຖະໜົນ ຢູ່ນະຄອນຫລວງວຽງຈັນ ນັບມື້ເພີ່ມຂຶ້ນຫລາຍ, ສ່ວນຫລາຍແມ່ນມາຈາກຜູ້ຂັບຂີ່ຂາດສະຕິການປະຕິບັດລະບຽບຈະລາຈອນຄື: ຂີ່ລົດໄວ, ມີອາການມືນເມົາໃນເວລາຂັບຂີ່, ພ້ອມນັ້ນ ກໍແມ່ນຈຳນວນພາຫະນະນັບມື້ເພີ່ມຂຶ້ນຢ່າງໄວວາ, ບວກກັບສະພາບເສັ້ນທາງບາງແຫ່ງກໍມີຄວາມຫຍຸ້ງຍາກຍ້ອນເປ່ເພເປັນບວກເປັນຂຸມ, ບໍ່ມີແສງສະຫວ່າງເຍືອງທາງ ແລະ ສິ່ງອຳນວຍຄວາມສະດວກອື່ນໆ ຕໍ່ການຂັບຂີ່ເຊັ່ນ: ໄຊອຳນາດ, ປ້າຍເຕືອນ, ປ້າຍຫ້າມ ແລະ ເສັ້ນທາງການຈະລາຈອນ ກໍຢູ່ໃນສະພາບສຸດໂຊມຫລາຍ, ຊຶ່ງພາກສ່ວນກ່ຽວຂ້ອງຈະຕ້ອງໄດ້ເອົາໃຈໃສ່ກວດກາສ້ອມແປງໃຫ້ດີຂຶ້ນ.
ທີ່ມາ ໜັງສືພິມລາວພັດທະນາ
