ສຳນັກຂ່າວຕ່າງປະເທດ ລາຍງານໃນວັນທີ 27 ຕຸລານີ້ວ່າ ທ່ານ ຝຣັ່ງຊົວສ໌ ໂອລອງ ປະທານາທິບໍດີຝຣັ່ງ ໄດ້ພົບປະຫາລືກັບ ທ່ານ ສົມເດັດ ຮຸນແຊນ ນາຍົກລັດຖະມົນຕີປະເທດກຳປູເຈຍ ທີ່ນະຄອນຫລວງປາຣີ ປະເທດຝຣັ່ງ ໃນມື້ວານນີ້ (26 ຕຸລາ) ໂດຍຜູ້ນຳຝຣັ່ງ ໄດ້ສະແດງຄວາມຊົມເຊີຍ ຕໍ່ບົດບາດຂອງກຳປູເຈຍ ໃນການປະຕິບັດງານຮັກສາສັນຕິພາບ ຮ່ວມກັບອົງການສະຫະປະຊາຊາດ ໂດຍສະເພາະໃນປະເທດມາລີ ສາທາລະນະລັດອາຟຣິກາກາງ ແລະ ລີບັງ. ພ້ອມກັນນັ້ນ, ຜູ້ນຳຝຣັ່ງ ຍັງໃຫ້ຄຳໝັ້ນສັນຍາວ່າ ຈະຊ່ວຍເຫລືອກຳປູເຈຍ ໃນການປັບປຸງການພັດທະນາເສດຖະກິດ ຂອງປະເທດ ເພື່ອຮັດແໜ້ນສາຍພົວພັນຮ່ວມມື ລະຫວ່າງກຳປູເຈຍ ແລະ ຝຣັ່ງ.