ສຳນັກຂ່າວຕ່າງປະເທດ ລາຍງານໃນວັນທີ 26 ຕຸລານີ້ວ່າ ທ່ານ ຣິໂມ ເຊຣາ ນາຍົກລັດຖະມົນຕີສະໂລວັກ ໄດ້ອອກມາປະກາດວ່າ ຖ້າຫາກສະຫະພາບເອີຣົບ ບໍ່ສາມາດແກ້ໄຂບັນຫາຜູ້ອົບພະຍົບໄດ້ ອາດຕ້ອງເຮັດໃຫ້ສະຫະພາບເອີຣົບ ເຖິງຂັ້ນຫລົ້ມສະຫລາຍ ແລະ ມີການປະກາດແຍກຕົວຢ່າງແນ່ນອນ ໂດຍຄຳປະກາດດັ່ງກ່າວ ເກີດຂຶ້ນພາຍຫລັງຮົງກາລີ ໄດ້ປະກາດປິດຊາຍແດນດ້ານໃຕ້ ໃນ 9 ມື້ທີ່ຜ່ານມາ ເຮັດໃຫ້ນັບຕັ້ງແຕ່ວັນທີ 17 ຕຸລາ ຈົນມາເຖິງປັດຈຸບັນ ມີຜູ້ອົບພະຍົບຊາວຊີຣີ ແລະ ຈາກຕາເວັນອອກກາງ ຫລັ່ງໄຫລກັນເຂົ້າສູ່ປະເທດສະໂລວັກແລ້ວ ເຖິງ 62,000 ຄົນ ແລະ ພຽງແຕ່ໃນມື້ວານນີ້ (25 ຕຸລາ) ມື້ດຽວເທົ່ານັ້ນ ແມ່ນມີຜູ້ອົບພະຍົບ ໄຫລບ່າເຂົ້າປະເທດສະໂລວັກ ເຖິງ 14,000 ຄົນ.
ທັງນີ້ ຜູ້ອົບພະຍົບນຳໃຊ້ເສັ້ນທາງ ຜ່ານປະເທດສະໂລວັກ ເພື່ອເຂົ້າສູ່ເອີຣົບ ໂດຍມີຈຸດມຸ່ງໝາຍໄປເລີ່ມຕົ້ນຊີວິດໃໝ່ ໃນປະເທດເຢຍລະມັນ, ຝຣັ່ງ ແລະ ອັງກິດ ທີ່ເປັນກຸ່ມປະເທດທີ່ມີສະຫວັດດີການສັງຄົມດີ.
