ການແຂ່ງຂັນຟຸດຊໍຊິງຂັນທ່ານເຈົ້າແຂວງອຸດົມໄຊສໍາເລັດແລ້ວ ເຊິ່ງເລີ່ມແຂ່ງຂັນມາແຕ່ວັນທີ 13-25 ຕຸລາ ນີ້, ທີ່ໂຮງຮຽນວິທະຍາໄລຣັດຕະນະບໍລິຫານທຸລະກິດສາຂາແຂວງອຸດົມໄຊເປັນເຈົ້າພາບຈັດຂື້ນເຊິງ ແບ່ງອອກເປັນສອງປະເພດຄື ປະເພດຊາວໜຸ່ມ ແລະ ປະເພດອາວຸໂສ, ຜ່ານການແຂ່ງຂັນປະເພດຊາວໜຸ່ມຊະນະເລີດໄດ້ແກ່ທິມໂຮງງານດິນຈີ່ເກດທະລາ, ຮອງຊະນະເລີດໄດ້ແກ່ທິມນ້ອຍຍອດປະສິດ, ປະເພດທີ 3 ທີມເພື່ອນເຮົາ ແລະ ປະເພດລາງວັນຊົມເຊີຍໄດ້ແກ່ທິມໂຮງຮຽນເຕັກນິກວິຊາຊີບ.
ສ່ວນປະເພດອາວຸໂສ ປະເພດຊະນະເລີດ ໄດ້ແກ່ທິມ ວິລະດາ, ຮອງຊະນະເລີດທິມໂຮງຮຽນວິທະຍາໄລຣັດຕະນະ, ປະເພດທີ 3 ທິມຈໍາປາລາວ ແລະ ປະເພດລາງວັນຊົມເຊີຍໄດ້ແກ່ທິມ ໂປລີໂອ. ສ່ວນປະເພດລາງວັນຊະນະເລີດແມ່ນໄດ້ຮັບຂັນ 1 ໜ່ວຍພ້ອມເງິນລາງວັນ 2 ລ້ານກີບ, ຮອງຊະນະເລີດໄດ້ຮັບເງິນລາງວັນ 1ລ້ານ 5 ແສນກີບ, ປະເພດທີ 3 ໄດ້ຮັບເງິນລາງວັນ 7 ແສນກີບ ແລະ ປະເພດລາງວັນຊົມເຊີຍໄດ້ຮັບເງິນ 3 ແສນກີບ.
ເປັນກຽດມອບລາງວັນທິມຊາວໜຸ່ມແຕ່ລະປະເພດໂດຍແມ່ນທ່ານເພັດສາຄອນ ຫຼວງອາໄພ ຮັກສາການເລຂາພັກແຂວງເຈົ້າແຂວງອຸດົມໄຊ, ສ່ວນປະເພດທິມອາວຸໂສໂດຍແມ່ນທ່ານໂອວາດ ຈັນທະວົງ ຄະນະປະຈໍາພັກແຂວງຫົວໜ້າພະແນກສຶກສາທິການ ແລະ ກິລາເປັນຜູ່ມອບ.
ໃນການແຂ່ງຂັນເທື່ອນີ້ມີທິມນັກກິລາມາຈາກພາກສ່ວນຕ່າງໆ ພາຍໃນແຂວງເຂົ້າຮ່ວມແຂ່ງຂັນທັງໝົດ 48 ທີມໃນນີ້ປະເພດຊາວໜຸ່ມມີ 40 ທີມ ເພື່ອສ້າງຂະບວນການຕ້ອນຮັບກອງປະຊຸມໃຫຍ່ຂອງອົງຄະນະພັກແຂວງອຸດົມໄຊ ຄັ້ງທີ VIII ແລະ ວັນຊາດທີ 2 ທັນວາ ທີ່ຈະມາເຖິງໃນມໍ່ໆນີ້ໃຫ້ມີບັນຍາກາດຟົດຟື້ນ.