ຂປລ. ບໍໍລິສັດ MMG LXML ເຊໂປນ (ໂຄງການບໍ່ຄໍາ-ທອງເຊໂປນ) ບັນລຸໄດ້ເປົ້າໝາຍ ການຜະລິດປະຈໍາໄຕມາດໃໝ່ ແລະ ສະຖິຕິການຜະລິດ ແຕ່ຕົ້ນປີ ເຖິງປັດຈຸບັນໃໝ່ ໃນໄຕມາດທີ 3 ຂອງປີ 2015 ທີ່ສືບເນື່ອງມາຈາກຜົນການຜະລິດ ແລະ ການດໍາເນີນງານທີ່ມີປະສິດທິຜົນ.
ໃນໄຕມາດທີ 3 ນີ້, ໂຄງການບໍ່ຄໍາ-ທອງເຊໂປນ ຜະລິດແຜ່ນທອງແດງ ໄດ້ 24,062 ໂຕນ, ສູງກວ່າການຜະລິດ ໃນໄຕມາດທີ່ຜ່ານມາ ເຖິງ 3% ແລະ 11% ເມື່ອທຽບກັບຜົນການຜະລິດ ໃນໄຕມາດດຽວກັນຂອງປີ 2014. ຜົນການຜະລິດແຜ່ນທອງ ແຕ່ຕົ້ນປີຈົນເຖິງປັດຈຸບັນ ແມ່ນ 68,694 ໂຕນ ເຊິ່ງສູງກວ່າ 7% ເມື່ອທຽບໃສ່ການຜະລິດ ໃນໄລຍະດຽວກັນ ຂອງປີ 2014.
ທ່ານ ຊູເຣັດ ວາດນາກຣາ, ຜູ້ຈັດການໃຫຍ່ ບໍ່ຄໍາ-ທອງ ເຊໂປນ ກ່າວວ່າ: ຜົນການຜະລິດ ໄດ້ສະແດງໃຫ້ເຫັນຄວາມສໍາຄັນ ໃນການປັບປຸງ ຊັບສິນທີ່ມີຢູ່ ກໍຄື ການປັບປຸງສາຍການຜະລິດ, ໂດຍສຸມໃສ່ການເພີ່ມ ປະສິດທິຜົນການດໍາເນີນງານ ຂອງໂຮງງານ, ການນໍາໃຊ້ຊັບສິນທີ່ມີ, ພວກເຮົາສາມາດ ເພີ່ມຜົນຜະລິດ ແລະ ປັບປຸງປະສິດທິພາບ ການຜະລິດໃນປັດຈຸບັນ. ການປັບປຸງດັ່ງກ່າວ ໄດ້ມີຄວາມໝາຍຄວາມສໍາຄັນສູງ ໃນໄລຍະປັດຈຸບັນ ທີ່ລາຄາທອງຕົກຕໍ່າ. ຂໍສະແດງຄວາມຊົມເຊີຍ ມາຍັງທີມງານ ຢູ່ໂຄງການ ບໍ່ຄໍາ-ທອງເຊໂປນ ສໍາລັບຄວາມມຸ້ງໝັ້ນ ແລະ ການເອົາໃຈໃສ່ເຮັດວຽກ ໃນການປັບປຸງເຫລົ່ານີ້ ເຊິ່ງໄດ້ຊ່ວຍໃຫ້ພວກເຮົາ ສາມາດຮັກສາ ຜົນການຜະລິດ ເຖິງແມ່ນວ່າ ຄຸນນະພາບສິນແຮ່ຈະຫລຸດລົງ ແລະ ເປັນສິນແຮ່ປະເພດ 2 ທີ່ມີເນື້ອແຂງກວ່າເກົ່າ.
ທ່ານ ຊູເຣັດ ກ່າວຕື່ມວ່າ: ພວກເຮົາຍັງສືບຕໍ່ທົບທວນໂອກາດ ໃນການປັບປຸງການຜະລິດ ໃນຂະນະທີ່ສິນແຮ່ມີຄຸນນະພາບຫລຸດລົງ ແລະ ພວກເຮົາ ກໍາລັງກ້າວຜ່ານ ແຜນງານຂອງໂຄງການ ບໍ່ຄໍາ-ທອງເຊໂປນ, ພ້ອມກັນນີ້ກໍມີ ແຜນງານການສໍາຫລວດ ແຮ່ທາດ ແບບມີຈຸດສຸມຢູ່ພື້ນທີ່ໃກ້ກັບບໍ່. ແຜນການຜະລິດ ສໍາລັບໂຄງການ ບໍ່ຄໍາ-ທອງ ເຊໂປນ ຍັງບໍ່ມີການປ່ຽນແປງ ແລະ ຄາດວ່າຈະຜະລິດແຜ່ນທອງແດງ ໃຫ້ໄດ້ 80.000-87.000 ໂຕນໃນປີ 2015.
ແຫລ່ງຂ່າວ:
