ຂ່າວ: ບຸນນິກ
ເຈົ້າຫນ້າທີ່ ປກສ ເມືອງໄຊທານີ ນະຄອນຫລວງວຽງຈັນ ໄດ້ເຂົ້າຈັບຕົວພໍ່ຄ້າຂາຍຢາບ້າຢູ່ຖຽງນາບ້ານຫົວຊຽງ ຊື່ທ້າວ ແກ້ວອຸດອນ ອາຍຸ 42 ປີ ປະຊາຊົນບ້ານໂຄກສະຫວ່າງໃນວັນທີ 18 ພະຈິກ 2013 ເວລາ 11:30 ໂມງ.
ທ່ານ ຮ້ອຍເອກ ວັນເຮືອງ ພັນທະວົງໄຊ ຫົວຫນ້າ ປກສ ກຸ່ມບ້ານຫົວຊຽງ ໃຫ້ຮູ້ວ່າ: ຫລັງຈາກໄດ້ຮັບແຈ້ງຈາກພົນລະເມືອງດີຄົນຫນຶ່ງ ທາງເຈົ້າຫນ້າທີ່ກໍ່ໄດ້ລົງຕິດຕາມພຶດຕິກຳຜູ້ກ່ຽວຢູ່ໄລຍະ ຫນຶ່ງເຫັນວ່າມີມູນຄວາມຈິງ ຈາກນັ້ນຈິ່ງນຳກຳລັງໄປຈັບຕົວ ໃນຂະນະທີ່ ຜູ້ກ່ຽວຈະຕິດຈັກລົດກຳລັງອອກໄປນອກບັງເອີ້ນທາງເຈົ້າຫນ້າທີ່ ຈັບຕົວໄວ້ກ່ອນ ແລະ ສອບຖາມຜູ້ກ່ຽວວ່າ: ຢາບ້າເຊື່ອງໄວໃສ? ເບື້ອງຕົ້ນຜູ້ກ່ຽວປະຕິເສດວ່າບໍ່ມີແຕ່ທາງເຈົ້າຫນ້າທີ່ບໍ່ປັກ ໃຈເຊື່ອ ແລະ ຖາມຕໍ່ໄປວ່າ: ຢູ່ປ່າກ້ວຍເດມີບໍ່ພໍໄດ້ຍິນຄຳຖາມດັ່ງກ່າວ ກໍ່ເຫັນສີຫນ້າຜູ້ກ່ຽວຈືດລົງທັນທີ ຈາກນັ້ນ ຈິ່ງນຳຕົວຜູ້ກ່ຽວໄປຊອກຄົ້ນຢູ່ປ່າກ້ວຍຂ້າງຖຽງນາ ຫລັງຈາກທຳການກວດຄົ້ນດົນເຕີບທາງເຈົ້າຫນ້າທີ່ໄດ້ເຫັນເກີບໂບກ ທີ່ຖິ້ມຢູ່ປ່າກ້ວຍ 3 ຄູ່ທັງເກົ່າ ແລະ ໃຫມ່ທາງເຈົ້າຫນ້າທີ່ຈິ່ງໄດ້ໄປຈັບມາເບິ່ງ ກໍ່ໄດ້ພົບຢາບ້າ 1 ຖົງ ຕົກອອກມາ ຈາກນັ້ນ ຈິ່ງມີຖົງທີ 2 ທີ 3 ແລະ 4 ຕົກອອກມາ ແລະ ມານັບເບິ່ງມີຈຳນວນ 642 ເມັດ ເມື່ອພົບເຫັນຂອງກາງຈິ່ງນຳຕົວຜູ້ກ່ຽວມາໄວ້ທີ່ຫ້ອງການ ປກສ ກຸ່ມບ້ານ.
ຜ່ານການສືບສວນສອບສວນ ໃນເບື້ອງຕົ້ນຮູ້ວ່າ: ຜູ້ກ່ຽວຊື່ທ້າວ ແກ້ວອຸດອນ ອາຍຸ 42 ປີ ປະຊາຊົນ ບ້ານໂຄກສະຫວ່າງເມືອງໄຊທານີ ນະຄອນຫລວງວຽງຈັນ ຜູ້ກ່ຽວແມ່ນມາຮັກມັກກັບຜູ້ສາວເຈົ້າຂອງຖຽງນາ ໃນນາມຊູ້ສາວ ແລະ ໄດ້ຮັບສາລະພາບວ່າ:ຢາບ້າທີ່ພົບແມ່ນຂອງຕົນແທ້, ຕົນໄປໂທສັ່ງຊື້ມາແລ້ວຂາຍບໍ່ໄດ້ຍ້ອນລູກຄ້າຕິວ່າຢາບໍ່ມີຄຸນ ນະພາບຕົນຈິ່ງເອົາເຊື່ອງໄວ້ປ່າກ້ວຍ ແລະ ໄດ້ນຳຢາອອກມາຈ້າງໄວຮຸ່ນກ່ຽວເຂົ້າໃຫ້, ສ່ວນເງິນທີ່ໄດ້ມາຈາກການຊື້ຂາຍຢາແມ່ນໄປໃຊ້ຈ່າຍຫມົດ ປະຈຸບັນຄະດີດັ່ງກ່າວທາງ ປກສ ກຸ່ມບ້ານສົ່ງໃຫ້ ປກສ ເມືອງໄຊທານີ ດຳເນີນຄະດີຕາມຂັ້ນຕອນຂອງລະບຽບກົດຫມາຍ.
ຂ່າວຈາກ: ໜັງສືພິມ ເສດຖະກິດ ສັງຄົມ