ສຳນັກຂ່າວຕ່າງປະເທດ ລາຍງານໃນວັນທີ 21 ຕຸລານີ້ວ່າ ທ່ານ ຈັສຕິນ ທຣູໂດ ວ່າທີ່ນາຍົກລັດຖະມົນຕີຄົນໃໝ່ຂອງການາດາ ໄດ້ປະກາດຈະຖອນກຳລັງ ຝູງເຮືອບິນຂັບໄລ່ CF-18 ທີ່ຖືກສົ່ງໄປໂຈມຕີກຸ່ມຕິດອາວຸດລັດອິດສະລາມ ຫລື ໄອເອັສ ໃນປະເທດອີຣັກ ແລະ ຊີຣີ ຮ່ວມກັບສະຫະລັດອາເມຣິກາ ແລະ ຊາດພັນທະມິດ ເພື່ອກັບຄືນປະເທດ ໂດຍມີກຳນົດສິ້ນສຸດພາລະກິດໃນເດືອນມີນາປີ 2016.
ທັງນີ້ ການຕັດສິນໃຈດັ່ງກ່າວ ເກີດຂຶ້ນພາຍຫລັງທ່ານ ທຣູໂດ ໄດ້ຮັບໄຊຊະນະຈາກການເລືອກຕັ້ງພຽງບໍ່ພໍເທົ່າໃດຊົ່ວໂມງ, ແນວໃດກໍຕາມ ແຫລ່ງຂ່າວໄດ້ລະບຸວ່າ ທ່ານ ທຣູໂດ ຍັງຈະສືບຕໍ່ຮັກສາທະຫານການາດາບາງສ່ວນ ໄວ້ໃນປະເທດອີຣັກ ເພື່ອຊ່ວຍໃນພາລະກິດເຝິກອົບຮົມ ໃຫ້ແກ່ກອງທັບອີຣັກ.
