ສຳນັກຂ່າວຕ່າງປະເທດ ລາຍງານໃນວັນທີ 20 ຕຸລານີ້ວ່າ ທ່ານ ວານ ຈູໄນດີ ຕວນກູ ຈາອາຟາ ລັດຖະມົນຕີວ່າການ ກະຊວງສິ່ງແວດລ້ອມ ແລະ ພະລັງງານທຳມະຊາດ ມາເລເຊຍ ໄດ້ອອກມາເປີດເຜີຍໃນມື້ວານນີ້ (19 ຕຸລາ) ວ່າ ບັນຫາໝອກຄວັນໄຟປ່າໃນອິນໂດເນເຊຍ ອາດເບົາບາງລົງໃນໄລຍະໜ້າຝົນ ກາງເດືອນພະຈິກນີ້ ຫລັງຈາກທີ່ລັດຖະບານມາເລເຊຍ ໄດ້ປະກາດປິດການຮຽນການສອນ ຢູ່ຕາມໂຮງຮຽນຕ່າງໆ ໃນຫລາຍພື້ນທີ່ຂອງມາເລເຊຍ ເພື່ອຫລີກລ່ຽງສະພາບອາກາດທີ່ເປັນມົນລະພິດ.
ດ້ານທ່ານ ເຮີຣີ ປຣຸໂນໂມ ນັກວິທະຍາສາດປະຈຳສູນວິໄຈປ່າໄມ້ສາກົນ ໃນປະເທດອິນໂດເນເຊຍ ໄດ້ອອກມາເຕືອນວ່າ ວິກິດການໝອກຄວັນໄຟປ່າ ທີ່ເກີດຂຶ້ນໃນປີນີ້ ອາດແກ່ຍາວໄປເຖິງເດືອນທັນວາ ຫລື ເດືອນມັງກອນປີໜ້າ ເພາະປະຊາຊົນ ຂະຫຍາຍພື້ນທີ່ປູກປາມນ້ຳມັນເພີ່ມຂຶ້ນ ຢູ່ເຂດເກາະປາປົວ, ເກາະສຸມາດຕຣາຕອນໃຕ້, ເກາະກາລິມັນຕັນຕອນກາງ ແລະ ເກາະສຸລາເວສີ.