ສຳນັກຂ່າວຕ່າງປະເທດ ລາຍງານໃນວັນທີ 15  ຕຸລາຜ່ານມານີ້ວ່າ ລັດຖະບານມຽນມາ ພາຍໃຕ້ການນຳຂອງປະທານາທິບໍດີເທັນເຊັນ ໄດ້ມີພິທີລົງນາມຂໍ້ຕົກລົງຢຸດຍິງ ກັບກຸ່ມຕິດອາວຸດຊົນເຜົາສ່ວນໜ້ອຍ 8 ກຸ່ມ ທີ່ນະຄອນຫລວງເນປິດໍ ຫລັງຈາກທີ່ມີການເປີດເສິກສູ້ຮົບ ກັບກອງທັບລັດຖະບານມາເປັນເວລາ 70 ປີ ແລະ ຜ່ານການເຈລະຈາເພື່ອຢຸດຍິງດັ່ງກ່າວນີ້ດົນເຖິງ 2 ປີ ເພື່ອເປີດທາງໃຫ້ແກ່ການເລືອກຕັ້ງທົ່ວໄປ ຄັ້ງປະຫວັດສາດຂອງມຽນມາ ທີ່ຈະມີຂຶ້ນໃນວັນທີ 8 ພະຈິກນີ້.

ກຸ່ມຕິດອາວຸດ 8 ກຸ່ມທີ່ເຂົ້າຮ່ວມລົງນາມໃນຂໍ້ຕົກລົງຢຸດຍິງດັ່ງກ່າວ ແມ່ນປະກອບດ້ວຍ: ກອງທັບປົດປ່ອຍແຫ່ງຊາດກະຫລ່ຽງ (KNLA), ພັກປົດປ່ອຍອະຣາກັນ, ແນວໂຮມແຫ່ງຊາດຊິນ (CNF), ອົງການປົດປ່ອຍແຫ່ງຊາດປະໂອ, ກອງທັບກະຫລ່ຽງເມດຕາປະຊາທິປະໄຕ, ແນວໂຮມປະຊາທິປະໄຕນັກສຶກສາທົ່ວປະເທດມຽນມາ, ກຸ່ມສະພາຟື້ນຟູແຫ່ງລັດສານ ແລະ ສະຫະພາບແຫ່ງຊາດກະຫລ່ຽງ (KNU).