ຂປລ. ດ່ານພາສີສາກົນນາເພົ້າ ແຂວງຄຳມ່ວນ ແມ່ນດ່ານໜຶ່ງທີ່ມີບົດບາດສຳຄັນ ທາງດ້ານການຄ້າຊາຍແດນ ລະຫວ່າງ ສປປ ລາວ ແລະ ສສ ຫວຽດນາມ ເນື່ອງຈາກເສັ້ນທາງ ການເຊື່ອມຕໍ່ ຈາກແຂວງຄຳມ່ວນຫາແຂວງຮາຕິ່ງ ໄປສູ່ທະເລມີໄລຍະທາງໃກ້ສຸດ ຖ້າທຽບໃສ່ບັນດາ ເສັ້ນທາງຜ່ານອື່ນໆ ເຊິ່ງໃນ 1 ປີຜ່ານມາ ມີມູນຄ່າສິນຄ້າ ຜ່ານແດນ 56,63 ຕື້ກວ່າກີບ, ຕາມແຜນການແມ່ນ 120 ຕື້ກີບ.
ທ່ານ ພູເມືອງແກ້ວ ຈັນທະລາ ຫົວໜ້າດ່ານພາສີສາກົນນາເພົ້າ ໄດ້ລາຍງານໃຫ້ຮູ້ວ່າ: ການຈັດເກັບລາຍຮັບບໍ່ໄດ້ຕາມແຜນ ກໍຍ້ອນ 54 ບໍລິສັດທີ່ເຄື່ອນໄຫວ ແມ່ນຖືກຍົກເວັ້ນ, ລວມມູນຄ່າຍົກເວັ້ນພາສີ 95 ຕື້ກວ່າກີບໃນນີ້ ສະເພາະແຮ່ທາດ ແລະ ເກືອກາລີແມ່ນ 80 ຕື້ ກວ່າກີບ, ການນຳເຂົ້ານ້ຳມັນເຊື້ອໄຟ ຫລຸດລົງ 55,77% ທຽບໃສ່ສົກປີ 2013-2014 ແລະ ການນຳເຂົ້າພາຫະນະຫລຸດລົງ 82,55%. ອີກສາເຫດໜຶ່ງແມ່ນ ສະຖານທີ່ ຫລື ຫ້ອງການແມ່ນ ຍັງບໍ່ທັນສຳເລັດ, ຂອດການບໍລິການ ແມ່ນຍັງມີຄວາມຫຍຸ້ງຍາກເຮັດໃຫ້ ມີຄວາມຊັກຊ້າ ຈຶ່ງເປັນອີກທາງເລືອກໜຶ່ງ ຂອງຜູ້ໃຊ້ບໍລິການ.
ຫົວໜ້າດ່ານພາສີສາກົນນາເພົ້າໃຫ້ຮູ້ຕື່ມວ່າ: ສະເພາະການກະກຽມຄວາມພ້ອມ ໃນການເຂົ້າເປັນປະຊາຄົມ ເສດຖະກິດອາຊຽນ ຫລື AEC ແມ່ນໄດ້ຈັດວາງ ພະນັກງານວິຊາການ ໃນແຕ່ລະຈຸງານໃຫ້ຮັດແໜ້ນຂຶ້ນ ຕື່ມທາງລະບຽບກົດໝາຍ, ຄວາມຮູ້ຄວາມສາມາດ ແລະ ຂອດການບໍລິການເພື່ອຮອງຮັບ ທາງດ້ານ ການຈໍລະຈອນສິນຄ້າ ທີ່ເຊື່ອມໂຍງກັບປະເທດອື່ນໆ ໃນອາຊຽນໃຫ້ຫລາຍຂຶ້ນ. ສະເພາະສົກປີ 2015-2016 ແຜນການສູ້ຊົນຈັດເກັບລາຍຮັບມີ 76 ຕື້ກວ່າກີບ ໃນນັ້ນລາຍຮັບຈາກພາສີ 46 ຕື້ກວ່າກີບ ແລະ ລາຍຮັບຈາກອາກອນ ຂາເຂົ້າ 30 ຕື້ກີບ.
ແຫລ່ງຂ່າວ:
