ການແຂ່ງຂັນບານເຕະໂລກ 2018 ຮອບຄັກເລືອກໂຊນອາຊີກຸ່ມເອຟ ນັດທີ 4 ເຊີ່ງເປັນນັດສຳຄັນຂອງທັງສອງທີມລະຫວ່າງທີມຊາດຫວຽດນາມພົບກັບທີມຊາດໄທທີ່ສະໜາມມິດິງ ນະຄອນຫຼວງຮ່າໂນ້ຍ ປະເທດຫວຽດນາມ.
ເລີ່ມການແຂ່ງຂັນທັງສອງທີມຍັງບໍ່ເປີດເກມບຸກໃສ່ກັນເທົ່າທີ່ຄວນ ແຕ່ຮູບເກມຂອງທີມໄທດີກວ່າເລັກນ້ອຍ ຊອກຫາໂອກາດຍິງປະຕູໄດ້ຫຼາຍຈັງຫວະ ຈົນໃນທີ່ສຸດກໍປະສົບຜົນສຳເລັດໃນນາທີທີ 29 ຈາກຈັງຫວະທີ່ ທີລະສິນ ແດງດາ ສົ່ງບານເຂົ້າກາງໃຫ້ ເກີກຣິດ ທະວີການ ແຕ່ງບານເຂົ້າຊ້າຍ ກ່ອນຕັດສິນໃຈຍິງໄລຍະກວ່າ 27 ແມັດ ບານພຸ່ງແຮງສຽບສາມຫຼ່ຽມເຂົ້າປະຕູແບບສວຍງາມ ກ່ອນຈົບເຄິ່ງເວລາທຳອິດດ້ວຍຄະແນນ 0-1.
ເຄິ່ງເວລາທີສອງເກມຂອງຫວຽດນາມຍັງບໍ່ດີຂຶ້ນ ໂດຍເປີດໂອກາດໃຫ້ທີມໄທຄອງບານແລະສ້າງສັນເກມໄດ້ດີກວ່າ ຈົນມາເຖິງນາທີທີ 56 ໄທໜີຫ່າງເປັນ 2-0 ຈາກຈັງຫວະທີ່ເກີກຣິດ ທະວີການ ໄດ້ບານທ້າຍເສັ້ນດ້ານຊ້າຍ ກ່ອນຫຼຸດເຂົ້າມາໃນເຂດໂທດ ຕັດສິນໃຈເປີດເຂົ້າກາງແຕ່ກອງຫຼັງຂອງຫວຽດນາມສະກັດພາດເຂົ້າປະຕູຕົວເອງ.
ຫຼັງຈາກນັ້ນ ຍັງເປັນທີມໄທທີ່ດີກວ່າ ມາໄດ້ປະຕູອີກເປັນ 3-0 ຈາກຈັງຫວະຕໍ່ບານກັນໜ້າຂອບເຂດໂທດຂອງຫວຽດນາມ ກ່ອນຈະເປັນ ສີຣາທອນ ບຸນມາທັນ ໄດ້ບານໃນເຂດໂທ ແຕ່ງເຂົ້າຊ້າຍ ຍິງຜ່ານຜູ້ຮັກສາປະຕູຫວຽດນາມເຂົ້າໄປ.
ຈາກນັ້ນ ທັງສອງທີມກໍ່ເຮັດຫຍັງກັນບໍ່ໄດ້ ຈົບ 90 ນາທີ ທີມຊາດໄທບຸກມາຊະນະຫວຽດນາມ 3-0 ໄດ້ອີກ 3 ຄະແນນຂຶ້ນເປັນທີມນຳຂອງກຸ່ມເອຟ ແຂ່ງ 4 ນັດຊະນະ 3 ສະເໝີ 1 ມີ 10 ຄະແນນ ສ່ວນຫວຽດນາມແຂ່ງ 4 ນັດ ຊະນະ 1 ສະເໝີ 1 ເສຍ 2 ມີ 4 ຄະແນນຢູ່ອັນດັບທີ 3.
ຂ່າວແລະພາບຈາກ: ໜັງສືພິມເສດຖະກິດ-ສັງຄົມ