ຂປລ. ປັດຈຸບັນ ໂຄງການສວນສາທາລະນະນໍ້າຫງຳ ເມືອງແປກ ແຂວງຊຽງຂວາງ ມີຄວາມຄືບໜ້າ 60 ສ່ວນຮ້ອຍ, ພາຍຫລັງໄດ້ລົງມືບຸກເບີກ ແລະ ກໍ່ສ້າງມາແຕ່ປີ 2013 ເປັນຕົ້ນມາ, ຄາດວ່າຈະໃຫ້ສຳເລັດກ່ອນ ງານມະຫາກຳກິລາແຫ່ງຊາດ ຄັ້ງທີ 11 ແຂວງຊຽງຂວາງ ຈະເປັນເຈົ້າພາບໃນປີ 2017.
ທ່ານ ເກດຕິສັກ ພັກວິເສດ ປະທານບໍລິສັດ ພັດທະນາກໍ່ສ້າງສີບຸນເຮືອງ ຈຳກັດ ຜູ້ອອກແບບ ຮັບເໝົາກໍ່ສ້າງ ເປີຍເຜີຍໃຫ້ຮູ້ເມື່ອມໍ່ໆມານີ້ວ່າ: ສວນແຫ່ງນີ້ ມີເນື້ອທີ່ທັງໝົດ 17,5 ເຮັກຕາ ໂດຍບໍລິສັດເປັນຜູ້ລົງທຶນກ່ອນ 100% ໃນມູນຄ່າ 135 ຕື້ກີບ ຫລື ປະມານ 17 ລ້ານກວ່າໂດລາ, ການກໍ່ສ້າງໄດ້ແບ່ງອອກເປັນແຕ່ລະໜ້າວຽກທີ່ລະອຽດເປັນຕົ້ນ ການກໍ່ສ້າງເສັ້ນທາງອ້ອມຮອບ, ຄູກັນນ້ຳ, ປະຕູເປີດ-ປິດນ້ຳ, ອ່າງເກັບກັກນ້ຳ, ສວນນ້ຳພຸ, ສວນດອກໄມ້-ປູກຫຍ້າ, ຫາດຊາຍ, ມີດອກໄຟເຍືອງທາງ, ຫ້ອງການ ແລະ ອື່ນໆ ມາຮອດປັດຈຸບັນ ການກໍ່ສ້າງແມ່ນມີຄວາມຄືບໜ້າປະມານ 60% ຄາດວ່າຈະໃຫ້ສຳເລັດກ່ອນງານມະຫາກຳກິລາແຫ່ງຊາດຄັ້ງທີ 11.
ພາຍ ຫລັງ ໂຄງການດັ່ງກ່າວສຳເລັດ ຈະກາຍເປັນສະຖານທີ່ທີ່ສວຍງາມທີ່ສຸດ ແລະ ບ່ອນທ່ອງທ່ຽວ, ບ່ອນພັກຜ່ອນ ອອກກຳລັງກາຍ ຂອງພໍ່ແມ່ປະຊາຊົນບັນດາເຜົ່າ ກໍຄືບັນດານັກທ່ອງທ່ຽວ ທີ່ເຂົ້າມາຢ້ຽມຢາມ ໂດຍສະເພາະແມ່ນເພື່ອຕ້ອນຮັບແຂກ ທີ່ຈະມາຮ່ວມງານມະຫາກຳກິລາແຫ່ງຊາດ ຄັ້ງທີ 11 ທີ່ແຂວງຊຽງຂວາງ ຈະໄດ້ຮັບກຽດເປັນເຈົ້າພາບໃນປີ 2017.
ແຫລ່ງຂ່າວ:
