ສຳນັກຂ່າວຕ່າງປະເທດ ລາຍງານໃນວັນທີ 11 ຕຸລາຜ່ານມານີ້ວ່າ ອີຣ່ານປະສົບຜົນສຳເລັດໃນການທົດສອບລູກສອນໄຟໄລຍະໄກລຸ້ນໃໝ່ທີ່ຜະລິດເອງ ໂດຍກະຊວງປ້ອງກັນປະເທດອີຣ່ານໄດ້ເຜີຍແຜ່ພາບການທົດສອບລູກສອນໄຟອິໝັດ (Imad) ຊຶ່ງເປັນລູກສອນໄຟໄລຍະໄກລຸ້ນທຳອິດຂອງອີຣ່ານ ທີ່ສາມາດກຳນົດທິດທາງ ແລະ ຄວບຄຸມໄດ້ ຈົນກວ່າຈະຖືກເປົ້າໝາຍຂອງການໂຈມຕີ.
ທັງນີ້ ທາງການອີຣ່ານໄດ້ອອກມາຢືນຢັນວ່າ ລູກສອນໄຟດັ່ງກ່າວນີ້ຈະບໍ່ຖືກນຳໃຊ້ເພື່ອຕິດຕັ້ງຫົວຮົບນິວເຄລຍຢ່າງເດັດຂາດ ເນື່ອງຈາກອີຣ່ານບໍ່ມີແຜນພັດທະນາອາວຸດນິວເຄລຍ ຕາມຂໍ້ຕົກລົງທີ່ໄດ້ເຊັນກັນກັບອັງກິດ, ຈີນ, ຝຣັ່ງ, ເຢຍລະມັນ, ຣັດເຊຍ ແລະ ສະຫະລັດອາເມຣິກາ ເພື່ອແລກກັບການຍົກເລີກມາດຕະການຂວ້ຳບາດຂອງປະເທດຕາເວັນຕົກ.
