ສຳນັກຂ່າວຕ່າງປະເທດ ລາຍງານໃນວັນທີ 9 ຕຸລານີ້ວ່າ ກະຊວງປ້ອງກັນປະເທດຣັດເຊຍ ໄດ້ອອກມາປະຕິເສດເພື່ອຕອບໂຕ້ຄຳກ່າວອ້າງຂອງເຈົ້າໜ້າທີ່ສະຫະລັດອາເມຣິກາລາຍໜຶ່ງ ທີ່ໄດ້ອອກມາໃຫ້ສຳພາດກັບສື່ມວນຊົນໃນມື້ວານນີ້ (8 ຕຸລາ) ວ່າ ມີລູກສອນໄຟທີ່ກອງທັບຣັດເຊຍຍິງຈາກເຮືອກ່ຳປັ່ນສູ້ຮົບໃນທະເລແຄສປຽນ ເພື່ອຖະຫລົ່ມກຸ່ມໄອເອັສໃນຊີຣີນັ້ນ ຜິດພາດຕົກລົງໃນພື້ນທີ່ປະເທດອີຣ່ານ ຈຳນວນ 4 ລູກ ໂດຍທ່ານ ອິກໍ ໂຄນາເຊັນຄອບ ໂຄສົກກອງທັບຣັດເຊຍໄດ້ອອກມາຕອບໂຕ້ວ່າ ລະຫວ່າງປະຕິບັດການດັ່ງກ່າວນີ້ ຣັດເຊຍໄດ້ກຳນົດເປົ້າໝາຍກ່ອນ ແລະ ຫລັງການຕົກຢູ່ສະເໝີ ຊຶ່ງລູກສອນໄຟທີ່ພວກເຮົາຍິງໄປນັ້ນ ແມ່ນຖືກເປົ້າໝາຍທຸກລູກ.
ທັງນີ້ ການກ່າວອ້າງຂອງເຈົ້າໜ້າທີ່ສະຫະລັດອາເມຣິກາຕໍ່ບັນຫາດັ່ງກ່າວ ແມ່ນບໍ່ໄດ້ໃຫ້ລາຍລະອຽດວ່າ ລູກສອນໄຟຕົກຢູ່ບໍລິເວນໃດ ຫລື ສ້າງຄວາມເສຍຫາຍຄືແນວໃດແດ່ ຊຶ່ງພຽງແຕ່ອອກມາອ້າງລອຍໆວ່າ ລູກສອນໄຟຂອງຣັດເຊຍທີ່ຍິງຈາກເຮືອກ່ຳປັ່ນສູ້ຮົບໃນທະເລແຄສປຽນຕົກໃນອີ່ຣ່ານ.
ສະຫະລັດອາເມຣິກາ ແລະ ກຸ່ມພັນທະມິດ ແມ່ນມີທັດສະນະຕໍ່ກັບການແກ້ໄຂບັນຫາຢູ່ຊີຣີທີ່ແຕກຕ່າງກັນກັບຣັດເຊຍ ໂດຍຖືວ່າປະທານາທິບໍດີ ອັດຊາດ ແຫ່ງຊີຣີ ເປັນຜູ້ນຳທີ່ຜະເດັດການຊຶ່ງຈະຕ້ອງລົງອອກຈາກອຳນາດ ພາຍຫລັງສົງຄາມຢຸດຕິລົງ, ແຕກຕ່າງກັບທັດສະນະຂອງຣັດເຊຍ ທີ່ໄດ້ໃຫ້ການສະໜັບສະໜູນລັດຖະບານຊີຣີ ພາຍໃຕ້ການນຳຂອງປະທານາທິບໍດີອັດຊາດ ເພາະເຊື່ອວ່າລັດຖະບານຂອງທ່ານອັດຊາດ ຄວນເປັນສູນກາງຂອງການຮ່ວມມືສາກົນ ໃນການຕໍ່ສູ້ຕ້ານຢັນກັບກຸ່ມລັດອິດສະລາມ ຫລື ໄອເອັສ.