ຂປລ. ກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ສປປ ລາວ ຢືນຢັນ ໃນວັນທີ 8 ຕຸຸລາ 2015 ນີ້ວ່າ: ນັບແຕ່ປີ 1990 ເຖິງທ້າຍປີ 2014 ໄດ້ກວດພົບຜູ້ທີ່ຕິດເຊື້ອ (HIV) 7.072 ຄົນ ໃນຈໍານວນ 17 ແຂວງ ທົ່ວປະເທດ, ໃນນັ້ນ ມີຜູ້ທີ່ເປັນພະຍາດເອດ 4.339 ຄົນ, ເສຍຊີວິດແລ້ວ 1.659 ຄົນ. ນີ້ແມ່ນການເປີດເຜີຍ ຂອງທ່ານ ດຣ. ສິສະຫວາດ ສຸດທານີລະໄຊ ຮອງ ຫົວໜ້າກົມ ຄວບຄຸມພະຍາດຕິດຕໍ່ ກະຊວງສາທາລະນະສຸກ ກ່າວຕໍ່ກອງປະຊຸມກ່ຽວກັບ ວຽກງານຕ້ານເອດ, ເພື່ອສ້າງຂະບວນການ ໃນວັນສາກົນຕ້ານເອດ ວັນທີ 1 ທັນວາ ທີ່ຈະມາເຖິງນີ້.
ທ່ານດຣ. ສິສະຫວາດ ສຸດທານີລະໄຊ ກ່າວຕື່ມວ່າ: ຕົວເລກດັ່ງກ່າວ ຖ້າທຽບໃສ່ບັນດາປະເທດ ໃນອາຊຽນ ສປປ ລາວ ຖືວ່າອັດຕາການຕິດເຊື້ອ (HIV) ຍັງຢູ່ໃນລະດັບຕໍ່າ, ແຕ່ການຕິດເຊື້ອ (HIV) ໃນແຕ່ລະປີ ຍັງມີທ່າອ່ຽງເພີ່ມຂຶ້ນ, ພ້ອມກັນນີ້ ປະ ເທດເຮົາຍັງມີສິ່ງທ້າທາຍຫລາຍຢ່າງ ໂດຍສະເພາະ ການເຄື່ອນຍ້າຍແຮງງານ ໃນໂຄງການລົງທຶນຕ່າງໆ ເຊັ່ນ: ໂຄງການກໍ່ສ້າງຂົວທາງ, ການຂຸດຄົ້ນບໍ່ແຮ່ ແລະ ໂຄງການຜະລິດກະສິກໍາ ຖ້າບໍ່ມີມາດຕະການປ້ອງກັນແລ້ວ ຈະເຮັດໃຫ້ເຊື້ອ (HIV) ລະບາດໃນອະນາຄົດ.
ໃນທາງກົງກັນຂ້າມ ຄວາມຮູ້ຄວາມເຂົ້າໃຈກ່ຽວກັບ ພະຍາດ (HIV) ຂອງປະຊາຊົນລາວບັນດາເຜົ່າ ທີ່ຢູ່ຫ່າງໄກສອກຫລີກ ຍັງບໍ່ທັນເລິກເຊິ່ງ ແລະ ບໍ່ສາມາດ ຈະປ້ອງກັນຕົນເອງໄດ້, ເນື່ອງຈາກວ່າ ຂໍ້ມູນຂ່າວສານກ່ຽວກັບເຊື້ອ (HIV) ແລະ ພະຍາດ ເອດ ຍັງບໍ່ທັນໄປທົ່ວເຖິງກຸ່ມຄົນດັ່ງກ່າວ, ການໂຄສະນາວຽກງານຕ້ານເອດ ຍັງບໍ່ທັນກ້ວາງຂວາງເປັນຕົ້ນ ຂັ້ນເມືອງ ແລະ ສຸກສາລາ ພະນັກງານຍັງບໍ່ທັນພຽງພໍ, ງົບປະມານໃນການເຄື່ອນໄຫວ ໂຄສະນາຍັງຂາດເຂີນ, ສື່ໂຄສະນາ ຍັງບໍ່ທັນພຽງພໍ ກັບຄວາມຕ້ອງການ. ສະນັ້ນ, ການຕ້ານພະຍາດເອດ ເປັນໜ້າທີ່ໃຫຍ່ຫລວງ, ໜັກໜ່ວງ ແລະ ກາຍ ເປັນພາລະໜ້າທີ່ ຂອງທົ່ວສັງຄົມ, ຂອງແຕ່ລະຄົນຕ້ອງໄດ້ສຸມ ທຸກກໍາລັງເພື່ອຈຳກັດ, ສະກັດກັ້ນພະຍາດດັ່ງກ່າວ ໃຫ້ຢູ່ລະດັບຕໍ່າ, ແລະ ໃຫ້ຫລຸດຜ່ອນອັດຕາທີ່ໜ້ອຍລົງ.
ແຫລ່ງຂ່າວ:
