ໃນວັນທີ 8 ຕຸລານີ້, ຢູ່ສຳນັກງານສະຫະພາບເອີຣົບ ປະຈຳລາວ ທ່ານ ມີແຊນ ໂກແຟັງ ອຸປະທູດສະຫະພາບເອີຣົບ ປະຈຳລາວ ໄດ້ຖະແຫລງກ່ຽວກັບວັນສາກົນເພື່ອຢຸດຕິການລົງໂທດປະຫານຊີວິດ ຄົບຮອບ 13 ປີວ່າ: ການຍົກເລີກໂທດປະຫານ ຊີວິດຂອງບັນດາປະເທດໃນທົ່ວໂລກເປັນອີກເງື່ອນໄຂໜຶ່ງສຳລັບປະເທດທີ່ຈະເຂົ້າເປັນສະມາຊິກອີຢູ, ທັງເປັນໜຶ່ງໃນບັນດາເປົ້າໝາຍສຳຄັນຂອງນະໂຍບາຍການຕ່າງປະເທດອີຢູນຳອີກ, ໂດຍສະເພາະ ໃນ ສປປ ລາວການນຳໃຊ້ໂທດປະຫານຊີວິດ ແມ່ນຍັງບໍ່ທັນມີການຢຸດຕິຢ່າງເປັນທາງການເທື່ອ ແຕ່ເຫັນວ່າລາວໄດ້ນຳໃຊ້ໃນກໍລະນີອື່ນແທນ ແລະ ການຕັດສິນໂທດປະຫານຊີວິດນັກໂທດໃນຄະດີຕ່າງໆນັ້ນສະເລ່ຍແລ້ວ ປະມານ 20 ຄົນ/ປີ, ເຫັນວ່າມີຈຳນວນຫລາຍພໍສົມຄວນ. ໃນຂະນະດຽວກັນອີຢູຍັງ ໄດ້ຮຽກຮ້ອງໃຫ້ບັນດາປະເທດໃນທົ່ວໂລກ ໄດ້ທົບທວນຄືນນິຕິກຳຕ່າງໆ ເພື່ອຢຸດຕິການນຳໃຊ້ໂທດປະຫານຊີວິດຢ່າງເປັນທາງການ, ແຕ່ກໍບໍ່ສາມາດຫລີກລ້ຽງໄດ້ເຊັ່ນດຽວກັນ ຍ້ອນວ່າການນຳໃຊ້ໂທດດັ່ງກ່າວ ກໍເປັນອີກທາງເລືອກໜຶ່ງໃນການຕັດສິນນັກໂທດຂັ້ນເດັດຂາດ, ແຕ່ຄວນໃຫ້ຄວາມກະຈ່າງແຈ້ງ ແລະ ລະບຸປະເພດຄະດີຕ່າງໆທີ່ຄວນຖືກຕັດສິນໃຫ້ຈະແຈ້ງຂຶ້ນກວ່າເກົ່າ, ພ້ອມນີ້ ທ່ານ ທູດຍັງກ່າວຕື່ມວ່າ: ໃນບັນດາປະເທດທີ່ຍັງມີການນຳໃຊ້ໂທດປະຫານຊີວິດຢູ່ນັ້ນຍັງມີຫລາຍ, ແຕ່ຄວນຫັນມານຳໃຊ້ໃນຂອບເຂດທີ່ຈຳກັດໃຫ້ຫລາຍຂຶ້ນ ເພື່ອກ້າວໄປສູ່ການຢຸດຕິນໍາໃຊ້ໂທດປະຫານຊີວິດ.
ທີ່ມາ ໜັງສືພິມລາວພັດທະນາ
