ພາບສີຫລ້າສຸດຂອງດາວພູໂຕທີ່ນາຊ່ານຳມາເປີດເຜີຍ ສະແດງໃຫ້ເຫັນຊັ້ນບັນຍາກາດສີຟ້າທີ່ປົກຄຸມຜິວດາວ ສຸກທີ່ 9 ຕຸລາ ສຳນັກຂ່າວຕ່າງປະເທດລາຍງານຈາກນະຄອນຫລວງວໍຊິງຕັນ ປະເທດສະຫະລັດ ເມື່ອວັນທີ່ 8 ຕຸລາ ວ່າອົງການບໍລິຫານການບິນແລະອາວະກາດແຫ່ງຊາດ (ນາຊ່າ) ເຜີຍພາບຖ່າຍສີພາບທຳອິດຂອງຊັ້ນບັນຍາກາດໜາທີ່ປົກຄຸມດາວພູໂຕ ຊຶ່ງສະແດງໃຫ້ເຫັນວ່າມີຊັ້ນໝອກປົກຄຸມເປັນສີຟ້າ ໂດຍພາບດັ່ງກ່າວເປັນຝີມືການບັນທຶກຂອງຍານສຳຫລວດນິວ ຮໍໄລຊັນສ໌ ຊຶ່ງເປັນໄລຍະທີ່ຍານສຳຫລວດເຄື່ອນທີ່ເຂົ້າໃກ້ດາວພູໂຕໃນໄລຍະໃກ້ທີ່ສຸດ ໂດຍຫ່າງຈາກພື້ນຜິວດາວພຽງ 12,500 ກິໂລແມັດ ນອກນີ້ ນາຊ່າອະທິບາຍການທີ່ພາບສີຂອງຊັ້ນບັນຍາກາດເປັນສີຟ້າ ວ່າເປັນການສະທ້ອນຂອງແສງອາທິດເມື່ອຊົນເຂົ້າກັບອານຸພາກຂອງກຸ່ມໝອກ ທີ່ມີແກັສປະກອບສ່ວນໃຫຍ່ເປັນໄນໂຕຣເຈນປົກຄຸມຢູ່ເທິງພື້ນຜິວຂອງດາວພູໂຕ ນອກຈາກນີ້ ນາຊ່າຍັງເຜີຍຄວາມຄືບໜ້າຂອງການວິເຄາະລັກສະນະພູມິປະເທດຂອງດາວພູໂຕ ຜ່ານການເຮັດແຜນທີ່ ພົບວ່າດາວພູໂຕມີຂະໜາດ “ໃຫຍ່ກວ່າທີ່ຄິດ” ແຕ່ຍັງຖືວ່າມີຂະໜາດນ້ອຍ ດ້ານນ້ຳກ້ອນທີ່ຢູ່ເທິງພື້ນຜິວມີຄວາມປ່ຽນແປງແລະລະເຫີຍໄວກວ່າທີ່ເຄີຍມີການວິເຄາະໄວ້ ຖືເປັນຄວາມທ້າທາຍເທື່ອຫລ້າສຸດທີ່ນາຊ່າຈະສຶກສາຢ່າງລະອຽດຕໍ່ໄປ ຍານສຳຫລວດນິວ ຮໍໄລຊັນສ໌ ມູນຄ່າປະມານ 700 ລ້ານດອນລາຂອງນາຊ່າ ຊຶ່ງສາມາດເດີນທາງເຂົ້າໃກ້ດາວພູໂຕໄດ້ຫລາຍທີ່
