ການ​ສູບ​ຢາສູບ​ອາດ​ພາກ​ຊີວິດ​ພົນລະເມືອງ​ຈີນ​ເຖິງ 2 ລ້ານ​ຄົນ​ໃນ​ປີ 2030 ຫລື​ເພີ່ມ​ຂຶ້ນ​ຈາກ​ສະຖິຕິປີ 2010 ປະມານ 1 ເທົ່າ​ ຂະນະ​ທີ່​ອັດຕາ​ການ​ເສຍຊີວິດ​ກ່ອນ​ໄວ​ອັນ​ຄວນ​ໃນ​ຈີນ​ກໍ​ເພີ່ມ​ສູງ​ຂຶ້ນ​ເລື້ອຍ​ໆ ຜົນ​ວິ​ໄຈ​ເຜີຍ​ວັນທີ່ 9 ຕຸລາ ນີ້້ວ່າ
       ງານ​ວິ​ໄຈ​ຫລ້າ​ສຸດ​ຊຶ່ງ​ຕີ​ພິມ​ລົງ​ໃນ​ວາລະ​ສານ​ການ​ແພດ​ແລນ​ເຊັດ ຊີ້​ວ່າ ຊາຍ​ໜຸ່ມ​ຊາວ​ຈີນ​ມີ​ແນວ​ໂນ້ມ​ທີ່​ຈະ​ເສຍຊີວິດ​ຈາກ​ການ​ສູບ​ຢາສູບ​ເກືອບ 1 ໃນ 3 ຂະນະ​ທີ່​ຜູ້ຍິງ​ຈີນ​ສູບ​​ຢາໜ້ອຍ​ກວ່າ ແລະ​ ມີ​ອັດຕາ​ການ​ເສຍຊີວິດ​ຕ່ຳ​ກວ່າ   
       “ຊາຍ​ໄວ​ລຸ້ນ​ຈີນ​ປະມານ 2 ໃນ 3 ​ສ່ວນ​ໃຫຍ່​ເລີ່ມ​ສູບ​ກ່ອນ​ອາ​ຍຸ 20 ປີ ຫາກ​ເລີກ​ບໍ່​ໄດ້ ປະຊາກອນ​ປະມານເຄີ່ງ​ໜຶ່ງ​ໃນ​ກຸ່ມ​ນີ້​ຈະ​ຕ້ອງ​ຕາຍ​ເພາະ​ຢາສູບ​ໃນ​ທີ່ສຸດ” ເສີນ ເຈີ້ງ​ໝິງ (Zhengming Chen) ຈາກ​ມະຫາ​ວິທະຍາ​ໄລ​ອັອກ​ຟອ​ດ ຊຶ່ງ​ເປັນ​ໜຶ່ງ​ໃນ​ທີມ​ວິ​ໄຈ ລະ​ບຸ
       ຢາສູບຫລາຍກວ່າ 1 ໃນ 3 ຂອງ​ໂລກ​ຖືກ​ສູບ​ໂດຍ​ປະຊາກອນ​ຈີນ ແລະ​ຈີນ​ກໍ​ມີ​ອັດຕາ​ການ​ເສຍຊີວິດ​ຈາກ​ຢາສູບ​ຫລາຍ​ເປັນ​ອັນ​ດັບ 6 ຂອງ​ໂລກ
        “ຜູ້​ເສຍຊີວິດ​ຈາກ​ຢາສູບ​ໃນ​ຈີນ​ຈະ​ເພີ່ມ​ຂຶ້ນ ຈາກ​ສະຖິຕິ 1 ລ້ານ​ຄົນ​ໃນ​ປີ 2010 ກາຍ​ເປັນ 2 ລ້ານ​ຄົນ​ໃນ​ປີ 2030 ແລະ​ ເພີ່ມ​ຂຶ້ນ​ອີກ​ເປັນ 3 ລ້ານ​ຄົນ​ພາຍ​ໃນ​ປີ 2050 ຫາກ​ບໍ່​ມີ​ການ​ອົບຮົມ​ໃຫ້​ປະຊາຊົນ​ເລີກ​ສູບ​ຢາສູບຢ່າງ​ຈິງ​ຈັງ” ຜົນ​ວິ​ໄຈ​ລະ​ບຸ
“ການ​ເຊີນ​ຊວນ​ໃຫ້​ຄົນ​ເລີກ​ສູບ​ຢາສູບ​ຈະ​ເປັນ​ການຄຸ້ມ​ຄ່າ​ທີ່ສຸດ​ສຳລັບ​ລັດຖະບານ​ຈີນ ໃນ​ການ​ທີ່​ຈະ​ຫລຸດ​ອັດຕາ​ການ​ເສຍຊີວິດ​ກ່ອນ​ໄວ​ອັນ​ຄວນ​ໃນ​ 2-3 ທົດສະ​ວັດ​ໜ້າ”
ໃນ​ປີ 2010 ມີ​ຊາຍ​ຊາວ​ຈີນ​ເສຍຊີວິດ​ຈາກ​ຢາສູບ 840,000 ຄົນ ແລະ​ຍິງ​ອີກ 130,000 ຄົນ ຈາກ​ຈຳນວນ​ປະຊາກອນ​ທັງ​ໝົດ 1,400 ລ້ານ​ຄົນ
ຄົນ​ສູບຢາ​ສ່ຽງ​ຕໍ່​ການ​ເສຍຊີວິດ​ກ່ອນ​ໄວ​ອັນ​ຄວນ​ຫລາຍກວ່າ​ຄົົນທີ່​ບໍ່​ສູບ​ 1 ເທົ່າ​ ແລະ​ ຍັງມີ​ສິດ​ປ່ວຍ​ເປັນ​ມະ​ເຮັງ​ປອດ ເສັ້ນ​ເລືອດ​ສະໝອງ​ແຕກ ແລະ ​ຫົວ​ໃຈ​ຢຸດເຕັ້ນ ຫລາຍກວ່າ​ຄົນ​ປົກກະຕິ
ຊາຍ​ຊາວ​ຈີນ​ທີ່​ອາ​ຍຸ​ລະຫວ່າງ 40-79 ປີ​ມີ​ອັດຕາ​ການ​ເສຍຊີວິດ​ຈາກ​ຢາສູບເພີ່ມ​ຂຶ້ນ​ຈາກ 10% ໃນ​ຕົ້ນ​ທົດສະ​ວັດ 1990 ກາຍ​ເປັນ 20% ໃນ​ປັດຈຸບັນ
ງານ​ວິ​ໄຈ​ຊິ້ນ​ນີ້​ສະຫລຸບ​ຈາກ​ຜົນ​ການສຶກສາ​ລະ​ດັບ​ປະເທດ 2 ເທື່ອ ໂດຍ​ເກັບ​ຂໍ້​ມູນ​ຈາກ​ຊາວ​ຈີນ​ທັງ​ໝົດ 730,000 ຄົນ
ເຈບຟຣີ ໂຄ​ແພລນ ແລະ ໄມ​ເຄີນ ອີ​ລິກ​ສັນ ຈາ​ກສະ​ຖາ​ບັນ​ສຸກຂະພາບ​ສາກົນ​ເອ​ມໍ​ລີ​ໃນ​ເມືອງ​ແອດ​ແລນ​ຕາ ຊີ້​ວ່າ​ຈີນ​ບໍ່​ພຽງແຕ່ບໍລິ​ໂພກ​ຢາສູບ​ຫລາຍ​ທີ່ສຸດ ແຕ່​ຍັງ​ເປັນ​ຊາດ​ຜູ້​ປູກ​ແລະ​ຜະລິດ​ຢາ​ສູບ​ລາຍ​ໃຫຍ່​ທີ່ສຸດ​ຂອງ​ໂລກ​ອີກດ້ວຍ
“ຜົນ​ປະກອບ​ການ​ຂອງ​ບໍລິສັດ​ຢາ​ສູບ​ຈີນ (Chinese National Tobacco Corporation) ຄິດ​ເປັນ 7% ຂອງ​ລາຍ​ໄດ້​ຕະຫລອດ​ທັງ​ປີ​ທີ່​ລັດຖະບານ​ກາງ​ໄດ້ຮັບ ແລະຈາກ​ການ​ເກັບ​ພາ​ສີ​” 
ລິ​ຊາດ ເປ​ໂຕ ໜຶ່ງ​ໃນ​ທີມ​ນັກ​ວິ​ໄຈ​ຈາກ​ອັອກ​ຟອ​ດ ຍົກ​ຕົວ​ຢ່າງ​ຫລາຍ​ປະເທດ​ໃນ​ໂລກ​ຕະເວັນ​ຕົກ​ທີ່​ມີ​ອັດຕາ​ການ​ເສຍຊີວິດ​ຈາກ​ຢາສູບຫລຸດລົງ​ຕໍ່​ເນື່ອງ​ຕະຫລອດ 20 ປີ ເນື່ອງ​ຈາກ​ລັດ​ຖະບານໃຊ້​ມາ​ດຕາ​ການ​ຂຶ້ນ​ລາ​ຄາ​ຢາສູບ
“ສຳລັບ​ຈີນ ການ​ຂຶ້ນ​ລາ​ຄາ​ຢາສູບ​ອາດ​ຊ່ວຍ​ປ້ອງກັນ​ຊີວິດ​ປະຊາກອນ​ໄດ້​ອີກ​ຫລາຍ​ສິບ​ລ້ານ​ຄົນ”