ສຳນັກຂ່າວຕ່າງປະເທດ ລາຍງານໃນວັນທີ 8 ຕຸລານີ້ວ່າ ທ່ານ ເຊີເກ ຊອຍກູ ລັດຖະມົນຕີວ່າການກະຊວງປ້ອງກັນປະເທດຣັດເຊຍ ໄດ້ອອກມາເປີດເຜີຍໃນມື້ວານນີ້ (7 ຕຸລາ) ວ່າ ກອງທັບຣັດເຊຍ ໄດ້ຍິງລູກສອນໄຟຈຳນວນ 26 ລູກ ຈາກເຮືອກ່ຳປັ່ນສູ້ຮົບ 4 ລຳ ໃນທະເລສາບແຄສປຽນ ຊຶ່ງຢູ່ຫ່າງຈາກເປົ້າໝາຍເຖິງ 1,500 ກິໂລແມັດ ຂ້າມດິນແດນປະເທດອີຣ່ານ ແລະ ອີຣັກ ເພື່ອໂຈມຕີກຸ່ມຕິດອາວຸດລັດອິດສະລາມ ຫລື ໄອເອັສ ໃນປະເທດຊີຣີ ຖືກເປົ້າໝາຍທັງໝົດ 11 ຈຸດ ຊຶ່ງເປັນສູນບັນຊາການ, ສູນຄວບຄຸມ, ສາງອາວຸດຂອງກຸ່ມໄອເອັສ ໂດຍທີ່ບໍ່ມີພົນລະເຮືອນເສຍຊີວິດ ຫລື ໄດ້ຮັບບາດເຈັບ.
ນອກຈາກນີ້, ທ່ານ ເຊີເກ ຍັງໄດ້ກ່າວວ່າ ພວກເຂົາໄດ້ໂຈມຕີເປົ້າໝາຍແລ້ວ 115 ແຫ່ງ ນັບຕັ້ງແຕ່ຣັດເຊຍເລີ່ມປະຕິບັດການໂຈມຕີທາງອາກາດໃນຊີຣີ ເມື່ອທ້າຍອາທິດທີ່ຜ່ານມາ ໂດຍປະທານາທິບໍດີ ວະລາດິເມຍ ປູຕິນ ແຫ່ງຣັດເຊຍ ໄດ້ກ່າວຍ້ອງຍໍຊົມເຊີຍຕໍ່ກອງທັບ ທີ່ໄດ້ກະກຽມ ແລະ ປະຕິບັດການດ້ວຍຜົນສຳເລັດດີ.
