ໂຮງໝໍເຊດຖາທິຣາດ ຮ່ວມກັບກະຊວງແຮງງານ-ສະຫວັດດີການສັງຄົມ ໂດຍໄດ້ຮັບການສະໜັບສະໜູນຫຼັກຈາກ ຜະລິດຕະພັນອາຫານເສີມ ແອບປີຕອນ ບໍລິສັດ ວຽງທອງການຢາ ໄດ້ຈັດກິດຈະກຳກວດສຸຂະພາບໂດຍບໍ່ເສຍຄ່າ ໃຫ້ແກ່ຜູ້ອາຍຸສູງ ເພື່ອສະເຫຼີມສະຫຼອງວັນຜູ້ອາຍຸສູງ (1 ຕຸລາ) ຂຶ້ນໃນວັນທີ 7 ຕຸລາ 2015 ທີ່ສູນການຄ້າລາວ-ໄອເຕັກ ໂດຍເປັນປະທານຮ່ວມຂອງທ່ານ ຮສ.ດຣ. ຄໍາເປ ພົງສະຫວັດ ອຳນວຍການໂຮງໝໍເຊດຖາທິຣາດ ແລະ ທ່ານ ຄຳເພື່ອນ ຂັນຕິວົງ ຜູ້ອຳນວຍການໃຫຍ່ບໍລິສັດ ວຽງທອງການຢາ ພ້ອມດ້ວຍຜູ້ອາຍຸສູງ ເຂົ້າຮ່ວມກວດສຸຂະພາບ ປະມານ 2 ພັນຄົນ.
ກິດຈະກຳໃນຄັ້ງນີ້ ໄດ້ເລີ່ມແຕ່ເວລາ 7:00 ໂມງຫາ 12:30 ໂມງ ຜູ້ອາຍຸສູງທີ່ເຂົ້າຮ່ວມງານ ແມ່ນໄດ້ຮັບການກວດສຸຂະພາບ ເພື່ອຊອກຫາພະຍາດຕ່າງໆເຊັ່ນ: ຄວາມດັນເລືອດສູງ ພະຍາດຫົວໃຈ ແລະ ຫຼອດເລືອດ ພະຍາດຕຸ້ຍ ພະຍາດເບົາຫວານ ພະຍາດກະດູກຜຸ່ຍ ພ້ອມຮັບຟັງການບັນຍາຍວິທີການປິ່ນປົວ ແລະ ປ້ອງກັນພະຍາດບໍ່ຕິດຕໍ່ເວົ້າລວມ ເວົ້າສະເພາະແມ່ນ ວິທີປິ່ນປົວພະຍາດເບົາຫວານ ພະຍາດຄວາມດັນເລືອດສູງ ພະຍາດຫົວໃຈວາຍ ຮຽນຮູ້ວິທີປ້ອງກັນການເກີດເປັນອຳມະພາດ ເປັນຕົ້ນ ຮູ້ວິທີຮັບປະທານອາຫານທີ່ມີປະໂຫຍດ ວິທີການອອກກຳລັງກາຍທີ່ປອດໄພ ແລະ ຍັງໄດ້ຮັບຢາທີ່ຈຳເປັນຈຳນວນໜຶ່ງໂດຍບໍ່ເສຍຄ່າຈາກທີມງານແພດ ນອກຈາກນັ້ນ ຜູ້ເຂົ້າຮ່ວມຍັງຈັດກິດຈະກຳຕ່າງໆ ເຊັ່ນ: ການຊິງໂຊກເອົາລາງວັນ ແຂ່ງຂັນຮ້ອງເພງ ແຂ່ງຂັນຄວາມແຂງແຮງຂອງສຸຂະພາບ ຮັບຟັງເພງຈາກນັກຮ້ອງທີ່ມີຊື່ສຽງ ສຳລັບການສະໜັບສະໜູນຂອງບໍລິສັດ ວຽງທອງການຢາ ໃນຄັ້ງນີ້ ລວມມູນຄ່າ 60 ລ້ານກີບ.
ແຫລ່ງຂ່າວ:
