ເຈົ້າໜ້າທີ່ດ່ານພາສີສາກົນ ສະໜາມບິນວັດໄຕ ໄດ້ກວດຢຶດກັນຊາແຫ້ງຈຳນວນ 6 ແທ່ງ ນ້ຳໜັກ 15,3 ກິໂລ ທີ່ຊຸກເຊື່ອງໃນກະເປົາ 3 ໜ່ວຍ ເພື່ອກຽມສົ່ງອອກໄປທະວີບເອີຣົບ ຜ່ານທາງໄປສະນີ ໃນວັນທີ 21-22 ແລະ 23 ກັນຍາ 2015.
ພາຍໃນກະເປົາ ນອກຈາກຈະມີກັນຊາ ຍັງພົບໂສ້ງຢີນຂາສັ້ນ ຈຳນວນ 33 ຜືນ ເພື່ອອຳພາງການກວດກາຂອງເຈົ້າໜ້າທີ່ ແຕ່ເນື່ອງຈາກເຈົ້າໜ້າທີ່ເຫັນວ່າກະເປົາດັ່ງກ່າວ ມີພິລຸດ ນ້ຳໜັກຜິດປົກກະຕິ ຈຶ່ງໄດ້ກວດກາຢ່າງລະອຽດ ແລະ ພົບສິ່ງທີ່ຜິດກົດໝາຍຊຸກເຊື່ອງຢູ່ໃນ ຈຶ່ງໄດ້ຢຶດໄວ້ ແລະ ປັດຈຸບັນເຈົ້າໜ້າທີ່ດ່ານພາສີສາກົນສະໜາມບິນວັດໄຕ ກຳລັງສົມທົບກັບພາກສ່ວນກ່ຽວຂ້ອງ ເພື່ອຕິດຕາມຜູ້ກະທຳຜິດມາລົງໂທດ ຕາມລະບຽບກົດໝາຍ.
ເຈົ້າໜ້າທີ່ດ່ານພາສີສາກົນ ສະໜາມບິນວັດໄຕ ໄດ້ກ່າວວ່າ: ນອກຈາກພວກເຮົາຈະຕັ້ງໜ້າປະຕິບັດໜ້າທີ່ ທາງດ້ານເກັບລາຍຮັບເຂົ້າງົບປະມານແລ້ວ ວຽກງານກວດກາສິ່ງຜິດກົດໝາຍ ພວກເຮົາກໍ່ໄດ້ເອົາໃຈໃສ່ຢ່າງຫ້າວຫັນ ເພື່ອເຮັດໃຫ້ການລັກລອບສິ່ງຜິດກົດໝາຍຫຼຸດໜ້ອຍຖອຍລົງ.
ແຫລ່ງຂ່າວ:
