ເມື່ອວັນທີ 17 ກັນຍາ 2015 ທີ່ຜ່ານມາ ກຸ່ມຜູ້ຮ່ວມທຶນກັບ ບໍລິສັດ ແມັກຄີຯ (Maxkey Stable Worldwide Limited) ຈຳນວນ 15 ຄົນ ຈາກທັງໝົດຫຼາຍກວ່າ 2000 ຄົນໃນທົ່ວປະເທດ ໄດ້ຍື່ນໃບຮ້ອງຟ້ອງ ບໍລິສັດ ແມັກຄີຯ ຮຽກຄ່າເສຍຫາຍເປັນຈຳນວນເງິນ 460,000 ໂດລາສະຫະລັດ ຕໍ່ເຈົ້າໜ້າທີ່ກະຊວງປ້ອງກັນຄວາມສະຫງົບ ເປັນຕົ້ນ ເພື່ອໃຫ້ດຳເນີນຄະດີກັບ ບໍລິສັດ ແມັກຄີຯ ໂດຍເນື້ອໃນຂອງໃບຮ້ອງຟ້ອງ ໄດ້ກ່າວວ່າ ບໍລິສັດ ແມັກຄີຯໄດ້ກະທຳຜິດ 3 ປະການໃຫຍ່ ຄື:
1. ລະເມີດຕໍ່ສັນຍາທີ່ມີກັບຜູ້ຮ່ວມທຶນ (ລູກຄ້າ)
2. ຟອກເງິນໃນລະດັບຊາດແລະສາກົນ
3. ການດຳເນີນທຸລະກິດທີ່ບໍ່ຖືກຕ້ອງໃນລາວ ແລະສາກົນ
ໂດຍກ່ອນຈະດຳເນີນການຮ້ອງຟ້ອງນັ້ນ ບໍລິສັດ ແມັກຄີຯ ບໍ່ໄດ້ຈ່າຍເງິນປັນຜົນແກ່ພວກຕົນ ມາແລ້ວ 3 ເດືອນ ແລະບໍລິສັດດັ່ງກ່າວໄດ້ຢຸດຕິການເຄື່ອນໄຫວ ແລ້ວບໍ່ໄດ້ສົ່ງເງິນລົງທຶນແກ່ ຜູ້ຮ່ວມທຶນທັງໝົດໃນປະເທດລາວ ທີ່ມີມູນຄ່າການຮ່ວມທຶນລວມຫຼາຍກວ່າ 15 ລ້ານໂດລາສະຫະລັດ.
ແນວໃດກໍຕາມຝ່າຍບໍລິສັດ ແມັກຄີຯ ຍັງບໍ່ໄດ້ອອກມາໃຫ້ຂ່າວແຕ່ຢ່າງໃດ ດັ່ງນັ້ນ ຈຶ່ງຍັງຕ້ອງລໍຖ້າຟັງຂ່າວຈາກອີກຝ່າຍໜຶ່ງ ຕໍ່ໄປ.
