ເມື່ອທ້າຍອາທິດຜ່ານມານີ້, ຢູ່ແຂວງສະຫວັນນະເຂດ, ໄດ້ມີກອງປະຊຸມຖອດຖອນບົດຮຽນ ແລະ ປຶກສາຫາລືກ່ຽວກັບວຽກງານສະກັດກັ້ນ ແລະ ການແກ້ໄຂບັນຫາຢາເສບຕິດ, ໂດຍການເປັນປະທານຂອງທ່ານ ອາຊາງ ລາວລີ ຮອງນາຍົກລັດຖະມົນຕີ, ຜູ້ຊີ້ນຳວຽກງານການປົກຄອງ ແລະບັນຫາຢາເສບຕິດ ແລະ ມີພາກສ່ວນກ່ຽວຂ້ອງເຂົ້າຮ່ວມເປັນຈໍານວນຫລາຍເພື່ອສະຫລຸບຕີລາຄາ ແລະ ຖອດຖອນບົດຮຽນຜົນຂອງການຈັດຕັ້ງປະຕິບັດຄຳສັ່ງຂອງທ່ານນາຍົກລັດຖະມົນຕີວ່າດ້ວຍການເພີ່ມທະວີການຄວບຄຸມ, ສະກັດກັ້ນ ແລະຕ້ານຢາເສບຕິດ ແລະ ການປູກຝິ່ນ-ປູກກັນຊາ, ພ້ອມນັ້ນ, ຍັງໄດ້ປຶກສາຫາລືກ່ຽວກັບວິທີການ,ມາດຕະການສະກັດກັ້ນການປູກຝິ່ນ ແລະ ແກ້ໄຂບັນຫາສິ່ງເສບຕິດ ໃນໜຶ່ງປີຜ່ານມາ.
ປັດຈຸບັນຜູ້ທີ່ມີຄວາມສ່ຽງພົວພັນ ແລະ ເສບຢາເສບຕິດແມ່ນມີລັກສະນະເພີ່ມຂຶ້ນຫລາຍໃນເຂດຕົວເມືອງ ແລະ ແຜ່ລະບາດໄປເຖິງພື້ນທີ່ຫ່າງໄກສອກຫລີກ, ທຸລະກັນດານ, ປາກົດວ່າມີຄົນເສບຢາບ້າ, ການຊື້-ຂາຍ, ການຂົນສົ່ງ, ນຳຜ່ານ ແລະ ເສບຢາເສບຕິດ ທີ່ແຜ່ລະບາດໄປສູ່ກຸ່ມຄົນໄວໜຸ່ມຢ່າງຮຸນແຮງກໍ່ໃຫ້ເກີດມີປະກົດການຫຍໍ້ທໍ້, ຄວາມບໍ່ສະຫງົບ ແລະ ຄວາມບໍ່ເປັນລະບຽບຕໍ່ສັງຄົມ ແລະ ເຖິງຂີດໝາຍທີ່ຈະເປັນອັນຕະລາຍຕໍ່ຄວາມໝັ້ນຄົງຂອງຊາດ, ບັນຫາຢາເສບຕິດຢູ່ປະເທດເຮົາແມ່ນໜຶ່ງໃນບັນດາປາກົດການຫຍໍ້ທໍ້ ແລະ ເປັນເຄື່ອງມືຫັນປ່ຽນໂດຍສັນຕິຂອງສັດຕູ, ເຊິ່ງທຸກພາກສ່ວນທົ່ວສັງຄົມຈະຕ້ອງໄດ້ຮ່ວມກັນແກ້ໄຂລວມເຖິງໃຫ້ຄຳແນະນຳຕໍ່ກຸ່ມສ່ຽງໂດຍສະເພາະໄວໜຸ່ມ-ເຍົາວະຊົນໃຫ້ເຫັນຜົນຮ້າຍຂອງຢາເສບຕິດຫລາຍຂຶ້ນ.
ທີ່ມາ ໜັງສືພິມລາວພັດທະນາ http://laophatthananews.blogspot.com/2015/10/blog-post_85.html
