ສາວໆ ຫລາຍຄົນອາດຈະເຄີຍຮູ້ມາແດ່ວ່າ ຍຸກກ່ອນທີ່ຈະມີຜ້າອະນາໄມເກີດຂຶ້ນມາເທິງໂລກ ລຸ້ນແມ່ເຖົ້າຂອງພວກເຮົາກໍໃຊ້ກາບໝາກພ້າວມາເຮັດເປັນຜ້າອະນາໄມນຳ ຫລື ກໍໃຊ້ຜ້າມາທົບກັນເປັນຊັ້ນໆ ຈາກນັ້ນກໍຖອດເອົາໄປຊັກມາໃຊ້ຄັ້ງຕໍ່ໄປ ແຕ່ໃຜເລີຍຈະຄິດວ່າ ພູມປັນຍາບ້ານໆ ກ່ອນທີ່ຈະມີວິວັດທະນາການຜ້າອະນາໄມແບບປະຈຸບັນຈະຖືກນຳກັບມາເປັນເທນຜ້າອະນາໄມແຫ່ງປີ 2000 ອີກຄັ້ງ ແຖມໄດ້ຍິນມາວ່າຜ້າອະນາໄມແບບຊັກໄດ້ກຳລັງຮິດໃນໝູ່ສາວຮັກໂລກອີກດ້ວຍ
ຜ້າອະນາໄມແບບຊັກໄດ້ຜະລິດມາຈາກຜ້າທີ່ມີຄຸນສົມບັດໃນການດູດຊັບຂອງແຫລວໄດ້ດີ ແລະມີຄວາມໂປ່ງ ເຊັ່ນ ຜ້າຄອດຕອນ ແລະຜ້າຂົນໜູເຍື່ອໄຜ່ ຊຶ່ງຈຸດເດັ່ນຂອງຜ້າເຫລົ່ານີ້ຍັງມີຄວາມນຸ່ມນວນ ບໍ່ລະຄາຍເຄືອງຕໍ່ຜິວອັນບອບບາງຂອງສາວໆ ໂດຍສະເພາະຜິວບໍລິເວນຈຸດລັບທີ່ຕ້ອງການຄວາມໃສ່ໃຈຫລາຍເປັນພິເສດ ທີ່ສຳຄັນເມື່ອຜ້າອະນາໄມແບບຊັກໄດ້ຜະລິດມາຈາກວັດດຸຜ້າ ດັ່ງນັ້ນຈຶ່ງແປໄດ້ວ່າສາວໆ ສາມາດໃຊ້ຜ້າອະນາໄມແລ້ວນຳກັບມາຊັກເຮັດຄວາມສະອາດເກັບໄວ້ໃສ່ໄດ້ອີກຫລາຍເທື່ອ ລຸດຄ່າໃຊ້ຈ່າຍທີ່ຕ້ອງຊື້ຜ້າອະນາໄມແບບເດີມມາໃຊ້ໄປໄດ້ພໍສົມຄວນ ແລະຍິ່ງໄປກວ່ານັ້ນ ຜ້າອະນາໄມແບບຊັກໄດ້ຍັງເປັນມິດກັບສິ່ງແວດລ້ອມ ເພາະສາມາດນຳກັບມາໃຊ້ໄດ້ອີກ ບໍ່ຕ້ອງໃຊ້ແລ້ວຖິ້ມເປັນມົນພິດຕໍ່ໂລກ ແຖມມີລາຍໃຫ້ເລືອກຫລາກຫລາຍ ທັງສີສັນສົດໃສ ຫລືຈະເປັນລາຍດອກໄມ້ ລາຍກາຕູນໜ້າຮັກກໍມີ ແລະຍັງມີໄຊສ໌ໃຫ້ເລືອກຫລາຍຂະໜາດ ດ້ວຍເຫດນີ້ຈຶ່ງຄອງໃຈສາວໆໄວລຸ້ນຫລາຍຂຶ້ນ
ແຕ່ກ່ອນຈະໃຊ້ຜ້າອະນາໄມແບບຊັກໄດ້ ແນະນຳໃຫ້ຊັກຜ້າອະນາໄມດ້ວຍນ້ຳສະບູ່ອ່ອນໆເພື່ອເປັນການຊະລ້າງຝຸ່ນລະອອງໃນໃຍຜ້າ ແລະເພື່ອເພີ່ມປະສິດທິພາບຂອງໃຍຜ້າໃນການດູດຊຶມຂອງແຫລວໄດ້ດີກວ່າເດີມ ອີກທັງຄວນຊັກຜ້າອະນາໄມໃຊ້ແລ້ວດ້ວຍນ້ຳເຢັນຫລືນ້ຳອຸນຫະພູມປົກກະຕິເນື່ອງຈາກຄວາມຮ້ອນອາດເຮັດໃຫ້ເລືອດປະຈຳເດືອນຍິ່ງຕິດຝັງແໜ້ນຈົນຊັກອອກຢາກ