ເກີດເຫດມືປືນບຸກຍິງຄົນໃນວິທະຍາໄລໃນເມືອງໂອເລກອນ ເມື່ອວັນພະຫັດທີ່ 1 ຕຸລາ ເປັນເຫດໃຫ້ມີຜູ້ເສຍຊີວິດແລ້ວ 13 ລາຍ ແລະ ບາດເຈັບອີກ 20 ຄົນ ສ່ວນມືປືນຫລ້າສຸດມີລາຍງານຖືກຕຳຫລວດຍິງເສຍຊີວິດແລ້ວ…
ສຳນັກຂ່າວຕ່າງປະເທດລາຍງານວ່າ ຊາຍຊາວອາເມຣິກາເຊີ່ງຄາດວ່າມີອາຍຸຢູ່ໃນໄລຍະ 20 ປີ ກໍ່ເຫດໃຊ້ອາວຸດປືນບຸກຍິງພາຍໃນຫ້ອງຮຽນຂອງວິທະຍາໄລເອກະຊົນ ‘ອຳຄວາ’ ໃນເມືອງໂລດສ໌ເບີກ ເມືອງໂອເລກອນ ສະຫາລັດອະເມຣິກາ ເມື່ອວັນພະຫັດຕາມເວລາທ້ອງຖິ່ນ ເປັນເຫດໃຫ້ມີຜູ້ເສຍຊີວິດແລ້ວ 13 ລາຍ ແລະ ມີຜູ້ໄດ້ຮັບບາດເຈັບປະມານ 20 ຄົນ
ເຫດຍິງກັນເລີ່ມຂຶ້ນໃນເວລາປະມານ 10:30 ນາທີ ຕາມເວລາສະຫາລັດ ໂດຍເກີດຂຶ້ນທີ່ອາຄານຫລັງໜຶ່ງ ກ່ອນທີ່ມືປືນຈະຍ້າຍໄປກໍ່ເຫດທີ່ອາຄານວິທະຍາສາດ ‘ສະໄນເດີລ໌ ຮອນ’ ຂອງວິທະຍາໄລເອກະຊົນອຳຄວາໃນເວລາຕໍ່ມາ ໂດຍທ້າຍ ເລ ຊູບເລີ ຫົວໜ້າໜ່ວຍດັບເພີງເຂດ ດັກລາດ ເຄົາຕີເຜີຍວ່າ ຜູ້ເສຍຊີວິດ ແລະ ບາດເຈັບຖືກພົບໃນຫ້ອງຮຽນຫລາຍຫ້ອງ
ນາຍຊູບເລີເຜີຍອີກວ່າ ຜູ້ບາດເຈັບຫລາຍຄົນຖືກນຳໂຕສົ່ງໂຮງໝໍຫລາຍແຫ່ງໃນພື້ນທີ່ໃກ້ຄຽງ ແຕ່ມີ 2 ຄົນເສຍຊີວິດລະຫວ່າງເດີນທາງ ສ່ວນມືປືນມີລາຍງານວ່າ ພວກເຂົາຖືກຍິງເສຍຊີວິດລະຫວ່າງຍິງປະທະກັບຕຳຫລວດໃນຫ້ອງຮຽນຫ້ອງໜຶ່ງ
ເຈົ້າຫນ້າທີ່ເປີດເຜີຍຕໍ່ຊີເອັນເອັນດ້ວຍວ່າ ພວກເຂົາພົບປືນທີ່ເຊື່ອວ່າເປັນຂອງຄົນຮ້າຍຢ່າງໜ້ອຍ 4 ກະບອກຢູ່ໃນທີ່ເກີດເຫດ ຂະນະທີ່ສຳນັກງານຄວບຄຸມເຫລົ້າ, ຢາສູບ, ປືນ ແລະ ວັດຖຸລະເບີດ (ເອທີເອັບ) ໄດ້ສົ່ງທີມໝາດົມກິ່ມເຂົ້າໄປໃນທີ່ເກີດເຫດ ເພື່ອກວດຫາລະເບີດ ຫລືອາວຸດອື່ນໆ ດ້ານເຈົ້າຫນ້າທີ່ຂອງສຳນັກງານສອບສວນກາງ (ເອັບບີໄອ) ກໍເຂົ້າມາຮ່ວມສືບສວນອີກດ້ວຍ
ຂະນະດຽວກັນ ແຫລ່ງຂ່າວທີ່ໃກ້ຊິດກັບການສືບສວນຄະດີນີ້ ເຜີຍຕໍ່ຊີເອັນເອັນວ່າ ເຈົ້າຫນ້າທີ່ກຳລັງກວດສອບຂໍ້ຄວາມເທິງເຄືອຂ່າຍສັງຄົມອອນໄລນ໌ ທີ່ພວກເຂົາເຊື່ອວ່າເປັນການສື່ສານລະຫວ່າງຄົນຮ້າຍກັບຄົນອື່ນໆ ໂດຍການສົນທະນາເກີດຂຶ້ນໃນເວັບໄຊຕ໌ ‘4chan’ ຄືນມື້ວັນພຸດ ເຊີ່ງຜູ້ຕ້ອງສົງໄສລະບຸເຖິງແຜນການຂອງພວກເຂົາ ແລະ ໄດ້ຮັບສຽງຕອບຮັບແຕກຕ່າງກັນ ລວມທັງແນະນຳວິທີກໍ່ເຫດລວມທັງອາວຸດທີ່ໃຊ້
ຜູ້ຕ້ອງສົງໄສຍັງໂພດສ໌ຂໍ້ຄວາມອ້າງເຖິງ ເອລິອອດ ລອດເຈີ ມືປືນຜູ້ກໍ່ເຫດຍິງທີ່ໂຮງຮຽນຊານຕາ ບາບາລາ ແລະ ຂຽນຖະແຫລງການປະກາດຄວາມຕ້ອງການ ກັບຖ່າຍຄລິບໂຕເອງກ່ອນລົງມືກໍ່ເຫດ ໂດຍຜູ້ຕ້ອງສົງໄສລະບຸວ່າ ນີ້ເປັນພຽງໂອກາດດຽວທີ່ພວກເຂົາຈະໄດ້ເປັນຂ່າວ ເພາະພວກເຂົາເປັນຄົນບໍ່ສຳຄັນ