ທີມນັກກີລາລຸ້ນອາຍຸບໍ່ເກີນ 23 ປີ ຫຼື ຢູ-23 ທີມຊາດລາວ ຊຸດຊີເກມ ຄັ້ງທີ 27 ທີ່ປະເທດມຽນມາ ເຮັດໄດ້ພຽງສະເໝີກັບ ຢູ-23 ທີມຊາດກໍປູເຈຍ 2-2 ສົ່ງຜົນໃຫ້ຕົກຮອບ ໃນການແຂ່ງຂັນກີລາລຸ່ມແມ່ນ້ຳຂອງ ຫຼື ແມ່ຂອງ ຄັບ 2013 ລະຫວ່າງວັນທີ 2-10 ພະຈິກ 2013 ທີ່ນະຄອນຫຼວງພະນົມເປັນ ປະເທດກຳປູເຈຍ ເປັນເຈົ້າພາບ.
ຄວາມເຄື່ອນໄຫວຂອງນັກເຕະທີມຊາດລາວ ລຸ້ນອາຍຸບໍ່ເກີນ 23 ປີ ຊຸດກຽມຊີເກມ ທີ່ປະເທດມຽນມາ ທ້າຍປີນີ້ ທີ່ເດີນທາງເຂົ້າຮ່ວມການແຂ່ງຂັນ ແມ່ຂອງ ຄັບ 2013 ຫຼ້າສຸດໃນວັນທີ 6 ພະຈິກ 2013 ຜ່ານມາ ຢູ-23 ທີມຊາດລາວ ລົງແຂ່ງຂັນນັດທີສອງ ຫຼື ນັດສຸດທ້າຍຂອງຮອບແບ່ງກຸ່ມກັບ ເຈົ້າພາບ ກຳປູເຈຍ ໂດຍນັດນີ້ຖ້າຫາກທີມຊາດລາວ ສາມາດເອົາຊະນະໄດ້ກໍຈະຜ່ານເຂົ້າຮອບທັນທີ ແນວໃດກໍຕາມ ເກມນີ້ທີມຊາວລາວ ທີ່ເຫຼືອຜູ້ຫຼິ້ນ 10 ຄົນ ກໍຖືກກຳປູເຈຍໄລ່ຕີສະເໝີທ້າຍເກມ 2-2 ສົ່ງຜົນໃຫ້ທີມຊາດລາວ ລົງສະໜາມ 2 ນັດ ເສຍໃຫ້ມາເລເຊຍ 2-3 ແລະ ສະເໝີ ກຳປູເຈຍ 2-2 ເຮັດໃຫ້ມີພຽງ 1 ຄະແນນ ບໍ່ສາມາດຜ່ານເຂົ້າໄປຫຼິ້ນໃນຮອບຕໍ່ໄປ ຫຼັງຈາກກຳປູເຈຍ ມີ 2 ຄະແນນ ແລະ ມາເລເຊຍ ມີ 4 ຄະແນນ.