ບັນດາບໍລິສັດກໍ່ສ້າງ ທີ່ຮັບເໝົາໂຄງການກໍ່ສ້າງພື້ນຖານໂຄງລ່າງ ເປັນຕົ້ນກໍແມ່ນໂຄງການກໍ່ສ້າງເສັ້ນທາງ ໄດ້ຂຸ້ນຂ້ຽວສຸມໃສ່ຈັດຕັ້ງປະຕິບັດໜ້າວຽກ ໃຫ້ສຳເລັດຕາມແຜນການ ໂດຍສະເພາະໃຫ້ສຳເລັດກ່ອນລະດູຝົນປີ 2014 ທີ່ຈະມາເຖິງ ເພື່ອສ້າງຄວາມສະດວກໃຫ້ແກ່ການໄປມາຫາສູ່ຂອງພໍ່ແມ່ປະຊາຊົນ.
ສຳລັບບໍລິສັດ ໄຊເຊດຖາກໍ່ສ້າງ-ຂົວທາງ ຈຳກັດ ກໍເປັນບໍລິສັດໜຶ່ງທີ່ໄດ້ຮັບເໝົາກໍ່ສ້າງ ທາງເບຕົງເສີມເຫຼັກໜາ 20 ຊັງຕີແມັດ ເສັ້ນທາງຮ່ອມ 3 ຮ່ອມ 6 ບ້ານ ດົງໝ້ຽງ-ສາມແຍກຫ້ອງການບ້ານທົ່ງຕູມ ເມືອງຈັນທະບູລີ ນະຄອນຫຼວງວຽງຈັນ ທີ່ມີຄວາມຍາວທັງໝົດ 979 ແມັດ ໜ້າທາງກວ້າງ 6 ແມັດ ມີລະບົບຮ່ອງລະບາຍນ້ຳສອງຂ້າງທາງ.
ທ່ານ ພູເຂົາຄຳ ພຣະວໍລະໄຊ ຜູ້ອຳນວຍການບໍລິສັດ ໄຊເຊດຖາກໍ່ສ້າງ-ຂົວທາງ ຈຳກັດ ໄດ້ກ່າວວ່າ: ຜ່ານມາ ບໍລິສັດຂອງພວກເຮົາກໍຄືສົກປີ 2011-2012 ກໍໄດ້ປະກອບສ່ວນໃນການກໍ່ສ້າງເສັ້ນທາງຊຸມຊົນລັດ 70% ແລະ ປະຊາຊົນສົມທົບທຶນ 30% ຢູ່ບ້ານສີສະຫວາດ ແລະ ບ້ານດົງໝ້ຽງມາແລ້ວ ໂດຍແມ່ນບໍລິສັດເປັນຜູ້ຮັບເໝົາ ແລະ ລົງທຶນກ່ອນ 100% ແລະ ມາໃນສົກປີ 2012-2013 ນີ້ ດ້ວຍຄວາມໄວ້ເນື້ອເຊື່ອໃຈຈາກຂັ້ນເທິງ ບໍລິສັດຂອງພວກເຮົາຍັງໄດ້ສືບຕໍ່ກໍ່ສ້າງເສັ້ນທາງຮ່ອມ 3 ຮ່ອມ 6 ບ້ານດົງໝ້ຽງ-ສາມແຍກຫ້ອງການບ້ານທົ່ງຕູມຕື່ມອີກ ຊຶ່ງໂຄງການນີ້ແມ່ນມີມູນຄ່າການກໍ່ສ້າງທັງໝົດ 8.415.403.245 ກີບ ໂດຍແມ່ນທຶນງົບປະມານລັດ 100% ແລະ ໂຄງການກໍ່ສ້າງເສັ້ນທາງດັ່ງກ່າວ ແມ່ນເລີ່ມລົງມືກໍ່ສ້າງໃນຕົ້ນເດືອນກຸມພາ 2013 ແລະ ສຳເລັດຕົ້ນເດືອນຕຸລາ 2013 ຖືວ່າສຳເລັດຕາມສັນຍາ.
ທ່ານ ພູເຂົາຄຳ ພຣະວໍລະໄຊ ຍັງກ່າວຕື່ມວ່າ: ການກໍ່ສ້າງແມ່ນພົບຄວາມຫຍຸ້ງຍາກ ເປັນຕົ້ນ ຖືກໄລຍະລະດູຝົນ ແລະ ບັນຫາສິ່ງກີດຂວາງຕ່າງໆ ແຕ່ຍ້ອນໄດ້ຮັບການຊີ້ນຳ-ນຳພາຈາກອົງການປົກຄອງເມືອງ ຂະແໜງການທີ່ກ່ຽວຂ້ອງ ຄະນະຮັບຜິດຊອບໂຄງການເປັນຢ່າງດີ ແລະ ຍ້ອນໄດ້ຮັບຄວາມຮ່ວມໄມ້ຮ່ວມມືຈາກ ອົງການປົກຄອງບ້ານ ອົງການຈັດຕັ້ງມະຫາຊົນ ແລະ ພໍ່ແມ່ປະຊາຊົນ ບວກໃສ່ຄວາມເອົາໃຈໃສ່ຂອງບໍລິສັດ ຈຶ່ງເຮັດໃຫ້ການດຳເນີນໂຄງການໄປຕາມແຜນ ແລະ ສຳເລັດຕາມກຳນົດເວລາ ແລະ ຄະນະຮັບຜິດຊອບໂຄງການ ໂດຍມີທ່ານຮອງເຈົ້າເມືອງຈັນທະບູລີ ກໍໄດ້ລົງກວດກາວຽກ 100% ແລະ ຜ່ານການລົງກວດກາຕົວຈິງຂອງຄະນະ ກໍເຫັນວ່າການກໍ່ສ້າງໄດ້ຖານເຕັກນິກເປັນຢ່າງດີ ແລະ ໃນຂັ້ນຕອນຕໍ່ໄປ ແມ່ນຈະໄດ້ຈັດພິທີມອບ-ຮັບໃຫ້ເຈົ້າຂອງໂຄງການ ເພື່ອຄຸ້ມຄອງປົກປັກຮັກສາ ແລະ ນຳໃຊ້ໃຫ້ມີປະສິດທິຜົນຕໍ່ໄປ.