ເກີດມີເຫດຄາດຕະກຳຜົວຂ້າເມຍຕາຍຢູ່ຖຽງນາແຫ່ງໜຶ່ງຂອງບ້ານນາທະລັງ ເມືອງພີນ ແຂວງສະຫວັນນະເຂດ ໃນຕອນເຊົ້າຂອງວັນທີ 22 ກັນຍາ 2015 ນີ້ ເວລາປະມານ 7 ໂມງ 30 ນາທີ. ເຊີ່ງໄດ້ຮັບການລາຍງານຈາກຜູ້ສື່ຂ່າວປະຈຳເມືອງພີນ: ສະນັ້ນເຈົ້າໜ້າທີ່ ປກສ ເມືອງພີນກໍ່ໄດ້ຈັດສົ່ງທິມສຶບສວນ-ສອບສວນລົງພິສູດສະຖານທີ່ເກີດເຫດເພື່ອຫາຫລັກຖານທີ່ແທ້ຈິງວ່າມີການຂ້າກັນຕາຍຢູ່ຖຽງນາແທ້ຫຼືບໍ່ ຈຶ່ງຮູ້ໄດ້ວ່າ: ກ່ອນເກີດເຫດທ້າວ ກົ້ວ ອາຍຸ 34 ປີ ແລະ ນາງຕາດຳ ອາຍຸ 31 ປີ ເຊີ່ງທັງສອງແມ່ນເປັນຜົວ-ເມຍກັນເຊີ່ງມີລູກຮ່ວມກັນ 2 ຄົນ ຜູ້ຊາຍອາຍຸປະມານ 5 ປີ ແລະ ຜູ້ຍິງອາຍຸປະມານ 1 ປີ ຢູ່ບ້ານນາທະລັງ ເມືອງພີນ ແຂວງສະຫວັນນະເຂດ ເຊີ່ງທັງສອງຜົວ ແລະ ເມຍພ້ອມລູກໄດ້ອອກໄປນາໃນເວລາຕອນເຊົ້າ ໃນເມື່ອໄປຮອດຖຽງນາກໍ່ເກີດມີການຜິດຖຽງກັນລະຫວ່າງຜົວ-ເມຍ ຢ່າງຮຸນແຮງເຊີ່ງມີການປ້ອຍດ່າກັນສາລະພັດ ແລະ ບໍ່ສາມາດ ລົງລອຍກັນໄດ້ຈົນຜູ້ເປັນຜົວ ກໍ່ບໍ່ສາມາດຄຸມອາລົມຈິດບໍ່ຢູ່ກໍ່ເລີຍລາກເອົາໄປຄ້ອນ ມາຕີງ່ອນດົ້ນເມຍ 1 ບາດ ເຮັດໃຫ້ນາງຜູ້ເປັນເມຍລົ້ມພຸບລົງກັບບາດ ໃນເມື່ອເມຍລົ້ມລົງຄວາມຄຽດຍັງບໍ່ໜຳໃຈ ກໍ່ເລີຍກະຊາກເອົາພ້າມາປາດຄໍເມຍຕື່ມອີກ ອັນໄດ້ເຮັດໃຫ້ນາງຜູ້ເປັນເມຍຕາຍຄາທີ່ຢ່າງອາໜາດ.
ຈາກການບອກເລົ່າຂອງປະຊາຊົນພາຍໃນບ້ານດຽວກັນເລົ່າວ່າ ຄອບຄົວນີ້ເກີດມີຄວາມຜິດຖຽງກັນມາຕະຫລອດ ເຊີ່ງຜ່ານມາທ້າວກົ້ວເຄີຍເສບຢາບ້າມາໃນໄລຍະໜຶ່ງກໍເລີກໄປປະຈຸບັນ ເຈົ້າໜ້າທີ່ຕຳຫຼວດໄດ້ທຳການກັກຕົວ ທ້າວກົ້ວ ພ້ອມດຳເນີນຄະດີຕາມກົດໝາຍ