ພະຍາດວໍ້ເປັນພະຍາດຕິດຕໍ່ຮ້າຍແຮງຈາກສັດສູ່ຄົນຖ້າບໍ່ໄດ້ຮັບການປິ່ນປົວທີ່ຖືກຕ້ອງ ແລະ ທັນເວລາຈະເຮັດໃຫ້ເສຍຊີວິດ. ປັດຈຸບັນຢູ່ທະວີບອາຊີມີຄົນເສຍຊີວິດຍ້ອນພະຍາດດັ່ງກ່າວປະມານ 550 ພັນຄົນຕໍ່ປີ, ສະເພາະຢູ່ລາວນັບແຕ່ປີ 2002-2011 ມີຜູ້ເສຍຊີວິດຍ້ອນພະຍາດດັ່ງກ່າວແລ້ວປະມານ 19 ກໍລະນີ ແລະ ແຕ່ເດືອນມັງກອນຫາເດືອນສິງຫາ 2015 ມີຜູ້ເສຍຊີວິດຈາກພະຍາດວໍ້ແລ້ວ 3 ກໍລະນີ.
ທ່ານ ດຣ. ຈັນທະໄລ ໄຊຍະວົງ ຫົວໜ້າຂະແໜງລະບາດວິທະຍາ ພະແນກສາທາລະນະສຸກ ນະຄອນຫລວງວຽງຈັນກ່າວວ່າ: ພະຍາດວໍ້ເປັນພະຍາດທີ່ອັນຕະລາຍ, ແຕ່ເຮົາກໍສາມາດປ້ອງກັນໄດ້ໂດຍການສັກຢາວັກແຊງປ້ອງກັນໃຫ້ສັດລ້ຽງປະເພດໝາ, ແມວ, ລີງ… ຢ່າງຖືກວິທີ ແລະ ຄົບຖ້ວນຕາມຈຳນວນ. ພ້ອມນີ້ເມື່ອຖືກສັດກັດຫລືຂູດໃຫ້ລ້າງບາດແຜດ້ວຍນ້ຳສະອາດທັນທີແລ້ວໄປພົບແພດເພື່ອສັກຢາວັກແຊງປ້ອງກັນ, ພ້ອມທັງໃຫ້ສັງເກດສັດທີ່ກັດໃນໄລຍະ 10 ວັນຖ້າຫາກສັດມີອາການເບື່ອອາຫານ, ບໍ່ກິນນ້ຳ, ກະວົນກະວາຍແລ້ວຕາຍໃຫ້ແຈ້ງຫາສັດຕະວະແພດເພື່ອນຳເອົາສັດໄປກວດຫາເຊື້ອວໍ້.
ພະຍາດວໍ້ສາມາດປ້ອງກັນໄດ້ຖ້າທຸກຄົນເອົາໃຈໃສ່ໃນການຮັກສາສັດລ້ຽງຂອງຕົນໂດຍການສັກຢາວັກແຊງໃຫ້ສັດຄົບຖ້ວນຕາມຈຳນວນທີ່ສັດຕະວະແພດແນະນຳ ແລະ ຫລີກເວັ້ນການສຳຜັດກັບສັດທີ່ມີຄວາມສ່ຽງເປັນພະຍາດວໍ້ຍ້ອນເຫັນໄດ້ຄວາມສຳຄັນໃນການປ້ອງກັນພະຍາດດັ່ງກ່າວໃນວັນທີ 28 ກັນຍາ 2015 ນີ້ກະຊວງສາທາລະນະສຸກ ແລະກະຊວງກະສິກຳ ແລະ ປ່າໄມ້ຈະໄດ້ຈັດກິດຈະກຳສະຫລອງວັນຕ້ານພະຍາດວໍ້ໂລກຂຶ້ນ ທີ່ໂຮງກາຍະສິນແຫ່ງຊາດເຊິ່ງໃນງານດັ່ງກ່າວຜູ້ທີ່ມີສັດລ້ຽງປະເພດໝາ, ແມວ, ລີງ… ສາມາດນຳມາສັກຢາວັກແຊງປ້ອງກັນພະຍາດວໍ້ໄດ້ໂດຍບໍ່ເສຍຄ່າເຊິ່ງງານຈະເລີ່ມແຕ່ເວລາ 8:00-16:00 ໂມງຈຶ່ງຂໍເຊີນຊວນໃຫ້ປະຊາຊົນນຳເອົາສັດລ້ຽງຂອງຕົນໄປສັກຢາກັນພະຍາດວໍ້ໃນງານດັ່ງກ່າວດ້ວຍ.
ແຫລ່ງຂ່າວ:
