ຂປລ. ອະນຸກຳມະການ ສວນສະໜາມ ເພື່ອກະກຽມ ສະເຫລີມສະຫລອງສອງວັນປະຫວັດສາດ ຈັດກອງປະຊຸມປຶກສາຫາລື ແລະ ຜ່ານການ ຮູບແບບ ຖັນແຖວ, ການນຸ່ງຖື ແລະ ການປະດັບປະດາລົດແຫ່ ເພື່ອກະກຽມສະເຫລີມ ສະຫລອງວັນສະຖາປະນາ ສປປ ລາວ ຄົບຮອບ 40 ປີ ຂຶ້ນ ໃນຕອນເຊົ້າ ຂອງວັນທີ່ 20 ກັນຍາ 2015 ທີ່ຫໍປະຊຸມແຫ່ງຊາດ ນະຄອນຫລວງວຽງຈັນ, ໃຫ້ກຽດເປັນປະທານ ຂອງທ່ານ ບົວເງິນ ຊາພູວົງ ລັດຖະມົນຕີຊ່ວຍວ່າການ ກະຊວງຖະແຫລງຂ່າວ, ວັດທະນາທໍຳ ແລະ ທ່ອງທ່ຽວ, ຄະນະຊີ້ນຳລະດັບຊາດ, ຮອງຫົວໜ້າອະນຸກຳມະການ ສວນ ສະໜາມ ເຊິ່ງມີບັນດາຕາງໜ້າຄະນະຮັບຜິດຊອບກ້ອນຂະບວນ ສວນສະໜາມຈາກພາກສ່ວນ ກະຊວງຕ່າງໆ ແລະ ນະຄອນຫລວງວຽງຈັນ ເຂົ້າຮ່ວມ.
ກອງປະຊຸມຄັ້ງນີ້, ບັນດາຕາງໜ້າຄະນະຮັບຜິດຊອບ ກ້ອນຂະບວນສວນສະໜາມ ຈາກຂະແໜງກ້ອນກຳລັງ ກະຊວງກະສິກຳ ແລະ ປ່າໄມ້, ກຳມະບານລາວ, ໂຍທາທິການ ແລະ ຂົນສົ່ງ, ແຮງງານ ສະຫວັດດີການ ແລະ ສັງຄົມ, ອົງການນິຕິ ບັນຍັດ-ຕຸລາການ, ພະລັງງານ ແລະ ບໍ່ແຮ່, ອຸດສາຫະກໍຳ ແລະ ການຄ້າ, ຫ້ອງວ່າການປະທານປະເທດ ແລະ ຫ້ອງວ່າການລັດຖະບານ. ໄດ້ຂຶ້ນສະເໜີເປັນຕົ້ນ ແມ່ນຮູບແບບຖັນແຖວ, ການນຸ່ງຖື ແລະ ການປະດັບປະດາລົດແຫ່ ຂອງກ້ອນກຳລັງຕົນ ຕໍ່ກອງປະຊຸມໄດ້ຮັບຊາບ. ຈາກນັ້ນ ບັນດາຜູ້ເຂົ້າຮ່ວມກອງປະຊຸມ ໄດ້ພ້ອມກັນປຶກສາຫາລື ແລະ ປະກອບຄຳເຫັນ ຢ່າງຕັ້ງໜ້າ ແລະ ມີຄວາມຮັບຜີດຊອບສູງ ໃສ່ຮູບແບບ ຂອງແຕ່ລະກ້ອນກຳລັງ ຂະແໜງການທີ່ໄດ້ສະເໜີ ຜ່ານກອງປະຊຸມ ເພື່ອປັບປຸງກ້ອນກຳລັງຂອງຕົນ ໃຫ້ມີຄວາມເປັນເອກະພາບກັນ, ເໝາະສົມ ແລະ ສອດຄ່ອງຕາມຜົນງານ, ພາລະບົດບາດຂອງແຕ່ລະກະຊວງ ແລະ ອົງການ ກ່ອນຈະມີການຊ້ອມໃຫຍ່ ແລະ ການສະເຫລີມສະຫລອງຕົວຈິງ ໃນວັນທີ່ 2 ທັນວາ ຈະມາເຖິງນີ້.
ແຫລ່ງຂ່າວ:
