ຍັງ​ຄົງ​ມີ​ຂ່າວ​ຫລຸດ​ອອກ​ມາ​ຢ່າງ​ຕໍ່​ເນື່ອງ ສຳລັບ​ໂຄງ​ການ​ພັດທະນາ​ລົດ​​ຂອງ Apple ຊຶ່ງ​ໂຄງ​ການ​ໃນ​ອະນາຄົດ​ທີ່​ຄາດ​ກັນ​ວ່າ​ກຳ​ລັງ​ຢູ່ໃນ​ລະຫວ່າງ​ການ​ພັດທະນາ​ຈະ​ມີ​ການ​ເປີດ​ຕົວ​ເທື່ອ​ທຳອິດໃນ​ປີ 2019

ແມ່ນ​ຈະ​ບໍ່​ມີ​ການ​ສະແດງ​ຄວາມ​ເຫັນ​ໃດໆ ຕໍ່​ເລື່ອງ​ດັ່ງ​ກ່າວ​ຈາກ Apple ແຕ່​ສື່​ດັງ​ໃນ​ຕ່າງ​ປະເທດ​ຢ່າງ Wall Street Journal ເປີດ​ເຜີຍ​ລາຍ​ງານ​ຫລ້າ​ສຸດ​ວ່າ​ການ​ຜະລິດ​ລົດ​ ຫລື Apple Car ພາຍໃຕ້​ຊື່ຫຍໍ້​ຂອງ​ໂຄງ​ການ​ວ່າ “Titan” ຈະສົມບູນ​ແລະ​ພ້ອມ​ເປີດ​ຕົວ​ໃນ​ປີ 2019 ຊຶ່ງ​ໂຄງ​ການ​ພັດທະນາ​ລົດ​​ຂອງ Apple ອາດ​ຢູ່ໃນ​ຮູບ​ແບບ​ຂອງ​ລົດ​​ໄຟ​ຟ້າ​ໄຮ້​ຄົນ​ຂັບ ໂດຍ​ຕັ້ງ​ແຕ່​ປາຍ​ປີ 2014 Apple ໄດ້​ມີ​ການ​ວ່າ​ຈ້າ​ງພະ​ນັກ​ງານ​ຈຳນວນ​ຫລາຍ​ເພື່ອ​ເຂົ້າ​ຮ່ວມ​ໂຄງ​ການ​ແຫ່ງ​ອະນາຄົດ ແລະ​ ຫລ້າ​ສຸດ​ຄາດ​ວ່າ​ມີພະ​ນັກ​ງານ​ແລ້ວ​ເຖິງ 600 ຄົນ

ຂະນະ​ດຽວ​ກັນ​ໃນ​ລາຍ​ງານ​ຍັງ​ລະ​ບຸ​ດ້ວຍ​ວ່າ Apple ຈະ​ໃຊ້​ຄວາມ​ຊ່ຽວຊານ​ໃນ​ການ​ພັດທະນາ iPhone ມາ​ພັດທະນາ​ເຂົ້າ​ກັບ Apple Car ເຊັ່ນ ແບດ​ເຕີ​ຣີ່, ເຊັນ​ເຊີ​ອັດ​ສະ​ລິ​ຍະ ຕະຫລອດ​ຈົນ​ຊອບ​ແວລ໌​ໃໝ່​ໆ ສຳລັບ​ລົດ​ໂດຍ​ສະເພາະ

ນອກ​ຈາກ​ນີ້ Apple ຍັງມີ​ທ່າ​ທີ​ສົນ​ໃຈ​ນຳ BMW i3 ລົດ​​ພະລັງ​ງານ​ໄຟ​ຟ້າ ມາ​ເປັນ​ຕົ້ນ​ແບບ​ໃນ​ການ​ພັດທະນາ Apple Car ດ້ວຍ ແລະ​ເບິ່ງຄືວ່າ​ມີ​ໂອ​ກາດ​ຄວາມ​ເປັນ​ໄປ​ໄດ້​ຫລາຍ ເນື່ອງ​ຈາກ​ເມື່ອ​ເດືອນ​ສິງ​ຫາ​​ທີ່​ຜ່ານມາ​ໄດ້​ມີ​ການ​ພົບ​ປະ​ລະຫວ່າງ​ຜູ້​ບໍລິຫານ​ຂອງ Apple ກັບ​ຜູ້​ບໍລິຫານ​ຂອງ BMW ຊຶ່ງ​ຄາດ​ກັນ​ວ່າ​ເປັນ​ເລື່ອງ​ການ​ຮ່ວມ​ມື​ພັດທະນາ Apple Car ນັ້ນ​ເອງ