ຖ້າຫາກເຈົ້າມີນັດອອກເດດກັບຜູ້ຍິງແລ້ວ ເຈົ້າອາດຈະຢາກຝຶກເວົ້າຍອກ ຫລືເວົ້າຕະຫລົກເອົາໄວ້ ເນື່ອງຈາກງານວິໄຈຊິ້ນໜຶ່ງຈາກສະຫາລັດໄດ້ຊີ້ໃຫ້ເຫັນວ່າ ປະລິມານຄວາມພະຍາຍາມໃນການເຮັດໃຫ້ຕົວເອງເບີ່ງຕະຫລົກ ແລະ ສຽງຫົວທີ່ໄດ້ຮັບກັບມານັ້ນສົ່ງຜົນໃຫ້ພວກເຂົາມີໂອກາດຫລາຍຂຶ້ນທີ່ຈະເຮັດໃຫ້ຄວາມຮັກເກີດຂຶ້ນໄດ້ໃນໄລຍະຍາວ ເມື່ອທັງຄູ່ນັ້ນສາມາດຫົວຮ່ວມກັນໄດ້ແລ້ວ ເດດດັ່ງກ່າວກໍໜ້າຈະນຳໄປສູ່ຄວາມສຳພັນທີ່ຈິງຈັງຍິ່ງຂຶ້ນ
ນິ້ເປັນຄວາມຄິດທີ່ມອບກຳລັງໃຈໃຫ້ກັບຄົົນທີ່ຄິດວ່າອາລົມຕະຫລົກຂອງຕົວເອງນັ້ນອາດຈະເປັນຈຸດຂາຍທີ່ດີກວ່າຮູບຮ່າງໜ້າຕາ “ຖ້າຫາກເຈົ້າໄດ້ພົບກັບຄົນເຈົ້າສາມາດຫົວໄປນຳກັນໄດ້ ມັນອາດໝາຍຄວາມວ່າອະນາຄົດຄວາມສຳພັນຂອງເຈົ້ານັ້ນຈະມີຄວາມສຸກ ແລະ ເຕັມໄປດ້ວຍຄວາມມ່ວນຊື່ນ” Jeffrey Hall ຜູ້ນຳການວິໄຈຈາກ University of Kansas ກ່າວອະທິບາຍ
Hall ນັ້ນເລີ່ມຈາກການກວດສອບຄວາມເຊື່ອມໂຍງລະຫວ່າງຄວາມຕະຫລົກ ແລະ ລະດັບສະຕິປັນຍາ ແຕ່ຄຳຖາມທີ່ວ່າຜູ້ຍິງນັ້ນມັກຄວາມຕະຫລົກຂອງຝ່າຍຊາຍຫລືບໍ່ໄດ້ກາຍມາເປັນໜຶ່ງໃນຈຸດສຳຄັນຂອງງານວິໄຈດັ່ງກ່າວໃນພາຍຫລັງ
ພວກເຂົາໄດ້ທຳການທົດສອບຈຳນວນໜຶ່ງ ໂດຍພວກເຂົາໄດ້ໃຫ້ອາສາສະໝັກ 35 ຄົນປະເມີນໂປໄຟລ໌ Facebook ຂອງຄົນແປກໜ້າ 100 ຄົນ ໃຫ້ນັກຮຽນ 300 ຄົນຂຽນແບບສອບຖາມທີ່ກ່ຽວກັບຄວາມຕະຫລົກ ແລະ ການມີຄວາມຮັກ ຈາກນັ້ນກໍໄດ້ໃຫ້ອາສາສະໝັກທີ່ເປັນຄົນໂສດ 51 ຄົນໃຊ້ເວລາ 10 ນາທີເພື່ອສົນທະນາກັບຄົົນທີ່ພວກເຂົາບໍ່ເຄີຍພົບມາກ່ອນ ແລະ ລາຍງານວ່າພວກເຂົາມີສະເໜ່ ດຶງດູດຢ່າງໃດນຳ ການລວມສິ່ງເຫລົ່ານີ້ເຂົ້ານຳກັນນັ້ນໄດ້ເຮັດໃຫ້ Hall ສາມາດສ້າງພາບລວມຂອງຄວາມສຳພັນລະຫວ່າງຄວາມຕະຫລົກ ແລະ ຄວາມຮັກໄດ້
ບໍ່ມີຫລັກຖານວ່າທັງສອງເພດນັ້ນມີຄວາມພະຍາຍາມທີ່ຈະເຮັດໃຫ້ຕົວເອງຕະຫລົກຫລາຍຂຶ້ນ ແຕ່ມຸກຕະຫລົກທີ່ຫລາຍຂຶ້ນຈາກຝ່າຍຊາຍ ແລະ ສຽງຫົວທີ່ຫລາຍຂຶ້ນຈາກຝ່າຍຍິງນັ້ນເປັນສັນຍານທີ່ດີວ່ານາງນັ້ນມີຄວາມສົນໃຈໃນດ້ານຂອງຄວາມຮັກ ຊຶ່ງເປັນອ້າງອິງຈາກຂໍ້ມູນສຳຫລວດທີ່ຖືກຕີພິມໃນ Evolutionary Psychology
ຢ່າງໃດກໍຕາມ Hall ບໍ່ພົບຄວາມເຊື່ອມໂຍງລະຫວ່າງຄວາມຕະຫລົກ ແລະ ລະດັບສະຕິປັນຍາແຕ່ຢ່າງໃດ ເຖິງວ່າການເປັນຄົນຕະຫລົກນັ້ນເບິ່ງຄືວ່າຈະມີສ່ວນກ່ຽວຂ້ອງກັບລະດັບການເປັນຄົນເປີດເຜີຍກໍຕາມ
Hall ໄດ້ສະເໜີແນວຄິດ 4 ຂໍ້ວ່າເຫດໃດຄວາມຕະຫລົກເຖິງເບິ່ງມີຄວາມສຳຄັນຫລາຍໃນການສ້າງຄວາມສຳພັນທີ່ມີອາຍຸຍືນຍາວ: ຢ່າງທຳອິດຄືຄວາມຕະຫລົກນັ້ນຊີ້ໃຫ້ເຫັນບຸກຄະລິກທີ່ເຂົ້າສັງຄົມໄດ້ ແລະ ເປັນທີ່ຍອມຮັບ ສອງຄືຄວາມຕະຫລົກນັ້ນຊ່ວຍໃຫ້ຄົນສາມາດວັດໄດ້ວ່າຄວາມສຳພັນທີ່ມີນັ້ນໂອເຄ ຫລືບໍ່ ສາມຄືຄວາມຕະຫລົກນັ້ນໄດ້ກາຍເປັນສິ່ງທີ່ຍອມຮັບກັນໂດຍທົ່ວໄປແລ້ວວ່າເປັນສ່ວນປະກອບຂອງການມີຄວາມຮັກ ແລະ ສຸດທ້າຍຄືຄວາມຕະຫລົກນັ້ນເຮັດຫນ້າທີ່ “ເສັ້ນທາງ”ສູ່ການເຮັດໃຫ້ຄວາມສຳພັນນັ້ນເລິກເຊີ່ງຍິ່ງຂຶ້ນ
“ສ່ວນຫນຶ່ງຂອງຄວາມໝາຍຂອງການເປັນຄົົນທີ່ເຂົ້າສັງຄົມໄດ້ກໍຄືຄວາມສາມາດໃນການເວົ້າເລື່ອງຕະຫລົກກັບຄົນອື່ນໆ” Hall ກ່າວ “ການຫົວ ແລະ ການເວົ້າຕະຫລົກນັ້ນເປັນສິ່ງທີ່ມີພະລັງ ແລະ ຄົງຢູ່ເປັນເວລາດົນ ອີກທັງມັນຍັງກຳນົດທຸກຢ່າງຕັ້ງແຕ່ການຂໍໃຜຄົນໜື່ງເປັນແຟນໄປຈົນເຖິງການຈ່າຍເງິນພ້ອມ”