ຍິງລາວສອງເອື້ອຍນ້ອງເຫັນແກ່ເງິນ ສອງໝື່ນຫ້າ(ເງິນບາດໄທ) ຮັບຈ້າງເອົາຢາບ້າຈາກວຽງຈັນ ຈະໄປສົ່ງທີ່ກຸງເທບຯ ແຕ່ຖືກຈັບໄດ້ຂະນະທີ່ກຳລັງ ລໍຖ້າຂຶ້ນລົດທີ່ໜອງຄາຍ ຄົ້ນພົບຂອງກາງລວມ 10,000 ເມັດ ໃສຖົງຢາງອະນາໄມຕິດໄວ້ຕາມລຳໂຕ ສາລະພາບວ່າ ຈະເອົາໄປກຸງເທບ ແລະຕໍ່ລົງພາກໃຕ້ຂອງໄທ…
ຕາມແຫຼ່ງຂ່າວຈາກປະເທດເພື່ອນບ້ານ ລາຍງານວ່າ ເມື່ອວັນທີ 17 ກັນຍາ 2015 ທີ່ກົມຕຳຫຼວດກວດຄົນເຂົ້າເມືອງ ຈັງຫວັດໜອງຄາຍ ໄດ້ມີການຖະແຫຼງຂ່າວການຈັບກຸມ ນາງວັນເງິນ ອາຍຸ 45 ປີ ແລະ ນາງທອງວັນ ກອງມະນີ ອາຍຸ 47 ປີ ສອງເອື້ອຍນ້ອງ ຈາກບ້ານໂພນຄຳ ເມືອງໄຊທານີ ນະຄອນຫຼວງວຽງຈັນ ຂໍ້ຫາຂົນສົ່ງຢາເສບຕິດປະເພດຢາບ້າ.
ເຈົ້າໜ້າທີ່ໄທຈັບກຸມຜູ້ຕ້ອງຫາ ທັງສອງໄດ້ພ້ອມຂອງກາງຢາບ້າ ບັນຈຸໃນຖົງຢາງສີຢ້າ ຫໍ່ດ້ວຍຖົງຢາງອະນາໄມ ຊຸກເຊື່ອງໄວ້ຕາມລຳໂຕທັງສອງຄົນ ຄົນລະ 5 ແທ່ງ ລວມກັນເປັນ 10 ແທ່ງ ຫຼືຈຳນວນທັງໝົດ 10,000 ເມັດ ຂະນະທີ່ກຳລັງຈະຂຶ້ນລົດໂດຍສານ ປະຈຳທາງໜອງຄາຍ-ກຸງເທບ (ໄທ).
ຈາກການສອບສວນຜູ້ຕ້ອງຫາທັງສອງ ໃຫ້ການວ່າ ພວກຕົນໄດ້ຮັບຈ້າງ ຈາກຜູ້ຍິງຊາວລາວຄົນໜຶ່ງ ຕິດຕໍ່ໃຫ້ຕົນເອົາຢາບ້າມາສົ່ງໃຫ້ຄົນໄທ ໂດຍຈະໃຫ້ຄ່າຈ້າງຄົນລະ 25,000 ບາດ ແລະຈ່າຍຄ່າເດິນທາງໃຫ້ກ່ອນຄົນລະ 5,000 ບາດ ເມື່ອໄປສົ່ງເຖິງກຸງເທບ ຈະມີຄົນໄທໂທລະສັບຕິດຕໍ່ ແລະມາຮັບ ເພື່ອໃຫ້ເອົາຢາບ້າໄປສົ່ງຕໍ່ຢູ່ພາກໃຕ້ ຈາກນັ້ນຈຶ່ງຈະກັບມາຮັບເງິນ ສ່ວນທີ່ເຫຼືອອີກຄົນລະ 20,000 ບາດ.
ນາງວັນເງິນ ແລະນາງທອງວັນ ສອງເອື້ອຍນ້ອງ ໃຫ້ການວ່າ ກ່ອນຈະຂ້າມຝັ່ງໄປທີ່ໜອງຄາຍໄດ້ ມີຜູ້ຊາຍຊາວລາວເອົາຢາບ້າບັນຈຸ ໃນຖົງຢາງສີຟ້າຫໍ່ຫຸ້ມດ້ວຍຖົງຢາງອະນາໄມ ມາໃຫ້ ຈາກນັ້ນພວກຕົນຈຶ່ງໃຊ້ເຊືອກຟາງ ມາມັດຢາບ້າຕັດກັບໂຕເອງ ແລ້ວນຸ່ງເສື້ອຊັ້ນໃນທັບ ຍ່າງເຂົ້າມາໃນສະຖານີຂົນສົ່ງຈັງຫວັດໜອງຄາຍ ເພື່ອຖ້າຂຶ້ນລົດໂດຍສານເຂົ້າໄປກຸງເທບ ແລະມາຖືກເຈົ້າໜ້າທີ່ຂອງໄທ ຈັບກຸມດັ່ງກ່າວ.