ວິກິດການຜູ້ອົບພະຍົບຈາກພາກພື້ນຕາເວັນອອກກາງ ທີ່ພາກັນປົບໜີຈາກຄວາມຮຸນແຮງຂອງສົງຄາມ ແລະ ຄວາມທຸກຍາກ ຈຳໃຈຈາກບ້ານເກີດເມືອງນອນຂອງຕົນ ຫລັ່ງໄຫລກັນເຂົ້າມາສະແຫວງຫາສັນຕິພາບ ແລະ ຊີວິດທີ່ດີກ່ວາຢູ່ເອີຣົບ ຍັງບໍ່ທັນມີທ່າທີຈະຢຸຕິລົງໃນອານາຄົດອັນໃກ້ນີ້ ໂດຍຜູ້ອົບພະຍົບຫລາຍຮ້ອຍຄົນ ຍັງຕ້ອງນອນຕາກໝອກຢູ່ບໍລິເວນຊາຍແດນແຊັກບີ – ຮົງກາລີ ຫລັງຈາກທີ່ລັດຖະບານຮົງກາລີ ສັ່ງປິດຈຸດຜ່ານແດນ ໃນວັນທີ 15 ກັນຍາຜ່ານມາ ແລ້ວສ້າງຮົ້ວລວດໜາມປິດກັ້ນຕະຫລອດແນວຊາຍແດນຂອງຕົນ ແລະ ປະກາດພາວະສຸກເສີນ ສະກັດບໍ່ໃຫ້ຜູ້ອົບພະຍົບເຫລົ່ານີ້ຜ່ານເຂົ້າປະເທດ ເພື່ອເດີນທາງໄປສູ່ເອີຣົບຕາເວັນຕົກ ໃນຂະນະທີ່ຜູ້ອົບພະຍົບບາງສ່ວນ ກໍໄດ້ປ່ຽນຫາເສັ້ນທາງໃໝ່ ເພື່ອຊອກຫາຊີວິດທີ່ດີກ່ວາໃຫ້ແກ່ຕົນເອງ ແລະ ຄອບຄົວ.