ສຳນັກຂ່າວຕ່າງປະເທດ ລາຍງານໃນວັນທີ 17 ກັນຍານີ້ວ່າ ເກີດເຫດຜູ້ອົບພະຍົບທີ່ໜີຄວາມຮຸນແຮງມາຈາກພາກພື້ນຕາເວັນອອກກາງ ແລ້ວຕິດຄ້າງຢູ່ບໍລິເວນຊາຍແດນປະເທດແຊັກບີ ເຊື່ອມຕໍ່ກັບປະເທດຮົງກາລີ ປະເຊີນໜ້າກັບເຈົ້າໜ້າທີ່ຂອງຮົງກາລີ ຢູ່ຊາຍແດນເມືອງເຮີກອດ ປະເທດແຊັກບີ ຫລັງຈາກທີ່ພວກເຂົາພະຍາຍາມຈະບຸກຂ້າມຮົ້ວກັ້ນຊາຍແດນ ເພື່ອເຂົ້າປະເທດຮົງກາລີໂດຍມີຈຸດປະສົງເດີນທາງໄປຍັງເອີຣົບຕາເວັນຕົກ ແຕ່ຖືກເຈົ້າໜ້າທີ່ຕຳຫລວດປາບຈະລາຈົນຮົງກາລີ ຕັດສິນໃຈຍິງແກັສນ້ຳຕາ ແລະ ປືນສີດນ້ຳແຮງດັນສູງໃສ່ ເຮັດໃຫ້ກຸ່ມຜູ້ອົບພະຍົບແກ່ວງແກ້ວ ແລະ ກ້ອນຫີນຕອບໂຕ້.
ທັງນີ້ ເຫດຄວາມວຸ້ນວາຍດັ່ງກ່າວ ເກີດຂຶ້ນພາຍຫລັງທີ່ລັດຖະບານຮົງກາລີ ດຳເນີນມາດຕະການປິດທາງຂ້າມຊາຍແດນແຫ່ງສຸດທ້າຍດັ່ງກ່າວນີ້ ໃນວັນອັງຄານ ທີ 15 ກັນຍາຜ່ານມາ ໂດຍກຸ່ມຜູ້ອົບພະຍົບພະຍາຍາມຮຽກຮ້ອງໃຫ້ຮົງກາລີເປີດຊາຍແດນ ແລະ ຫລາຍຄົນຢືນຢັນຈະຕັ້ງຫລັກຮຽກຮ້ອງຢູ່ບ່ອນເກົ່ານີ້ ແຕ່ກໍມີກຸ່ມຜູ້ອົບພະຍົບບາງສ່ວນ ປ່ຽນໃຈມຸ່ງໜ້າສູ່ປະເທດໂກຣອາຊີ ໂດຍຫວັງໃຊ້ເປັນເສັ້ນທາງໃໝ່ ໃນການເດີນທາງເຂົ້າສູ່ເອີລົບຕາເວັນຕົກ.
ດ້ານກະຊວງພາຍໃນຂອງໂກຣອາຊີ ໄດ້ອອກມາເປີດເຜີຍວ່າ ພວກເຂົາໄດ້ສະກັດຈັບຜູ້ອົບພະຍົບຫລາຍສັນຊາດ ຈຳນວນ 373 ຄົນ ໃນນັ້ນມີແມ່ຍິງ 75 ຄົນ ແລະ ເດັກນ້ອຍອີກ 73 ຄົນ ເດີນທາງເຂົ້າປະເທດແບບຜິດກົດໝາຍ ກ່ອນທີ່ຈະນຳຕົວຜູ້ອົບພະຍົບດັ່ງກ່າວນີ້ໄປລົງທະບຽນຢູ່ສູນຜູ້ອົບພະຍົບນະຄອນຫລວງຊາເກຣັບ ຊຶ່ງພວກເຂົາໄດ້ຮັບການປະຕິບັດຢ່າງເປັນມິດ ຫລາຍກ່ວາຢູ່ຮົງກາລີ.
