ຕອນທ່ຽງອາທິດກ່ອນໄດ້ໄປກິນອາຫານ ຢູ່ຮ້ານບຸບເຟຫວານເຢັນ ບ້ານສວນສະຫວັນເມືອງ ປາກເຊ (ຂ້າງສາງມະຫາໄຊ) ເພາະໄດ້ຍິນວ່າເປັນບຸບເຟລາຄາຖືກ “ ພຽງ 10.000 ກີບກໍ່ອີ່ມໄດ້ ” ນອກນັ້ນ ຍັງມີຂອງຫວານ ແຖມລ້ານຳອີກ ເຊິ່ງໃນສະພາບລາຍຮັບມັນບໍ່ຄ່ອຍ ເຫັນດີກັບລາຍຈ່າຍຄືຊູ່ມື້ນີ້ ບຸບເຟແບບທີ່ວ່າຈຶ່ງ ເປັນຄຳຕອບໄດ້ເປັນຢ່າງດີ.
ເອື້ອຍ ໝ້ອງ ແສງທອງ ເຈົ້າຂອງຮ້ານບຸບເຟຫວານເຢັນ ເລົ່າສູ່ຟັງພໍຫຍໍ້ໆວ່າ: ໄດ້ເລີ່ມ ເຮັດ ບຸບເຟນີ້ມາແຕ່ເດືອນ 2 ( ເດືອນກຸມພາ 2015 ) ໂດຍໄປເຫັນຈາກ ປະເທດໃກ້ຄຽງເຮົາ. ທຳອິດ ມີເຂົ້າປຸ້ນ ແລະ ໝີ່, ຕໍ່ມາອີກ 2 ເດືອນ ຈຶ່ງເຮັດເຂົ້າລາດໜ້າຕື່ມ ມີອາຫານລາດໜ້າ 5 ເຍື່ອງ ໃນລາຄາ 10.000 ກີບແລະ ແຖມນຳ້ຫວານນຳອີກ ທັງສອງລາຍການ. ເອື້ອຍໝ້ອງບອກວ່າທີ່ສາມາດ ເຮັດໃນລາ ຄາຖືກໄດ້ຍ້ອນອາໄສຂາຍນຳ້ດື່ມ, ນຳ້ປັ່ນໝາກໄມ້, ຕຳສົ້ມ, ອາຫານຕາມສັ່ງ… ສະນັ້ນ, ຖ້າຫາກແຂກ ເອົານຳ້ດື່ມມາກິນນຳທາງຮ້ານກໍ່ຈະບໍ່ມີກຳໄລ. ສຳລັບລູກຄ້າສ່ວນຫຼາຍແມ່ນພະນັກງານ, ນັກຮຽນ ນັກສຶກສາເຊິ່ງບຸບເຟ ຈະເປີດແຕ່ 9.30 – 13.00 ໂມງ. ນອກນັ້ນ ທາງຮ້ານຍັງມີບໍລິການຕໍ່ສຳລັບຜູ້ທີ່ ມັກໃນກິລາເປຕັງ ທີ່ສາມາດຫຼິ້ນກີລາ ແລະ ດື່ມກິນໄປນຳ. ສ່ວນຜູ້ທີ່ບໍ່ມັກຫຼິ້ນກິລາ ແຕ່ມານັ່ງດື່ມ ທາງຮ້ານຍັງມີແຖມເບຍໃຫ້ລ້າ 1 ແກ້ວ ຖ້າຊື້ເບຍ 4 ແກ້ວ.
ບຸບເຟລາຄາຖືກ ອາຫານສະອາດ ບັນຍາກາດດີ ນັບວ່າເປັນອີກທາງເລືອກໜຶ່ງ ຂອງພະນັກງານ ນັກຮຽນນັກສຶກສາ ແລະ ແຂກທົ່ວໄປ ທີ່ຕ້ອງການປະຢັດ ແຕ່ໄດ້ກິນອີ່ມ. ເອົາເປັນວ່າ ທຸລະກິດຂວັນໃຈ ຄົນລາຍຮັບໜ້ອຍແບບນີ້ທີ່ບໍ່ຄ່ອຍມີ ຈຶ່ງຄວນສົ່ງເສີມຊ່ວຍກັນ ( ກິນພໍດີ ) ເພື່ອໃຫ້ທຸລະກິດ ຂອງເພິ່ນ ຢູ່ໄດ້ ແລະ ຂະຫຍາຍຕົວຕໍ່ໄປ. ທ່ານຜູ້ອ່ານທ່ານໄດ້ ມີໂອກາດໄດ້ມາປາກເຊ ຢ່າລືມແວ່ສຳຜັດໃຫ້ໄດ້ ແລະຢ່າລືມຊື້ນ້ຳເພິ່ນດື່ມແດ່ເດີ ເພາະກຳໄລຢູ່ກັບເຄື່ອງດື່ມຕ່າງໆ.
ໂດຍ: ຫຼານພໍ່ເຖົ້າ
ລາຍງານຈາກ: ໜັງສືພິມຈຳປາໃໝ່ ແຂວງຈຳປາສັກ