ສຳນັກຂ່າວຕ່າງປະເທດ ລາຍງານວ່າ ໃນວັນອັງຄານທີ 15 ກັນຍາຜ່ານມານີ້ ລັດຖະບານຮຸງກາລີ ໄດ້ປະກາດພາວະສຸກເສີນໃນບໍລິເວນຊາຍແດນຕໍ່ກັບປະເທດແຊັກບີແລ້ວ ເພື່ອຮັບມືກັບວິກິດການຜູ້ອົບພະຍົບລັກລອບເຂົ້າປະເທດ ໂດຍໃນມື້ດຽວກັນຕຳຫລວດຮຸງກາລີ ໄດ້ດຳເນີນການຈັບກຸມຜູ້ອົບພະຍົບທີ່ອ້າງວ່າເປັນຊາວຊີຣີ ແລະ ອັບການິດສະຖານ ລັກລອບເຂົ້າຮຸງກາລີແບບຜິດກົດໝາຍຜ່ານຊາຍແດນແຊັກບີຈຳນວນ 60 ຄົນ.
ການປະກາດພາວະສຸກເສີນດັ່ງກ່າວນີ້ ເກີດຂຶ້ນພຽງໜຶ່ງວັນ ຫລັງຈາກທີ່ລັດຖະບານຮຸງກາລີ ໄດ້ສັ່ງໃຫ້ມີການສ້າງຮົ້ວລວດໜາມຂັ້ນຕະຫລອດແນວຊາຍແດນຕິດກັບແຊັກບີ ຢູ່ບໍລິເວນເມືອງຣອດເຄ ຊຶ່ງມີຄວາມຍາວທັງໝົດ 175 ກິໂລແມັດ ພ້ອມທັງໄດ້ປິດກັ້ນເສັ້ນທາງລົດໄຟ ອັນເປັນເສັ້ນທາງຫລັກທີ່ຜູ້ອົບພະຍົບໃຊ້ໃນການເດີນທາງເຂົ້າຮຸງກາລີ.
ທ່ານ ໂຊນຕັນ ໂຄວັກ ໂຄສົກລັດຖະບານຮຸງກາລີໄດ້ຖະແຫລງວ່າ ຜູ້ອົບພະຍົບຍັງມີໂອກາດເຂົ້າສູ່ຮຸງກາລີ ຫລື ປະເທດອື່ນໆໃນສະຫະພາບເອີຣົບໄດ້ ດ້ວຍວິທີການຢ່າງເປັນທາງການ ແລະ ຖືກຕ້ອງຕາມກົດໝາຍ ໂດຍຕ້ອງການໃຫ້ຜູ້ອົບພະຍົບປະຕິບັດຕາມກົດໝາຍລະຫວ່າງປະເທດ ແລະ ກົດໝາຍຂອງສະຫະພາບເອີຣົບເທົ່ານັ້ນ.
ທັງນີ້ ສະຫະພາບເອີຣົບຍັງບໍ່ສາມາດຕົກລົງກັນໄດ້ ກ່ຽວກັບແຜນການເພີ່ມໂກຕາກະຈາຍຜູ້ອົບພະຍົບ ຈາກຈຳນວນ 40,000 ຄົນ ມາເປັນ 120,000 ຄົນ ຈາກປະເທດເກຣັກ ແລະ ອີຕາລີ ໄປຍັງປະເທດສະມາຊິກອື່ນໆ ຊຶ່ງແຜນການດັ່ງກ່າວໄດ້ຖືກຄັດຄ້ານໂດຍສາທາລະນະລັດເຊັກ, ສະໂລວັກ ແລະ ຮຸງກາລີ.
ດ້ານ ທ່ານ ໂທມັສ ເດີ ເມຊີແອ ລັດຖະມົນຕີວ່າການກະຊວງພາຍໃນເຢຍລະມັນໄດ້ອອກມາຖະແຫລງວ່າ ສະຫະພາບເອີຣົບຄວນມີມາດຕະການກົດດັນປະເທດສະມາຊິກ ໃຫ້ປະຕິບັດຕາມແຜນແບ່ງໂກຕາຜູ້ອົບພະຍົບດັ່ງກ່າວ ເຊັ່ນການຫລຸດເງິນງົບປະມານໃຫ້ປະເທດເຫລົ່ານັ້ນ ດັ່ງນີ້ເປັນຕົ້ນ.
