ເຈົ້າເມືອງນານ ສີວອນ ວົງຄໍາຈັນ ໃຫ້ຮູ້ວ່າ: ປັດຈຸບັນແມ່ນມີຄວາມຕ້ອງການກົນຈັກໜັກເຊັ່ນ: ລົດຈົກ, ລົດດ້າມເປັນຈໍານວນຫລາຍ, ເພື່ອສຸມໃສ່ແກ້ໄຂຜົນກະທົບຈາກເຫດການພູເຈື່ອນກະທັນຫັນໃນບໍລິເວນແຫລ່ງທ່ອງທ່ຽວທໍາມະຊາດນໍ້າຕົກຕາດຮ່ຽນທີ່ບ້ານນາຝາຍ ແລະ ບ້ານສີບຸນເຮືອງ, ເມືອງນານ ແຂວງຫລວງພະບາງ ໃນຕອນບ່າຍວັນທີ 8 ກັນຍາຜ່ານມານັ້ນໃຫ້ສໍາເລັດໂດຍໄວ, ພາຍຫລັງເຫັນວ່າໜ້າວຽກທີ່ໃຊ້ກໍາລັງແຮງງານຄົນແມ່ນເບົາບາງລົງຫລາຍແລ້ວ, ຂະນະທີ່ຜູ້ໄດ້ຮັບຜົນກະທົບຈາກໄພທໍາມະຊາດເທື່ອນີ້ ແມ່ນໄດ້ຮັບເງິນຊ່ວຍເຫລືອເບື້ອງຕົ້ນແລ້ວຈໍານວນໜຶ່ງ.
ທ່ານເຈົ້າເມືອງດັ່ງກ່າວໃຫ້ຮູ້ວ່າ: ພາຍຫລັງເກີດເຫດຮ້າຍແຮງດັ່ງກ່າວ, ອໍານາດການປົກຄອງທ້ອງຖິ່ນໄດ້ລະດົມກໍາລັງຫລາຍພາກສ່ວນເຂົ້າຊ່ວຍເຫລືອຢ່າງເລັ່ງດ່ວນ, ຈົນຮອດປັດຈຸບັນບາງບ່ອນໄດ້ຄ່ອຍໆກັບຄືນສູ່ສະພາບປົກກະຕິແລ້ວເປັນຕົ້ນ: ການອະນາໄມເຮືອນປະຊາຊົນທີ່ມີງ່າໄມ້ ແລະ ດິນໄຫລເຂົ້າຖົມແມ່ນສໍາເລັດແລ້ວ, ສ່ວນການປັບປຸງສ້ອມແປງ
ເສັ້ນທາງພາຍໃນບ້ານທີ່ຖືກດິນ ແລະ ຕົ້ນໄມ້ຂະໜາດໃຫຍ່ຖົມນັ້ນແມ່ນຕ້ອງໄດ້ໃຊ້ລົດຈົກ, ລົດດ້າມຂົນດິນອອກຈາກພື້ນທີ່, ສ່ວນຕົ້ນໄມ້ຈໍານວນໜຶ່ງແມ່ນມີຜູ້ປະກອບການໂຮງເລື່ອຍຢູ່ເມືອງໄດ້ມາຮັບຊື້ເອົາແລ້ວ ແລະ ປັດຈຸບັນໄດ້ສະເໜີຕໍ່ແຂວງເພື່ອຄົ້ນຄວ້າຫາລົດຈົກ, ລົດດ້າມມາຊ່ວຍຕື່ມເພື່ອເຮັດໃຫ້ການແກ້ໄຂສໍາເລັດໂດຍໄວ.
ເຈົ້າເມືອງດັ່ງກ່າວໃຫ້ຮຸ້ວ່າ: ສໍາລັບຄວາມເສຍຫາຍຈາກເຫດການໄພທໍາມະຊາດເທື່ອນີ້ແມ່ນໜັກໜ່ວງສົມຄວນຄື: ມີເຮືອນປະຊາຊົນຢູ່ບ້ານນາຝາຍ 9 ຫລັງຖືກນໍ້າພັດສູນຫາຍ, 24 ຫລັງເປ່ເພ ແລະ ອີກ 8 ຫລັງຢູ່ບ້ານສີບຸນເຮືອງ, ໃນນີ້ມີຜູ້ເສຍຊີວິດ 4 ຄົນຍ້ອນຖືກດິນຖົມ, ຄາດວ່າຈະມີມູນຄ່າເສຍຫາຍຫລາຍກວ່າ 13 ຕື້ກີບ ແລະ ມາຮອດປັດຈຸບັນໄດ້ຮັບການຊ່ວຍເຫລືອເປັນເງິນ ແລະ ວັດຖຸປະກອບມີ: ຫ້ອງວ່າການແຂວງຫລວງພະບາງມີ 10 ລ້ານກີບ, ແຂວງໄຊຍະບູລີ 10 ລ້ານກີບ, ອົງການກາແດງແຂວງຫລວງພະບາງເຂົ້າສານ 1 ໂຕນ ແລະ ນໍ້າດື່ມຈໍານວນໜຶ່ງ, ກະຊວງການເງິນ 60 ລ້ານກີບ, ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ 50 ລ້ານກີບ ແລະ ມີຫົວໜ່ວຍທຸລະກິດຈໍານວນໜຶ່ງໄດ້ມອບເງິນ ແລະ ສັງກະສີຫລາຍກວ່າ 2.400 ແຜ່ນ ແລະ ສໍາລັບຄອບຄົວຜູ້ເສຍຊີວິດ 4 ຄົນກໍໄດ້ຮັບເງິນຊ່ວຍກິນທານແລ້ວຄອບຄົວລະ 1,5 ລ້ານກີບ, ສ່ວນຜູ້ທີ່ໄດ້ຮັບຜົນກະທົບກໍໄດ້ຮັບການຊ່ວຍເຫລືອເບື້ອງຕົ້ນແລ້ວຄອບຄົວລະ 1,5 -3 ລ້ານກີບ.
ແຫລ່ງຂ່າວ:
