ກອງປະຊຸມໃຫຍ່ຄັ້ງທີ I ອົງຄະນະພັກກະຊວງພາຍໃນ ໄດ້ໄຂຂຶ້ນໃນວັນທີ 10 ກັນຍານີ້ທີ່ຫໍປະຊຸມແຫ່ງຊາດ, ໂດຍການໃຫ້ກຽດເຂົ້າຮ່ວມຂອງສະຫາຍ ອາຊາງ ລາວລີ ກໍາມະການກົມການເມືອງສູນກາງພັກ, ຮອນາຍົກລັດຖະ ມົນຕີ, ໂດຍມີຜູ້ແທນສົມບູນ 183 ສະຫາຍທີ່ເປັນຕົວແທນໃຫ້ທົ່ວຂະແໜງການດັ່ງກ່າວເຂົ້າຮ່ວມ.
ສະຫາຍ ຄໍາໝັ້ນ ສູນວິເລີດ ກໍາມະການສູນກາງພັກ, ເລຂາຄະນະພັກກະຊວງພາຍໃນໄດ້ຂຶ້ນຜ່ານບົດລາຍງານການເມືອງຕໍ່ກອງປະຊຸມວ່າ: ໃນໄລຍະ 5 ປີຜ່ານມາ, ຄະນະພັກກະຊວງພາຍໃນໄດ້ເອົາໃຈໃສ່ຊີ້ນໍາ-ນໍາພາຈັດຕັ້ງຜັນຂະຫຍາຍມະຕິ, ຄໍາສັ່ງຂອງພັກ, ໂດຍສະເພາະມະຕິກອງປະຊຸມໃຫຍ່ຄັ້ງທີ IX ຂອງພັກ,ແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ VII ທີ່ພົວພັນເຖິງຄວາມຮັບຜິດຊອບຂອງຂະແໜງພາຍໃນໄດ້ຫັນເປັນແຜນງານ,ແຜນການ ແລະ ໂຄງການທີ່ມີຜົນສໍາເລັດໃນແຕ່ລະຂົງເຂດເປັນຕົ້ນຂົງເຂດການປົກຄອງ-ບໍລິຫານວຽກງານປັບປຸງກົງຈັກການຈັດຕັ້ງໃຫ້ກະທັດຮັດແທດເໝາະກັບແຕ່ລະໜ້າທີ່ການຈັດຕັ້ງໂດຍການສົມທົບກັບບັນດາກະຊວງ-ອົງການ ແລະທ້ອງຖິ່ນທົບທວນຄືນພາລະບົດບາດໜ້າທີ່ ແລະ ຂອບເຂດແຕ່ລະອົງການຈັດຕັ້ງຄືນໃໝ່,ໂດຍສະເພາະແມ່ນການແບ່ງຂັ້ນ,ແບ່ງຄວາມຮັບຜິດຊອບລະຫວ່າງສູນກາງ ແລະທ້ອງຖິ່ນ ແລະ ຢູ່ແຕ່ລະຂັ້ນຂອງອົງການປົກຄອງທ້ອງຖິ່ນຕາມທິດ 3 ສ້າງ,ໄດ້ສືບຕໍ່ແນະນໍາບັນດາກະຊວງ-ອົງການທີ່ໄດ້ຮັບການຊັບຊ້ອນ ແລະ ສ້າງຕັ້ງຂຶ້ນໃໝ່ 7 ກະຊວງເຮັດໃຫ້ກົງຈັກການຈັດຕັ້ງມີສະຖຽນລະພາບ ແລະມີຄວາມສະຫງົບ, ວຽກງານບໍລິຫານ ແລະນິຕິກໍາໄດ້ທົບທວນຄືນ ແລະ ປັບປຸງບັນດານິຕິກໍາຕ່າງໆທີ່ມີແລ້ວໃຫ້ສອດຄ່ອງກັບນະໂຍບາຍ 3 ສ້າງ, ວຽກງານການປົກຄອງຄະນະພັກໄດ້ນໍາພາປັບປຸງການບໍລິຫານລັດຢູ່ຂັ້ນທ້ອງຖິ່ນ, ຂັ້ນແຂວງ, ເມືອງ ແລະຂັ້ນຮາກຖານບ້ານໃຫ້ກາຍເປັນອົງການບໍລິຫານທ້ອງຖິ່ນເພື່ອບໍລິການແກ່ປະຊາຊົນ, ເອົາໃຈໃສ່ປັບປຸງວຽກງານຄຸ້ມຄອງອົງການຈັດຕັ້ງທາງສັງຄົມໃຫ້ເຂົ້າສູ່ລະບຽບການ ເຮັດໃຫ້ການຈັດຕັ້ງ ແລະການເຄື່ອນໄຫວຂອງອົງການຈັດຕັ້ງທາງສັງຄົມມີດ້ານຕັ້ງໜ້າ ແລະດີຂຶ້ນ.ປັດຈຸບັນມີສະມາຄົມ, ມູນນິທິໄດ້ຮັບອະມັດລົງທະບຽນແລ້ວຈໍານວນ149 ຫົວໜ່ວຍ,ໃນນັ້ນມີມູນນິທິ 10 ຫົວໜ່ວຍ,ວຽກງານຊົນເຜົ່າ ແລະສາສະໜາເປັນວຽກໜຶ່ງທີ່ສໍາຄັນຂອງພັກ-ລັດຖະບານ,ຄະນະພັກໄດ້ເອົາໃຈໃສ່ນໍາພາປັບປຸງບັນດານິຕິກໍາ ແລະລະບຽບການຕ່າງໆທີ່ກ່ຽວຂ້ອງກັບຊົນເຜົ່າ ແລະສາສະໜາ. ຂົງເຂດເຕັກນິກການປົກຄອງວຽກງານຄຸ້ມຄອງສໍາເນົາເອກະສານ ເພື່ອປັບປຸງລະບົບປົກປັກຮັກສາບັນດາເອກະສານທີ່ສໍາຄັນຂອງພັກ-ລັດທີ່ເປັນຂໍ້ມູນທາງດ້ານການເມືອງ, ປະຫວັດສາດ, ເສດຖະກິດ-ສັງຄົມ, ປ້ອງກັນຊາດ-ປ້ອງກັນຄວາມສະຫງົບ ແລະອື່ນໆ.ກອງປະຊຸມຈະດໍາເນີນໄປເປັນເວລາ2ວັນແລະຍັງຈະໄດ້ປ່ອນບັດເລືອກຕັ້ງຄະນະບໍລິຫານງານພັກກະຊວງຊຸດໃໝ່ແລະເລືອກເອົາຜູ້ແທນສົມບູນ, ສຳຮອງເພື່ອເຂົ້າຮ່ວມກອງປະຊຸມໃຫຍ່ຜູ້ແທນທົ່ວປະເທດຄັ້ງທີ X ຂອງພັກປະຊາຊົນປະຕິວັດລາວ.
ແຫລ່ງຂ່າວ:
