ສຳນັກຂ່າວຕ່າງປະເທດ ລາຍງານໃນວັນທີ 9 ກັນຍາຜ່ານມານີ້ວ່າ ກຸ່ມຕິດອາວຸດອິດສະລາມຫລາຍກຸ່ມໄດ້ຮ່ວມມືກັນເປັນພັນທະມິດ ແລ້ວສ້າງຕັ້ງເປັນ ກອງທັບແຫ່ງໄຊຊະນະ (Army of Conquest) ໄດ້ບຸກເຂົ້າໂຈມຕີ ແລະ ຍຶດເອົາຖານທັບອາກາດ ອາບູ ອັນ ອູຮູ ຊຶ່ງເປັນຖານທັບອາກາດແຫ່ງສຸດທ້າຍໃນແຂວງອິດລິບ ທີ່ລັດຖະບານຊີຣີຄວບຄຸມຢູ່ ໂດຍເລີ່ມຕັ້ງແຕ່ເດືອນມີນາເປັນຕົ້ນມາ ກຸ່ມຕິດອາວຸດດັ່ງກ່າວ ແມ່ນສາມາດຍຶດຄອງຫລາຍເມືອງໃນແຂວງອິດລິບໄດ້ແລ້ວ.

ການສູນເສຍຖານທັບອາກາດ ອາບູ ອັນ ອູຮູ ໃນຄັ້ງນີ້ ແມ່ນເປັນຂີດໝາຍໃຫ້ເຫັນເຖິງຄວາມເຂັ້ມແຂງຂອງກຸ່ມຕິດອາວຸດ ທີ່ສາມາດຄວບຄຸມພື້ນທີ່ເກືອບທັງໝົດຂອງແຂວງອິດລິບ ແລະ ສະແດງໃຫ້ເຫັນເຖິງສະພາບການຂອງສົງຄາມພາຍໃນ ທີ່ນັບມື້ນັບແຜ່ລາມອອກສູ່ວົງກວ້າງຫລາຍຂຶ້ນ ຊຶ່ງລັດຖະບານຊີຣີເອງຍັງບໍ່ທັນສາມາດຮັກສາດິນແດນຂອງຕົນເອງໃນຫລາຍພື້ນທີ່ ຈາກການບຸກໂຈມຕີ ແລະ ຍຶດຄອງຂອງກຸ່ມຕິດອາວຸດ, ສົ່ງຜົນເຮັດໃຫ້ປະຊາຊົນຊາວຊີຣີຫລາຍໝື່ນຄົນ ພາກັນອົບພະຍົບໜີຕາຍໄປສູ່ທະວີບເອີຣົບ ໃນປັດຈຸບັນ.