ສານຕັດສິນປະຫານຊີວິດ 7 ຄົນ ໃນສະຖານຄ້າຂາຍຢາເສບຕິດ
—————————————
ຄະນະສານອາຍາ ສານປະຊາຊົນຂັ້ນຕົ້ນ ແຂວງຫຼວງນ້ຳທາ ໄດ້ຕັດສິນປະຫານຊີວິດ ທ້າວ ໜໍ ອາຍຸ 45 ປີ (ສັນຊາດຈີນ) ພັກເຊົາຢູ່ບ້ານຊຽງ ແລະ ທ້າວ ໃໝ່ຈ້ອຍ ຢູ່ບ້ານຊຽງ ເມືອງສິງ ແຂວງຫຼວງນ້ຳທາ ໃນສະຖານຂົນສົ່ງຢາເສບຕິດ (ເຮໂລອິນ) ຕາມມາດຕາ 146 ຂໍ້ 2 ວັກ 4 ຂອງກົດໝາຍອາຍາ.
ອີງຕາມສຳນວນຄະດີຊາບວ່າ: ວັນທີ 28 ສິງຫາ 2014 ທ້າວ ໜໍ ຮ່ວມກັບທ້າວ ໃໝ່ຈ້ອຍ ນຳເອົາ ເຮໂລອິນ ຈຳນວນ 2 ແທ່ງ ນ້ຳໜັກ 700 ກຼາມ ໄປສົ່ງໃຫ້ທ້າວ ໜານອີ່ນ ຢູ່ບ້ານຊຽງມູນ ແຕ່ໃນເວລາມາພັກເຊົາຢູ່ເຮືອນພັກແຫ່ງໜຶ່ງ ເຂດຕະຫຼາດເມືອງສິງ ຈຶ່ງຖືກເຈົ້າໜ້າທີ່ກັກຕົວພ້ອມຂອງກາງມາດຳເນີນຄະດີ.
ໃນວັນດຽວກັນ ຄະນະສານອາຍາ ສານປະຊາຊົນຂັ້ນຕົ້ນ ແຂວງຫຼວງນ້ຳທາ ໄດ້ຕັດສິນປະຫານຊີວິດເພີ່ມອີກຄື: ທ້າວ ໃໝ່ອຸ່ນແສງ ອາຍຸ 42 ປີ ທ້າວ ໃໝ່ຈ່າຍປີ ອາຍຸ 28 ປີ ທັງສອງຢູ່ບ້ານຊຽງມູນ ທ້າວ ໃໝ່ຂຸ່ງ ອາຍຸ 38 ປີ ຢູ່ບ້ານນ້ຳກຽງ ເມືອງສິງ ແຂວງຫຼວງນ້ຳທາ ແລະ ທ້າວ ຕຸນ ອາຍຸ 35 ປີ ຢູ່ບ້ານດົງສະຫວາດ ເມືອງສີສັດຕະນາກ ນະຄອນຫຼວງວຽງຈັນ ໃນສະຖານຂົນສົ່ງຢາເສບຕິດ (ຢາໄອ) ຕາມມາດຕາ 146 ຂໍ້ 2 ວັກ 4 ຂອງກົດໝາຍອາຍາ ເຊິ່ງຈຳເລີຍທັງ 4 ຄົນໄດ້ຮັບສາລະພາບວ່າ: ໃນເດືອນມິຖຸນາ 2013 ພວກຈຳເລີຍໄດ້ຮ່ວມກັນຂົນສົ່ງຫົວນ້ຳແຂງ (ຫົວເຊື້ອຜະລິດຢາໄອ) ນ້ຳໜັກ 56 ກິໂລກຼາມ ຈາກປະເທດມຽນມາເຂົ້າມາລາວ ແຕ່ພໍມາຮອດຊາຍແດນ ລາວ-ມຽນມາ ໄດ້ຖືກເຈົ້າໜ້າທີ່ລາວ ກວດຄົ້ນພົບເຫັນຢາບ້າຈຳນວນດັ່ງກ່າວພ້ອມກັກຕົວ.
ພ້ອມກັນນັ້ນ ຄະນະສານອາຍາ ສານປະຊາຊົນຂັ້ນຕົ້ນ ແຂວງຫຼວງນ້ຳທາ ກໍ່ຍັງໄດ້ຕັດສິນປະຫານຊີວິດທ້າວ ໜອງຂາວ ອາຍຸ 32 ປີ ທ້າວ ແປງ ອາຍຸ 49 ປີ ແລະ ທ້າວ ອິນ ອາຍຸ 30 ປີ (ສັນຊາດມຽນມາ) ທັງສາມຢູ່ບ້ານນາຄຳ ເມືອງສິງ ແຂວງຫຼວງນ້ຳທາ ໃນສະຖານຂົນສົ່ງຢາເສບຕິດ (ຢາບ້າ) ຕາມມາດຕາ 146 ຂໍ້ 2 ວັກ 4 ຂອງກົດໝາຍອາຍາ ສ່ວນທ້າວ ກອງ ອາຍຸ 26 ປີ ຢູ່ບ້ານມອມ ແລະ ທ້າວ ຄຳແກ້ວ ອາຍຸ 26 ປີ ຢູ່ບ້ານນາຄຳ ເມືອງສິງ ແຂວງຫຼວງນ້ຳທາ ຖືກຈຳຄຸກຄົນລະ 15 ປີ ພ້ອມທັງປັບໃໝເງິນຄົນລະ 100.000.000 ກີບ ໃນສະຖານຮ່ວມກັນກະທຳຜິດໃນມາດຕາ 17 ຂອງກົດໝາຍອາຍາ ພວກຈຳເລີຍທັງ 5 ຄົນ ໄດ້ສາລະພາບວ່າ: ໃນເດືອນເມສາ 2013 ຈຳເລີຍທັງ 3 ຄົນຄື: ທ້າວ ໜອງຂາວ ທ້າວ ແປງ ແລະ ທ້າວ ອິນ ໄດ້ຮ່ວມກັນນຳເອົາຢາບ້າຈຳນວນ 30 ມັດ ເທົ່າກັບ 6 ກິໂລກຼາມ ມາແຕ່ປະເທດມຽນມາເຂົ້າມາລາວ ໂດຍຈະມາສົ່ງໃຫ້ທ້າວ ກອງ ແລະ ທ້າວ ຄຳແກ້ວ ໄປສົ່ງໃຫ້ລູກຄ້າບໍ່ຊາບຊື່ ຈະມາຮັບຊື້ຢາບ້າ ແຕ່ພໍມາຮອດດ່ານລາວ-ມຽນມາ ໄດ້ຖືກເຈົ້າໜ້າທີ່ຄົ້ນພົບຈຶ່ງກັກຕົວມາດຳເນີນຄະດີດັ່ງກ່າວ.
ພາບແລະຂ່າວ: ວຽງຈັນໃໝ່
