ສຳນັກຂ່າວປະເທດຈີນລາຍງານວ່າ ເກີດເຫດຂັ້ນໄດເລື່ອນ ບໍລິເວນສູນການຄ້າແຫ່ງໜຶ່ງໃນນະຄອນຊ່ຽງໄຮ້ ເມື່ອຢູ່ດີໆ ແຜ່ນຂັ້ນໄດເລື່ອນນັບສິບຂັ້ນເກີດຍຸບຕົວລົງໄປ ເຜີຍໃຫ້ເຫັນຊິ້ນສ່ວນເຄື່ອງຈັກຕ່າງໆ ທີ່ຢູ່ກ້ອງຂັ້ນໄດເລື່ອນ ແຕ່ນັບວ່າໂຊກດີທີ່ບໍ່ມີຜູ້ໃດປະສົບເຫດດັ່ງກ່າວ
ເຫດດັ່ງກ່າວເກີດຂຶ້ນເມື່ອວັນທີ່ 4 ກັນຍາ ຕາມເວລາທ້ອງຖິ່ນ ຂັ້ນໄດເລື່ອນທີ່ສູນການຄ້າແຫ່ງໜຶ່ງເກີດຂັດຂ້ອງແລະຍຸບຕົວລົງໄປຢ່າງກະທັນຫັນ ພະຍານຜູ້ເຫັນເຫດການເປີດເຜີຍວ່າ ຕອນເກີດເຫດ ໄດເລື່ອນກໍເກີດຕິດຂັດແລະຂັດຂ້ອງ ກ່ອນທີ່ແຜ່ນຂັ້ນໄດຈະຍຸບຕົວລົງ ຕັ້ງແຕ່ຈາກຊັ້ນເທິງລົງມາເຖິງຊັ້ນລຸມ ເສຍຫາຍໄປກວ່າ 10 ຂັ້ນ ແຕ່ໂຊກດີທີ່ເວລານັ້ນບໍ່ມີຜູ້ໃດໃຊ້ຂັ້ນໄດເລື່ອນ ເຈົ້າຫນ້າທີ່ສູນການຄ້າທີ່ຢູ່ໃກ້ຄຽງ ຈຶ່ງເຂົ້າມາກົດປຸ່ມຢຸດການເຮັດວຽກແລະປິດກັ້ນພື້ນທີ່ເອົາໄວ້
ຈາກການກວດສອບພົບວ່າ ຂັ້ນໄດເລື່ອນທີ່ເກີດເຫດນັ້ນ ເປີດໃຊ້ບໍລິການມາຫລາຍປີ ທີ່ຜ່ານມາມີລາຍງານບັນຫາເທກນິກເປັນບາງເທື່ອ ມີເຈົ້າຫນ້າທີ່ສ້ອມແຊມແລະເປີດໃຊ້ບໍລິການໄດ້ຕາມປົກກະຕິ ແຕ່ຈຸດດັ່ງກ່າວບໍ່ແມ່ນຈຸດທີ່ຜູ້ໃຊ້ບໍລິການພ່ານ ເຮັດໃຫ້ເຫດດັ່ງກ່າວບໍ່ມີຜູ້ປະສົບເຫດ ສ່ວນເຫດດັ່ງກ່າວເປັນເທື່ອທຳອິດທີ່ເກີດຂື້ນກັບຂັ້ນໄດເລື່ອນຕົວນີ້
ຢ່າງໃດກໍຕາມ ພາຍຫລັງຈາກເຫດທີ່ເກີດຂື້ນກັບຂັ້ນໄດເລື່ອນອີກເທື່ອ ເຮັດໃຫ້ສັງຄົມອອນໄລນ໌ວິພາກວິຈານແລະຖົກຖຽງເລື່ອງຄວາມປອດໄພໃນການໃຊ້ຂັ້ນໄດເລື່ອນ ຄວນໃຊ້ຢ່າງໃດໃຫ້ຖືກວິທີ ແລະຈະຮູ້ໄດ້ຢ່າງໃດວ່າປອດໄພ