ເລື່ອງຂອງການແຕ່ງລົດໃນປັດຈຸບັນນີ້ຖືວ່າຕ່າງມີຜູ້ທີ່ໃຫ້ຄວາມສົນໃຈເປັນຢ່າງຫລາຍ ຊຶ່ງການແຕ່ງລົດກໍຈະມີການຕົກແຕ່ງຫລາຍຮູບແບບ ບໍ່ວ່າການຕົກແຕ່ງເພື່ອຄວາມສວຍງາມຂອງລົດ ຫລື ຈະເປັນການຕົກແຕ່ງເພື່ອເພີ່ມຄວາມແຮງຂອງເຄື່ອງຈັກ ແຕ່ກ່ອນທີ່ຄິດຈະທຳການແຕ່ງລົດນັ້ນຄວນຄິດໃຫ້ດີວ່າອາດຈະມີຜົນກະທົບຕ່າງໆຕາມມາ ຊຶ່ງໃນມື້ນີ້ເຮົາຈະມາເບິ່ງກັນວ່າຫາກມີການແຕ່ງລົດນັ້ນຈະມີຜົນຫຍັງຕາມມາແດ່
ລໍ້ແມັກ
ການປ່ຽນລໍ້ແມັກນັ້ນຖືວ່າສິ່ງທີ່ຫລາຍໆທ່ານໃນສະໄໝນີ້ມັກ ຊຶ່ງການເລືອກລໍ້ແມັກຄວນທີ່ຈະໃຫ້ເໝາະກັບຕົວລົດ ບໍ່ຢ່າງນັ້ນອາດຈະເກີດບັນຫາຕາມມາພາຍຫລັງ ຊຶ່ງການເລືອກໃຊ້ລໍ້ແມັກທີ່ກວ້າງເກີນໄປຈົນເຮັດໃຫ້ເໝາະສົມກັບຂະໜາດຂອງຢາງ ຫລືແມ່ນແຕ່ການໃຊ້ລໍ້ເຫລັກທີ່ບາງເກີນໄປ ອາດຈະສົ່ງຜົນໃນເລື່ອງຂອງການຂັບຂີ່ ເພາະຈະເຮັດໃຫ້ຂອບຢາງກະທົບກັບພື້ນຖະໜົນ ອາດຈະເຮັດໃຫ້ຢາງເສື່ອມສະພາບໄວກວ່າປົກກະຕິຊຶ່ງສ່ຽງຕໍ່ການເກີດອຸປະຕິເຫດຢາງລະເບີດໃນຂະນະຂັບຂີ່ໄດ້
ເບາະນັ່ງ
ການປ່ຽນເບາະນັ່ງຫລາຍໆທ່ານອາດຈະມີການປ່ຽນເພື່ອໃຫ້ພໍດີກັບຮ່າງກາຍຫລືໃຫ້ໃຫຍ່ຂຶ້ນເພື່ອໃຫ້ເກີດຄວາມສະບາຍໃນການຂັບຂີ່ ຊຶ່ງການປ່ຽນເບາະນັ້ນຫາກບໍ່ມີການຕິດຕັ້ງທີ່ດີ ບໍ່ຫມັ້ນຄົງແຂງແຮງ ແລະບໍ່ຢູ່ໃນລະດັບທີ່ຖືກຕ້ອງນັ້ນອາດຈະສົ່ງຜົນໃນເລື່ອງຂອງການບັງຄັບພວງມາໄລ ແລະການເບິ່ງເຫັນອາດຈະສົ່ງຜົນໃຫ້ເກີດອຸປະຕິເຫດໄດ້ເຊັ່ນກັນ ແລະ ອີກສິ່ງໜື່ງທີ່ຄວນລະມັດລະວັງເປັນຢ່າງຫລາຍໃນເລື່ອງຂອງການປ່ຽນເບາະນັ່ງທີ່ເປັນເບາະຂອງປອມ ເພາະເບາະພວກນີ້ຈະຖືກຜະລິດແບບບໍ່ມີການຄວບຄຸມມາດຕະຖານ ຫາກທ່ານໃດທີ່ຄິດຈະປ່ຽນເບາະຄວນເລືອກໃຊ້ທີ່ເປັນເບາະແທ້ເທົ່ານັ້ນ
ພວງມາໄລ
ການປ່ຽນພວງມາໄລຖືວ່າເປັນສິ່ງທີ່ພົບເຫັນກັນໄດ້ເຊັ່ນກັນ ຊຶ່ງການປ່ຽນພວງມາໄລທີ່ມາໃຊ້ທີ່ມີຂະໜາດນ້ອຍເກີນໄປ ນັ້ນຈະມີຜົນຕໍ່ຂະໜາດຂອງວົງລ້ຽວ ແລະ ການບັງຄັບຄວບຄຸມທິດທາງ ແລະໃນກໍລະນີທີ່ພວງມາໄລຂອງເກົ່າມີລະບົບຖົງລົມນິລະໄພເມື່ອປ່ຽນອອກໄປແລ້ວອາດຈະສົ່ງຜົນຕໍ່ລະບົບຖົງລົມນິລະໄພໄດ້ເຊັ່ນກັນ
ສີສັນຍານໄຟໜ້າ – ຫລັງລົດ
ການປ່ຽນ ສີສັນຍານໄຟໜ້າ – ຫລັງລົດ ນັ້ນຖືວ່າເປັນສິ່ງທີ່ບໍ່ຄວນເຮັດເນື່ອງຈາກ ກົດຫມາຍໄດ້ກຳນົດໄວ້ວ່າ ແສງຂອງສັນຍານໄຟໜ້າມີ 2 ສີ ຄືເຫລືອງອ່ອນຫລືສີຂາວ ຫ້າມທຳການດັດແປງໄປເປັນສີອື່ນ ຫລື ເຮັດໃຫ້ມີແສງສະຫວ່າງຫລາຍເກີນໄປແລະເຫັນແສງບໍ່ຊັດເຈນ ຊຶ່ງແສງສະຫວ່າງຕ້ອງໃຫ້ເຫັນໄດ້ຊັດເຈນໃນໄລຍະ 100 ແມັດ ສ່ວນທາງດ້ານໄຟເບຣກກໍຕ້ອງມີສີແດງ ໄຟລ້ຽວຕ້ອງເປັນໄຟກະພິບສີເຫລືອງ ແລະ ສີແດງເທົ່ານັ້ນ ເຮັດໃຫ້ການປ່ຽນສີສັນຍານໄຟ ນັ້ນສົ່ງຜົນໃຫ້ຜິດກົດຫມາຍ
