ພະແນກກວດການະຄອນຫລວງວຽງຈັນໃຫ້ຮູ້ວ່າ: ປັດຈຸບັນ, ໜ່ວຍງານຂອງຕົນພວມດຳເນີນການເລັ່ງທວງ ເງິນຫລາຍຕື້ກີບນຳພະນັກງານລັດຖະກອນ ທີ່ໄດ້ສວຍໃຊ້ໜ້າທີ່ຕຳແໜ່ງອຳນາດ ລັກລອບເອົາໄປແບບບໍ່ຊອບທຳຫລາຍກໍລະນີ ໃນຫລາຍປີຜ່ານມາ ແລະ ພົ້ນເດັ່ນແມ່ນ ມີພະນັກງານຈຳນວນໜຶ່ງໄດ້ຂາຍດິນລັດ ໃນເນື້ອທີ່ຫລາຍກວ່າ 12 ເຮັກຕາ, ມີຜົນເສຍຫາຍຫລາຍກວ່າ 3 ຕື້ກີບ, ໃນນີ້ສາມາດເກັບກູ້ຄືນໄດ້ພຽງ 971 ລ້ານກວ່າກີບ, ສ່ວນທີ່ເຫລືອແມ່ນຍັງຢູ່ໃນຂັ້ນຕອນ ດຳເນີນຕາມລະບຽບກົດໝາຍ ແລະ ເກັບກູ້ຜົນເສຍຫາຍດັ່ງກ່າວ ມາໃຫ້ໄດ້ໂດຍໄວ, ນີ້ແມ່ປາກົດການສໍ້ລາດບັງຫລວງ ທີ່ພວມເກີດຂຶ້ນຢ່າງແຜ່ຫລາຍ.
ຄະນະດັ່ງກ່າວຍັງໃຫ້ຮູ້ວ່າ: ເພື່ອສະກັດກັ້ນ ແລະ ຕ້ານການສໍ້ລາດບັງຫລວງໃນໄລຍະຜ່ານມາ, ນະຄອນ ຫລວງໄດ້ເອົາໃຈໃສ່ຕິດຕາມກວດກາ ການຈັດຕັ້ງປະຕິບັດແຜນພັດທະນາ ເສດຖະກິດ-ສັງຄົມຂອງຕົນຢ່າງເປັນປະຈຳ, ໂດຍສະເພາະແມ່ນໄດ້ກວດກາແຜນລາຍຮັບ -ລາຍຈ່າຍ, ການປະຕິບັດແຜນງານ ແລະ ໂຄງການສຳຄັນຕ່າງໆເຊັ່ນ: ງານສະເຫລີມສະຫລອງນະຄອນຫລວງຄົບຮອບ 450ປີ, ໂຄງການກໍ່ສ້າງສະໜາມກິລາແຫ່ງຊາດ, ການກໍ່ສ້າງເສັ້ນທາງ 450 ປີ, ໂຄງການປັບປຸງສະໜາມຫລວງ, ກົມມະລຽນພະທາດຫລວງ, ເສັ້ນທາງ 4 ເລນໜ້າພະທາດຫລວງ, ສ້າງສວນໄຊເສດຖາ, ສວນໜອງສະພັງເລນ, ອານຸສາວະລີເຈົ້າອານຸວົງ, ໂຄງການຕ້ານຕາຝັ່ງເຈື່ອນ, ເສັ້ນທາງດົງໂດກ-ໂພນຕ້ອງ-ໂພນພະເນົາ, ໂຄງການສ້າງທາງໜອງບົວທອງ-ໜອງບຶກ ແລະ ອື່ນໆ, ເຊິ່ງເຫັນວ່າໂຄງການຈຳນວນໜຶ່ງແມ່ນມີຄຸນນະພາບ ແລະ ສຳເລັດຕາມກຳນົດເຊັ່ນ: ໂຄງການກໍ່ສ້າງເສັ້ນທາງ 450 ປີ ແລະ ເສັ້ນທາງໜອງບົວທອງ-ໜອງບຶກ, ຊຶ່ງເປັນໂຄງການປະຕິບັດຕາມນະໂຍບາຍ ຫັນຊັບສີນເປັນທຶນ.
ຄຽງຄູ່ກັບການກວດກາຕົວຈິງແລ້ວ, ພະແນກດັ່ງກ່າວຍັງໄດ້ເອົາໃຈໃສ່ ໃນການເຜີຍແຜ່ບັນດາກົດໝາຍ, ຄຳສັ່ງແນະນຳກ່ຽວກັບການຕ້ານການສໍ້ລາດບັງຫລວງ, ຕ້ານການຟູມເຟືອຍຕ່າງໆໃຫ້ພະນັກງານ ລັດຖະກອນ ແລະ ປະຊາຊົນໄດ້ຮັບຮູ້ເຂົ້າໃຈຢ່າງ ເປັນປົກກະຕິແລະ ກວ້າງຂວາງ, ເພື່ອເຫັນໄດ້ຜົນຮ້າຍ ແລະ ຄວາມອັນຕະລາຍຂອງການສໍ້ລາດບັງຫລວງ, ການສວຍໃຊ້ໜ້າທີ່ຕຳແໜ່ງ, ໃຊ້ອຳນາດເກີນຂອບເຂດ, ການຮັບສີນບົນ, ການປອມແປງເອກະສານ, ການຄິດໄລ່ມາດຖານເຕັກນິກ ກໍ່ສ້າງບໍ່ຖືກຕາມຕົວຈິງ ແລະ ອື່ນໆ. ເພື່ອໃຫ້ເປັນໄປຕາມຫລັກການທີ່ວ່າ: ຖືເອົາການສະກັດກັ້ນເປັນຕົ້ນຕໍ ແລະ ເອົາການຕ້ານເປັນສຳຄັນ ເພື່ອບໍ່ໃຫ້ມີໂຄງການນອກແຜນ ແລະບັນຫາຫຍໍ້ທໍ້ອື່ນໆເກີດຂຶ້ນ.
ບັນຫາດັ່ງກ່າວແມ່ນທ່ານ ບຸນທອງ ພົມມະຈັນ ຄະນະພັກປະທານຄະນະກວດກາພັກ, ຫົວໜ້າພະແນກກວດກາລັດນະຄອນຫລວງ, ລາຍງານຢູ່ກອງປະຊຸມໃຫຍ່ຄັ້ງທີ VI ຂອງອົງຄະນະພັກນະຄອນຫລວງວຽງຈັນ ທີ່ໄດ້ສຳເລັດລົງເມື່ອບໍ່ດົນມານີ້.
ຂ່າວຈາກ: 