ຕາມຂ່າວຕ່າງປະເທດ ຖະແຫຼງການຈາກທຳນຽບ ປະທານາທິບໍດີຣັສເຊຍຫຼ້າສຸດ ຢືນຢັນວ່າ ຄວາມພະຍາຍາມ ໃນການຊຸກຍູ້ຮ່າງກົດໝາຍສະບັບນີ້ ເຊິ່ງຄາດວ່າຈະມີຜົນບັງຄັບໃຊ້ໃນບໍ່ຊ້າ ຈະຊ່ວຍຂະຫຍາຍການໃຊ້ເງິນສຸກຸນ ຣູເບີລ ແລະເງິນສະກຸນທ້ອງຖິ່ນອື່ນໆ ໃຫ້ມີບົດບາດເພິ່ມຫຼາຍຂຶ້ນ ແລະຊ່ວຍໃຫ້ເກີດຄວາມສະດວກ ໃນດ້ານການຄ້າລະຫວ່າງປະເທດ ຕະຫຼອດຮອດຊ່ວຍປົກປ້ອງ ສະຖຽນລະພາບທາງການເງິນຂອງປະເທດ ໃນພູມິພາກໃຫ້ຫຼຸດພົ້ນ ຈາກຜົນກະທົບທີ່ເປັນຜົນພວງຈາກ ພາວະຄວາມບໍ່ແນ່ນອນທາງເສດຖະກິດ ທັງໃນສະຫະລັດອາເມລິກາ ແລະເອີຣົບໃນເວລານີ້.

ຖ້າຫາກຮ່າງກົດໝາຍດັ່ງກ່າວ ມີຜົນບັງຄັບໃຊ້ຢ່າງເປັນທາງການ ຈະຖືເປັນການພິກໂສມດ້ານການຄ້າ ລະຫວ່າງປະເທດຄັ້ງສຳຄັນ ຈາກແຕ່ເກົ່າທີ່ເງິນສະກຸນໂດລາສະຫະລັດ ແລະເງິນສະກຸນເອີໂຣມີບົດບາດ ສຳຄັນຍິ່ງໃນຖານະສື່ກາງຂອງການຄ້າຂາຍ ລະຫວ່າງປະເທດຕ່າງໆ ໂດຍສະເພາະໃນກຸ່ມປະເທດທີ່ເຄີຍເປັນ ສ່ວນໜຶ່ງຂອງສະຫະພາບໂຊວຽກ ທີ່ຍັງໃຊ້ເງິນຕາທັງ 2 ສະກຸນ ຂອງໂລກຕາເວັນຕົກເປັນສື່ກາງ ຄິດເປັນສັດສ່ວນປະມານ 50% ຫຼືເຄິ່ງໜຶ່ງຂອງການຄ້າຂາຍລະຫວ່າງກັນ.