ຂປລ. ປັດຈຸບັນ ປະຊາຊົນ ໃນເຂດຈຸດສຸມ ຕັງອາໄລ-ລະແບງ ແຂວງສະຫວັນນະເຂດ ທີ່ຢຶດຖືອາຊີບ ປູກພືດອຸດສາຫະກຳຄື ຢາງໂບງ ພວມປະສົບກັບ ບັນຫາ ລາຄາຕົກຕ່ຳ, ເຮັດໃຫ້ລາຍຮັບ ຂອງພໍ່ແມ່ ປະຊາຊົນ ຫລຸດລົງ.
ທ່ານ ບຸນໂສມ ແສນປັນຍາ ລາຂາພັກຮາກຖານ ຈຸດສຸມຕັງອາໄລ-ລະແບງໄດ້ລາຍງານຕໍ່ ທ່ານ ສັນຕິພາບ ພົມວິຫານ ຮອງເຈົ້າແຂວງ ສະຫວັນນະເຂດ ພ້ອມພະແນກການ ອ້ອມຂ້າງແຂວງ ທີ່ເຄື່ອນໄຫວ ຢ້ຽມຢາມ-ຕິດຕາມເບິ່ງ ການພັດທະນາ ພື້ນຖານ ໂຄງລ່າງ ໃນເຂດດ່ັງກ່າວ ເມື່ອທ້າຍເດືອນ ຜ່ານມາວ່າ: ຢາງໂບງ ເປັນສິນຄ້າທີ່ສ້າງລາຍຮັບ ໃຫ້ກັບຄອບຄົວ ຂອງປະຊາຊົນ ໃນເຂດນີ້ ໄດ້ດີພໍສົມຄວນ ຈາກເມື່ອກ່ອນ ເຄີຍຂາຍຢາງໂບງແຫ້ງ 1 ກິໂລຕໍ່ 7-8 ພັນກີບ ແຕ່ໄລຍະນີ້ ລາຄາແມ່ນ ຂາຍໄດ້ພຽງ 1 ກິໂລຕໍ່ 4 ພັນກີບ ເຮັດໃຫ້ຈຳນວນ ຄອບຄົວ ຜູ້ທີ່ປູກຢາງໂບງ 100 ກວ່າຄອບຄົວ ພົບກັບບັນຫາ ລາຍຮັບ ຫລຸດລົງ.
ຈຸດສຸມ ຕັງອາໄລ-ລະແບງ ມີເນື້ອທີ່ກະສິກຳ ທັງໝົດ 1.577 ເຮັກຕາ, ປະຊາຊົນ ໃນເຂດດັ່ງກ່າວ ໄດ້ສຸມໃສ່ໃນການປູກຢາງໂບງ ໃນເນື້ອທີ່ 300 ກວ່າເຮັກ ຕາ, ປູກກ້ວຍ 50 ກວ່າເຮັກຕາ, ເຮັດສວນປູກພືດ ປະສົມເກືອບ 800 ເຮັກຕາ ແລະ ເຮັດນາ 20 ເຮັກຕາ. ນອກຈາກນີ້ ຍັງໄດ້ປູກພືດ ຊະນິດຕ່າງໆອີກ 10 ກວ່າເຮັກຕາ ລາຍຮັບສ່ວນໃຫຍ່ ຂອງປະຊາຊົນ ເຂດນີ້ ແມ່ນໄດ້ຈາກການ ຂາຍຜົນຜະລິດ ກະສິກຳ ແລະ ສັດລ້ຽງ.
ບ້ານທີ່ນອນໃນ ຈຸດສຸມມີ 12 ບ້ານ, ພົນລະເມືອງ 4 ພັນກວ່າຄົນ, ຍິງ 2 ພັນກວ່າຄົນ, ມີ 674 ຫລັງຄາເຮືອນ ແລະ ມີ 767 ຄອບຄົວ, ປະຊາຊົນສ່ວນໃຫຍ່ ແມ່ນຖືເອົາອາຊີບ ການປູກພືດ ອຸດສາຫະກຳ ແລະ ລ້ຽງສັດຍ້ອນສະພາບທີ່ຕັ້ງ ແລະ ພູມສັນຖານ ເໝາະສົມ ສັດລ້ຽງ ຂອງປະຊາຊົນ ເຂດນີ້ມີສັດໃຫຍ່ ປະເພດຄວາຍ 450 ກວ່າໂຕ, ງົວ 1.470 ກວ່າໂຕ, ແບ້ 820 ກວ່າໂຕ, ໝູ 780 ກວ່າໂຕ, ສັດປີກເກືອບ 5 ພັນໂຕ ແລະ ປະຊາຊົນ ຍັງໄດ້ປ່ອຍປາ 2 ແສນ ກວ່າໂຕ ເພື່ອເປັນອາຫານ ແກ້ໄຂພາຍໃນ ຄອບຄົວ.
ຂ່າວ:
