ເມືອງທີ II ຂອງແຂວງ ໄຊຍະບູລີ ໄດ້ຖືກຮັບຮອງເປັນເມືອງ 4 ບຸກຊາວໜຸ່ມ ປະຊາຊົນປະຕິວັດລາວ. ຜ່ານການເຄື່ອນໄຫວປະຕິບັດຂໍ້ແຂ່ງຂັນ 4 ບຸກຊາວໜຸ່ມ ປະຊາຊົນປະຕິວັດລາວ ແມ່ນໄດ້ເຄື່ອນໄຫວຕາມແຜນການເປີດບັ້ນ 4 ບຸກຂອງເມືອງວາງອອກ ແລະ ໃນໄລຍະ 1 ປີຜ່ານມາສາມາດປະເມີນຄ່າສະເລ່ຍໃນທົ່ວເມືອງໄດ້ 80 ກວ່າສ່ວນຮ້ອຍ ຈຶ່ງຮັບຮອງເມືອງ ຫົງສາ ເປັນເມືອງທີ II ຂອງແຂວງ ໄຊຍະບູລີ ທີ່ໄດ້ຖືກຮັບຮອງເປັນເມືອງ 4 ບຸກຊາວໜຸ່ມ ປະຊາຊົນປະຕິວັດລາວ. ພິທີປະກາດຮັບຮອງ ເມືອງ ຫົງສາ ແຂວງ ໄຊຍະບູລີ ເປັນເມືອງ 4 ບຸກຊາວໜຸ່ມ ປະຊາຊົນປະຕິວັດລາວ ເມືອງທີ 2 ຂອງແຂວງ ໄດ້ຈັດຂຶ້ນໃນທ້າຍເດືອນ ສິງຫາຜ່ານມານີ້, ຢູ່ທີ່ສະໂມສອນໃຫຍ່ຂອງເມືອງ ຫົງສາ ເປັນກຽດເຂົ້າຮ່ວມຂອງທ່ານ ຄຳສຸກ ທໍ່ ຮອງເລຂາພັກແຂວງ ແຂວງ ໄຊຍະບູລີ ຜູ້ຊີ້ນຳວຽກງານອົງການຈັດຕັ້ງມະຫາຊົນຂັ້ນແຂວງ, ທ່ານ ນາງ ຄຳຜິວ ພັນທະວົງ ເລຂາຄະນະບໍລິຫານງານຊາວໜຸ່ມ ປະຊາຊົນປະຕິວັດລາວ ແຂວງ ໄຊຍະບູລີ, ມີຄະນະປະຈຳພັກເມືອງ, ກຳມະການພັກເມືອງ, ຫົວໜ້າ-ຮອງຫົວໜ້າຫ້ອງການ, ເລຂາຊາວໜຸ່ມອ້ອມຂ້າງເມືອງ, ພະນັກງານອາວຸໂສບຳນານ ແລະ ແຂກຖືກເຊີນເຂົ້າຮ່ວມ. ທ່ານ ສີພູວົງ ວິໄລແກ້ວ ຄະນະບໍລິຫານງານຊາວໜຸ່ມແຂວງ ໄຊຍະບູລີ ເລຂາຄະນະບໍລິຫານງານຊາວໜຸ່ມເມືອງ ຫົງສາ ໄດ້ຂຶ້ນຜ່ານການຕີລາຄາ ແລະ ປະເມີນຜົນຂໍ້ແຂ່ງຂັນ 4 ບຸກຊາວໜຸ່ມ ປະຊາຊົນປະຕິວັດຢູ່ເມືອງ ຫົງສາວ່າ: ຄະນະບໍລິຫານງານຊາວໜຸ່ມ ປະຊາຊົນປະຕິວັດລາວເມືອງ ຫົງສາ ແມ່ນອົງການຈັດຕັ້ງໜຶ່ງທີ່ນອນຢູ່ໃນອົງປະກອບລະບົບຈັດຕັ້ງຂອງເມືອງ ເຊິ່ງປະກອບມີ 3 ຂັ້ນຄື: ຂັ້ນເມືອງ, ຄະນະຊາວໜຸ່ມຮາກຖານ ແລະ ຂັ້ນໜ່ວຍຮາກຖານ ໃນທົ່ວເມືອງປະກອບມີ 63 ໜ່ວຍ. ໃນນີ້, ສໍານັກງານ 13 ໜ່ວຍ, ກຳລັງປກສ-ປກຊ 2 ໜ່ວຍ, ໂຮງຮຽນ 10 ໜ່ວຍ ແລະ ຮາກຖານບ້ານ 38 ໜ່ວຍ, ມີສະມາຊິກຊາວໜຸ່ມທັງໝົດ 3.115 ສະຫາຍ ຍິງ 1.312 ສະຫາຍ.
ຜ່ານການເຄື່ອນໄຫວປະຕິບັດຂໍ້ແຂ່ງຂັນ 4 ບຸກຂອງເມືອງວາງອອກ ສາມາດປະເມີນຜົນໄດ້ 80.16%. ໃນນີ້, ມັນສະແດງອອກທາງດ້ານການເມືອງແນວຄິດ ເຮັດໃຫ້ສະມາຊິກຊາວໜຸ່ມແຕ່ລະສະຫາຍໄດ້ເຂົ້າຮ່ວມສຶກສາອົບຮົມແນວຄິດການເມືອງຢ່າງໜັກແໜ້ນສາມາດປະເມີນໄດ້ 85,26%, ດ້ານການຝຶກຝົນຫຼໍ່ຫຼອມຮ່ຳຮຽນເຮັດໃຫ້ສະມາຊິກຊາວໜຸ່ມໄດ້ເຂົ້າຮ່ຳຮຽນເອກະສານສຳຄັນຕ່າງໆຂອງພັກ-ຂອງຊາດໄດ້ 65 ຄັ້ງ ມີຜູ້ເຂົ້າຮ່ວທັງໝົດ 2.352 ສະຫາຍ ສາມາດປະເມີນໄດ້ 78,20%, ດ້ານວຽກງານການຈັດຕັ້ງເຮັດໃຫ້ສະມາຊິກຊາວໜຸ່ມໄດ້ເອົາໃຈໃສ່ປັບປຸງການຈັດຕັ້ງໃຫ້ມີຄວາມເຂັ້ມແຂງ ສາມາດປະເມີນຜົນໄດ້ 77,42%, ດ້ານວິຊາຊີບ ແລະ ສ້າງວຽກເຮັດງານທຳ ຫຼື ວິຊາສະເພາະ ແມ່ນໄດ້ເຮັດໃຫ້ສະມາຊິກຊາວໜຸ່ມແຕ່ລະຮາກຖານ-ບ້ານ ເອົາໃຈໃສ່ສ້າງເສດຖະກິດຄອບຄົວດ້ວຍການຜະລິດເປັນສິນຄ້າ ໂດຍສະເພາະແມ່ນການປູກເຂົ້າ, ສາລີ, ໝາກໂມ, ລ້ຽງສັດ ແລະ ເຂົ້າເປັນກຳມະກອນເຮັດວຽກຢູ່ບໍລິສັດ ໄຟຟ້າຫົງສາຈຳນວນໜຶ່ງ ສາມາດສ້າງລາຍຮັບ 1.500.000 ກີບຕໍ່ຄົນຕໍ່ເດືອນ ສາມາດປະເມີນໄດ້ 79,77%.
ພ້ອມນີ້, ຕ່າງໜ້າຊາວໜຸ່ມຄອວຄົວຕົວແບບຂອງການລ້ຽງສັດ ກໍ່ຂຶ້ນປະກອບຄຳຄິດເຫັນ ແລະ ໃນໂອກາດດັ່ງກ່າວ, ທ່ານ ນາງ ຄຳຜິວ ພັນທະວົງ ເລຂາຄະນະບໍລິຫານງານຊາວໜຸ່ມ ປະຊາຊົນປະຕິວັດລາວ ແຂວງ ໄຊຍະບູລີ ຍັງໃຫ້ກຽດມອບໃບຢັ້ງຢືນ 4 ບຸກໃຫ້ແກ່ເມືອງຫົງສາ. ຫຼັງຈາກນັ້ນ, ການນຳຂອງແຂວງ, ຂອງເມືອງ ແລະ ຜູ້ເຂົ້າຮ່ວມໃນພິທີດັ່ງກ່າວ ກໍ່ໄດ້ຮ່ວມເປີດປ້າຍເມືອງຫົງສາ ເປັນເມືອງ 4 ບຸກຊາວໜຸ່ມ ປະຊາຊົນປະຕິວັດລາວຢ່າງເປັນທາງການ.
ຂ່າວ ແລະ ພາບ: ກິດຕິສັກ ບົວໄລ ນັກຂ່າວປະຈຳເມືອງຫົງສາ ແຂວງໄຊຍະບູລີ
ຂ່າວ ແລະ ພາບ: ກິດຕິສັກ ບົວໄລ ນັກຂ່າວປະຈຳເມືອງຫົງສາ ແຂວງໄຊຍະບູລີ